Surprize!!!

Það er víst ekkert leyndarmál lengur! Kallinn er kominn á klakann! Fyrir rúmri viku síðan ákvað ég að fara til Íslands að heimsækja nýja fjölskyldumeðliminn og auðvitað alla hina líka. Ég ákvað á sama tíma að segja engum frá því að ég væri að koma og mæta bara óvænt. Það heppnaðist líka svona vel.

Fjóla systir var sú eina sem vissi þetta og hún sótti mig á völlinn. Svo tók ég til við að hrella alla fjölskylduna mína sem hafði ekki hugmynd um að ég ætlaði að koma, allir héldu að ég kæmi ekki fyrr en eftir rúman mánuð. Það er meira segja til á vídjó þegar ég birtist og skaut fólki skelk í bringu. Vonandi fæ ég það og get sett á netið því það er rosalega fyndið.

Núna ætla ég að reyna að fá að vinna eitthvað svo ég geti komið út í plús úr þessu ævintýri. Ég næ að vera tvær vikur á klakanum, allt upplestarfríið. Svo fer ég út til að taka próf og fara á Hróarskeldu! Það eru bara 27 dagar í Hróarskeldu! :D Kveðja úr Keflavík,
Maggi.

Rjómablíða

Það er þvílíkt gott veður í Kolding þessa dagana. Yfir tuttugu stiga hiti, og á morgun er spáð 28 stiga hita yfir daginn! Ótrúlegar tölur finnst manni því maður er ekki vanur þessu. Við kláruðum verkefnið í gær! Eða svo gott sem. Við prentuðum skýrsluna og svo á mánudaginn klárum við að gorma hana eða eitthvað sniðugt svo hún verði nú flott þegar við skilum verkefninu inn. En ég er farinn niður í bæ til að sleikja sólina og kaupa mér ís og eitthvað sniðugt. :D Kveðja,
Magnús.

It's almost over...

Það styttist í verkefnaskil og það er það eina sem kemst að þessa dagana. Skiladagur er á mánudaginn og ef okkur tekst að klára fljótlega þá náum við að fagna verkefnalokum núna um helgina. Eftir smá pásu frá skóladóti tekur svo við undirbúningur fyrir próf! Það eru nefnilega ekki allir svo heppnir að vera búnir í prófum í maí eins og þið heima á klakanum. En það má segja að tilhugsunin um Hróarskeldu haldi í manni á réttri braut! Búinn að kaupa miða og alles. Það verður frábært! :D En við hér í Danaveldi höfum það nú ekki svo slæmt þótt við eigum eftir að fara í próf. Viljiði bara kíkja á veðurspána fyrir næstu daga! Ekki slæmt.
Maggi.

Lítill frændi!

Í gærkvöldi eignuðust Halla systir og Biggi lítinn strák. Öllum heilsast vel og mikil gleði er með nýjasta fjölskyldumeðliminn. Hún er engu minni hér í Kolding, ég get ekki beðið eftir að komast heim í sumar til að sjá litla frænda! Til hamingju með litla prinsinn Halla og Biggi og allir! :D Hér eru myndir af litla krílinu.
Magnús frændi.

Say Hallelujah

Ég hélt Evróvisjón partý í gær þrátt fyrir að Ísland tæki ekki einu sinni þátt. Steinunn var samt flott og stóð sig vel þegar hún las upp stigin. Við vorum dugleg í staupunum og sumir fóru verr útúr því en aðrir! En planið var að gera þetta almennilega því þetta var fyrsta og síðasta partýið sem við höldum í þessari íbúð. Ég kíkti svo niður í bæ eftir það en endaði á því að fara ekki á neina staði heldur bara á Munkegade að spjalla og hlusta á Tracy Chapman.

Halla systir og Biggi mágur eru að fara að eignast barn og ég er rosa spenntur! Það er ekki vitað hvers kyns það er, en það kemur í ljós fljótlega. Ég er á Íslandi í huganum. Það er barnaflóð í gangi því Bebba og Hjörleifur eignuðust litla prinsessu í byrjun mánaðarins. Til hamingju með það krakkar! Ég hlakka mikið til að heimsækja ykkur þegar ég kem heim.
Magnús Sveinn.

GAUR!!!

Við komumst ekki einu sinni áfram. Það er það slappasta sem ég veit um. Allir spáðu okkur góðu gengi og við náðum ekki einu sinni uppúr forkeppninni! Úff hvað það er slæmt! Sjitturinn titturinn mellan og hóran! Það þýðir samt ekkert að beila á partýinu á laugardag, maður verður að halda í það minnsta eitt partý áður en maður flytur af Knud-Hansensvej. Það hefði samt verið miklu skemmtilegra hefði Ísland verið með í alvöru keppninni. Þetta er meira að segja nokkuð fyndið. Mér datt ekki einu sinni í hug að við kæmumst ekki í lokakeppnina! Hahaha, æi kannski er þetta ekkert svo fyndið. Vonandi getur Ísland rifið sig uppúr þunglyndinu sem sjálfkrafa skapast með því að klúðra Evróvisjón svona rosalega. Jæja, life goes on...
Maggi.

Evróvisjón upphitun

Í kvöld verður hitað upp fyrir Evróvisjón og horft á forkeppnina þar sem Ísland og Noregur munu berjast um efsta sætið! Það er ég viss um. Það verður gaman að sjá hvernig Noregur mun standa sig, ég held þeir muni gera góða hluti því lagið þeirra er alveg frábært og sviðsframkoman líka. Ég tók mig til í gær og breytti öllu skipulagi í stofunni þannig að sem flestir geti horft á sjónvarpið. Ég þurfti að færa öll húsgögnin nema stóru hilluna! Og ég þreif nottla íbúðina í leiðinni. Bara passlega vel samt því hvað er gaman við að þrífa allt hátt og lágt og þurfa svo að þrífa allt aftur eftir partýið! Eða í þessu tilviki partýin, því ég verð bæði með upphitun í kvöld og svo svaka partý á laugardaginn. Það er alltaf skemmtilegra í Júróvisjón partýjum þegar Ísland stendur sig vel þannig að við sendum Selmu heillaóskir! Þetta verður gaman.
Maggi.

Súkkulaðihúðaðar amfetamíntöflur

Inngangur: Já það er nóg að gerast. Ég legg það nú ekki í vana minn að afsaka bloggleti en ég verð að gera það núna. Þegar það er mikið að gerast þá fær maður sig einhvernvegin ekki til að byrja að skrifa. Auðvitað á maður að skrifa á hverjum degi svo hugsanirnar og atburðirnir hrannist ekki upp, en stundum er maður einfaldlega latur.

Vökukeppnin
Ætli ég byrji ekki á að segja frá því sem gerðist fyrir tíu dögum síðan eftir að ég bloggaði síðast. Ég, Lára, Elva, Birna og Kolla tókum okkur til og ákváðum að halda vökukeppni. Við ætluðum að taka gott djamm, fara ekkert að sofa heldur vaka allann daginn og halda áfram allan næsta dag og fram á næsta morgun. Fyrir þessa þrekraun þyrfti auðvitað slatta af bjór og fengum við því bílinn hans Rúnars lánaðan og skruppum til Þýskalands. Það gekk ekki betur en svo að finna landamærabúðirnar að við keyrðum í góðan hring og enduðum aftur á landamærunum! Við ætluðum bara að snúa við og leita betur en við lentum í landamæralöggunni sem heimtaði passana okkar. Lára og Elva voru þær einu sem voru með passa en við hin vorum með ökuskírteinin okkar og töldum það vera nóg. En nei, allt kom fyrir ekki, okkur var skipað að fara heim til Kolding og sækja passana okkar og svo mættum við koma til Þýkskalands!

Við héldum nú ekki enda tekur klukkutíma að keyra aftur til Kolding. Við þorðum ekki að stelast aftur yfir með okkur ólöglega fólkið þannig að Lára og Elva skildu mig, Birnu og Kollu eftir í næsta bæ við landamærin sem heitir Padborg. Þar skoðuðum við þennan litla bæ sem lítið var nú varið í, og fengum okkur að borða og svona á meðan stelpurnar redduðu bjórnum. Seinna komst Starri svo að því fyrir okkur að samkvæmt einhverjum lögum sem voru samþykkt 2002 að ökuskírteinið er sko alveg nóg til að fara á milli landa sem eru í Schengen sambandinu! Bölvaðar þýsku löggur sem ekkert vita. :)

En svo var komið að maraþoninu! Við byrjuðum á fimmtudegi því það var mikil tónleikahátíð í gangi í bænum og nóg af fólki. Fyrr um daginn höfðum við rölt niður í Legeparken og þar var troðfullt af fólki, og allir frá 12 ára til sextugs voru á rúllandi rassgatinu. Við vorum mjög hissa að sjá hvað það voru ungir krakkar alveg pissfull og öllum virtist sama. Eftir djammið okkar á fimmtudagskvöldinu þar sem við fórum á Pitstop og Crazy Daisy enduðum við á Munkegade. Þá var Ívar vinur okkar úr IBA skólanum búinn að bætast í hópinn. Til að sofna ekki drifum við okkur út að rölta kl. 8 um morguninn og fórum í Legeparken þar sem tónleikarnir höfðu verið deginum áður. Birna fór á kostum uppá sviði sem söngvari og tryllti áhorfendur, alla fimm.

Við fórum svo hingað á Knud-Hansensvej þar sem ég þvoði þvott til að drepa tímann. Á þeim tíma var fólk orðið vægast sagt þreytt og margir voru nálægt því að þurfa að vera kisi á Pitstop, en það var refsingin við því að sofna fyrst/ur. "Ég vill ekki vera kisi á Pitstop." (sagt með mjög barnalegri röddu) var algengasta setningin þennan dag.

Eftir sturtupásu var svo haldið á Munkegade aftur þar sem ég og Ívar spiluðum Hacky sack með Snorra en stelpurnar höfðu enga orku í það. Þegar við komum svo upp aftur var tekin sú ákvörðun að hætta vökukepninni og að enginn myndi tapa því stelpurnar voru alveg búnar á því og þetta var ekki skemmtilegt lengur. Ég hefði getað haldið áfram en nennti því nú ekki einn. Því fór ég heim þar sem þreytan helltist yfir mig og ég gerði ekkert um kvöldið nema rotast á koddanum mínum. 36 tímar í vöku með einu góðu djammi var afrakstur þessarar keppni. Einn daginn verður hún kannski endurtekin því við gerðum nokkur mistök sem við getum forðast næst. Þá má sko enginn gefast upp.

Verkefnið
Við erum enn á fullu í lokaverkefninu okkar, og við ákváðum að flytja inn skyr til Danmerkur! Af hverju enginn er búinn að því skiljum við ekki og erum því að gera viðskiptaáætlun og heimasíðu tengt þessu. Það er gaman og gengur bara vel. Við skemmtum okkur vel alltaf þegar við hittumst og um daginn eftir umræðu um súkkulaðihúðaðar kaffibaunir fæddist hugmyndin um súkkulaðihúðaðar amfetamíntöflur! Ég hló mikið að því og það er önnur viðskiptahugmynd sem við gætum hrint í framkvæmd einn daginn.

Juelsminde
Ísak vinur okkar sem hefur komið reglulega í heimsókn síðan í mars býr núna í Juelsminde. Þar er hann í skóla fyrir fólk sem vill gerast sjálfboðaliðar í hinum ýmsu verkefnum í Afríku. Hann bauð okkur núna um helgina til að koma í heimsókn til sín og við þáðum það boð með þökkum. Þannig að núna á laugardaginn fórum við (ég, stelpurnar og Snorri) með lestinni í norð-austur átt og heimsóttum Ísakinn.

Við skoðuðum skólann hans sem er á geggjuðum stað við ströndina og þetta er heimavistarskóli þannig að Ísak er alla daga með frábært útsýni yfir sjóinn og ströndina. Um kvöldið héldum við svo niður að strönd þar sem var gerð misheppnuð tilraun til að kveikja bál. Terpentínan og dagblöðin loguðu fínt en greinarnar vildu ekki hlýða og því varð eldurinn mjög skammlífur. En þá lögðumst við bara í sandinn og horfðum á stjörnurnar og spiluðum svo á gítar og sungum hástöfum eins og Íslendingum er einum lagið. Þetta var alveg frábært í einu orði sagt. Undir lokin voru sumir svo sniðugir að skella sér í sjóinn en þökk sé snöggum björgunaraðgerðum varð engum meint af. :)

Daginn eftir var æðislegt veður og við kíktum aftur niður á strönd og sleiktum sólina aðeins. Svo fengum við lánuð hjól sem skólinn á og hjóluðum um Juelsminde. Þetta er lítill bær og virkilega fallegur. Rólegheitin í fyrirrúmi og það var ótrúlega þægilegt andrúmsloftið þarna. Við fengum okkur að borða og kíktum niður að sjó hinumegin í bænum þar sem við spiluðum Hacky sack og lékum okkur á hjólunum. Það voru hjól fyrir alla nema einn þaning að Lára fékk að sitja aftaná hjá mér. Ég veit ekki hvað það er langt síðan ég hef reitt einhvern á hjóli eða farið í hjólatúr með vinum mínum. Það var skemmtileg nostalgía í þessu. Við vorum svo flott á hjólunum okkar (sem voru öll alveg eins) að við stofnuðum hjólaklúbbinn Hannes og ætlum að vera næstu Hells Angels í Danmörku, nema töluvert friðsælli.

Á leiðinni aftur að skólanum keyptum við okkur ís og höfðum það svo gott uppí skóla í góða veðrinu. Okkur bauðst að fá smá rúnt á bát sem er við litla bryggju hjá skólanum og þar sem við voru búin að hafa augastað á bátnum alveg síðan við komum þáðum við það að sjálfsögðu. Ég fór þó ekki út á bátinn heldur slappaði af á brygjunni og horfði á dýraríkið í sjónum. Um kvöldið var Ísak svo góður að skutla okkur heim til Kolding og við stoppuðum á McDonalds á leiðinni. Þessi ferð var ótrúlega vel heppnuð og allir skemmtu sér konunglega. Ég vill þakka Ísaki fyrir góðar móttökur og ferðafélögum mínum fyrir frábæra helgi.

Bring it home...
Nú tekur svo vika af verkefnavinnu við (sem verður eflaust brotin upp á morgun með því að fara á quiz) og næstu helgi verður svo haldið Eurovision partý á Knud-Hansensvej! Já ég og Rebekka ætlum að halda okkar fyrsta og síðasta partý í þessari íbúð. Við erum nefnilega búin að segja henni upp og losnum líklegast við hana eftir akkúrat mánuð! Þannig að það er óvíst um hvar ég mun búa á næstu önn en það eru nokkrir möguleikar í spilunum. Eitt er víst að það verður á ódýrari stað og það verður gott að minnka aðeins greiðslubyrðina því maður er nú einu sinni bara á námslánum. En þá er þetta komið gott. Þetta er með lengri færslum á þessu bloggi. Ég þakka þeim sem nenntu að lesa alla leið. Góðar stundir.
Magnús Sveinn Jónsson.

Sigurgangan heldur áfram

Pub Quiz kryddar skemmtilega uppá þriðjudagnana hér í Kolding. Þá safnast saman slatti af fólki á pöbbnum Knuds Garage og Jerry hinn írski heldur spurningakeppni. Vanalega eru kringum fimmtán lið sem taka þátt og flest þeirra eru fastagestir sem mæta alla þriðjudaga. Við höfum verið nokkuð dugleg við að mæta og oft gengið vel. Í síðustu viku var síðasta quiz apríl-mánaðar og í loka-quizinu eru veitt spes verðlaun, heildarárangur mánaðarins verðlaunaður og liðin sem hafa mætt allan mánuðinn eiga sjens á að vinna verðlaun (verðlaun lesist bjór). Við lentum í öðru sæti yfir mánuðinn (munaði bara einu stigi á okkur og sigurliðinu!) og fengum 250 kr. úttekt á barnum.

Í fyrradag skiptum við svo liðunum aðeins öðruvísi, stelpur á móti strákum af okkur vinunum sem mæta reglulega. Liðin okkar lentu í efstu tveimur sætunum hvorki meira né minna, við strákarnir fyrir ofan. Þannig að við erum komin með ágætt forskot á hin liðin og stefnt er á að vinna mánuðinn. :)

Af skólanum er það að frétta að lokaverkefni þessarar annar er byrjað, og snýst það um að hjálpa fyrirtæki við að færa viðskipti sín meira á netið. Við strákarnir sem gerðum Elvis verkefnið saman, ég, Starri, Haukur og Rúnar ákváðum að halda hópinn enda gekk mjög vel síðast. Annars fer líka mikill tími í að nýta góða veðrið, og það er búið að vera nóg af því undanfarna daga. Að vísu var þrumuveður tvo daga í röð núna nýlega og ég gat ekki sofið heila nótt útaf því. En það var nú bara hressandi. :)
Maggi.

The Advanced HotDog Plate!

Á fimmtudag og föstudag fórum við í IBA skólann hér í bæ (International Business Academy) og gerðum sameiginlegt verkefni með þeim. Það snerist um nýksköpun og virkaði þannig að það kom yfirmaður frá fyrirtækinu Kappa sem er staðsett hér í Kolding en það gerir pappakassa! Eins spennandi og það hljómar. Við áttum að finna ný not fyrir pappa og voru engin takmörk sett nema að uppistaðan í því sem við gerðum átti að vera pappi. Ég var í hóp með einum strák úr mínum skóla og fjórum krökkum úr IBA. Við hugsuðum lengi vel og komum með fullt af hugmyndum en enga sem okkur þótti vera alveg frábær og ætti skilið að vinna. Það var nefnilega 1000 kr. í verðlaun fyrir sigurhópinn.

Á endanum ákváðum við að framkvæma hugmyndina mína um disk fyrir pulsur og pulsubrauð. Hann er svipaður og málarapalletta, því það er gat fyrir þumalputtann svo það sé auðveldara að halda á disknum. Á öðrum endanum eru svo rifflur þannig að það er pláss fyrir pulsur og brauð og það rúllar ekki útaf disknum. Hinum megin eru svo göt þar sem maður getur komið fyrir litlum skálum með sósu. Danir vilja nefnilega hafa pulsurnar og brauðið sér og dýfa því svo í sósuna í stað þess að láta hana á pulsuna. Svo gerðum við eina útgáfu sem var líka með plássi fyrir glas. Eftir hádegi á föstudaginn var afraksturinn svo sýndur í stórum sal í IBA. Það voru yfir 30 hópar af nemendum, yfirleitt sex saman í hóp, og nokkrir hópar með fínar hugmyndir. Mjög algengt var að fólk gerði borð með götum fyrir drykki og voru nokkrar útgáfur af þeirri hugmynd. Við gerðum svaka flotta útstillingu með myndum af Hróarskeldu sem sýndu hvað var mikið vesen að borða pulsur án þess að hafa diskinn flotta, og redduðum svo pulsum og pulsubrauði til að sýna hvernig þetta virkar.

Svo voru tilkynnt úrslitin, og viti menn! Haldiði ekki að við höfum unnið þetta barasta. Þeim leist best á okkar hugmynd og gáfu okkur þúsund krónur danskar. Það er alltaf gaman að vinna. Verst var að þurfa að skipta niður verðlaunaféinu því ég átti allan heiðurinn að þessari uppfinningu. Það er gallinn við að vera í hópavinnu. :) Eftir að búið var að tilkynna sigurvegarana þá fórum við niður á barinn sem er í skólanum og fengum pulsur og bjór. Ég var lengi þar og spilaði póker við fólk úr IBA og það var mjög gaman. Ég nennti svo ekkert heim heldur fór niður í bæ og spilaði Hacky Sack á Munkegade og svo borðuðum við saman risapizzu. Ísakinn og Elva tvö voru í heimsókn á Munkegade um helgina og það gerði góða helgi enn betri.

Í gær hélt Munkegade liðið svo partý með James Bond þema og þar var mikil stemmning. Lára setti met og tók yfir 400 myndir á myndavélina sína. Ég tók þrjár myndir á Polaroid-vélina mína. Hehe. Planið var að vera í partýinu alla nóttina og fara ekkert út, en það náðist bara til klukkan þrjú. Þá var haldið út og ég og Elva komum við á Tavlen áður en við fórum á PitStop. Frábær helgi að vanda.
Maggi.

"Have you seen the Icelandic movie Fálkar?"

Ég trúi varla að við höfum bara verið rúman sólarhring í Hamborg. Ég, Aggi (Húsvíkingur með meiru), Camilla (finnsk, eigandi glæsilegs Fiat Uno), Tiina (önnur finnsk vinkona okkar) og Mathieu (þýskur vinur okkar úr skólanum) lögðum af stað kl. þrjú á fimmtudaginn til Hamborgar og var planið að fara á tónleika með Bloc Party. Það er bresk hljómsveit sem ég uppgötvaði fyrr í vikunni, sótti diskinn þeirra og er búinn að spila hann mikið og fíla þá í tætlur. Við áttum ekki með miða á tónleikana og vissum að það var alveg kol-uppselt. Því fórum við beint niður að tónleikahúsi við komuna til Hamborgar, en þá var klukkutími þar til húsið átti að opna. Mathieu fór innfyrir eitthvað band og inní húsið fyrir okkur til að tjékka hvort hann gæti reddað miðum en það tókst því miður ekki.

Þegar við vorum búin að standa þarna úti í 40 mínútur og öll von virtist úti um að ná að redda miðum, þá kom gaur útúr húsinu og tók Mathieu og Agga með sér og ég og Camilla og Tiina vissum ekkert hvaðan á okkar stóð veðrið. Svo komu þeir fljótlega til baka og sögðu að gaurinn hefði bara haft tvo miða til sölu og viljað of mikinn pening fyrir þá! Það var mikið svekkelsi því það virtist vera sem gaurinn ætlaði að redda miðum fyrir okkur. Við vorum farin að hugsa um að beila bara á þessu og kíkja niðrí bæ, þegar Aggi dregur upp fjóra miða á tónleikana!!! Við trylltumst auðvitað úr einskærri gleði og hamingju! Þá hafði þessi gaur sem dró strákana í burtu unnið fullt af miðum á einhverri útvarpsstöð og seldi strákunum fjóra miða á góðu verði. Aggi og Mathieu stóðust auðvitað ekki mátið að stríða okkur svolítið og halda okkur í myrkrinu. Ótrúlegt hvað þeim tókst að halda andliti lengi. :)

Mathieu yfirgaf okkur svo því hann kom með til að heimsækja foreldra sína yfir helgina. Við hin fórum á stúfana og fundum farfuglaheimili til að gista í yfir nóttina en við urðum að vera komin inn klukkan tvö um nóttina og yfirgefa svo svæðið klukkan hálf tíu morguninn eftir, þannig að við hættum við að gista þar og fórum beint aftur á tónleikana. Það var nægur tími fram að Bloc Party þannig að við náðum alveg annari upphitunarhljómsveitinni og hún var mjög fín, breskt hressingar-rokk. Einn hljómsveitar meðlimur var alveg á rassgatinu og hélt áfram að sturta í sig! Það var mjög fyndið að sjá. En þá var komið að Bloc Party! Þegar þeir byrjuðu vorum við ekki lengi að koma okkur fremst, og í einu orði sagt voru tónleikarnir FRÁBÆRIR!!! Þvílík spilagleði og æðisleg tónlist, góð stemmning og frábær tónleikastaður! Með þessa samblöndu hvað getur klikkað spyr ég bara? Við vorum fremst allan tíman og slömmuðum með Þjóðverjunum í rokkuðu lögunum og dilluðum okkur við þau rólegri. Ég mæli með þessari hljómsveit ef þið eruð rokk-þyrst, og fyrir ykkur sem eruð á leiðinni á Hróarskeldu þá fáið þið að sjá þá spila þar!

Eftir tónleikana var haldið niður í bæ. Agga langaði að finna einhvern bar sem hafði verði í íslenskri bíómynd (sem enginn hafði þó séð) og því spurði hann mann sem var að segja okkur til vegar "Have you seen the Icelandic movie Fálkar?" Það var ekkert smá fyndið, en þess má geta að Þjóðverjinn hafði ekki séð myndina frekar en við Íslendingarnir. Við komumst þó niður í bæ á endanum og skemmtum okkur bara vel. Við römbuðum meira að segja inná einn bar með netum í loftinu, og viti menn! Við vorum búin að finna hinn eina sanna bar sem var í Fálkum! Það var mikið hlegið að því, en ekki stoppað lengi því stemmningin var lítil. Stuttu eftir þetta íslenska djók var komið að finnska djókinu. Við gengum fram hjá skyndibitastaðnum Hesburger sem er finnsk keðja. Við urðum að fara þar inn til að borða að sjálfsögðu enda tvær finnskar stúlkur með í för. Maturinn þar var alls ekki góður og Aggi blótaði honum mikið. Eina sem stelpurnar höfðu að segja var "We told you to get the chicken-burger!". Ég fékk mér Steak-burger sem ég kláraði með bestu lyst en það var aðallega útaf svengd en ekki bragðgæðum.

Þar sem við vorum hvergi með gistingu urðum við að sofa í Fiat Uno-inum sem gengur undir nafninu Prinsessan. Fyrir þá sem ekki vita er Fiat Uno langt frá því að vera rúmgóð bifreið en þó náðum við fjögur að sofa þar í nokkra tíma, sumir betur en aðrir. Þegar við vöknuðum stóð fullt af fólki fyrir framan bílinn og hlógu að okkur! Þau voru í reykingapásu þó held ég en komu ekki sér ferð til að hlægja að okkur. Við áttuðum okkur fljótlega á því að við vorum lögð kol-ólöglega! 'Bannað-að-leggja' skilti allt í kringum okkur, og við vorum rosalega heppin að hafa ekki fengið sekt. Eftir að hafa fært bílinn á löglegan stað röltum við um verslunargötur Hamborgar og ég sem ekkert ætlaði að kaupa missti mig aðeins í stórri H&M verslun. Það var líka besta mál enda mjög langt síðan ég keypti mér föt! Fyrir innan við tíu þúsund íslenskar krónur keypti ég mér sex flíkur. Þar á meðal var langþráður jakki, en ég er búinn að vera á leiðinni að kaupa mér nýjan jakka í átta mánuði! Geri aðrir betur. Svo var haldið heim á leið með stuttum stoppum í Kiel og svo í landamærabúðunum.

Þetta var frábær ferð og þakka ég ferðafélögum mínum vel fyrir. Það var skrítið að koma heim úr ferðalagi á föstudegi, en það er bara fínt, öll helgin eftir. Í gærkvöldi (föstudag) fór ég þó ekki útúr húsi vegna þreytu enda tók þessi sólarhringur í Þýskalandi frá manni alla orku. Það er þó allt að koma enda náði ég góðum 13 tíma svefni. Í svona ferð væri ég vanur að taka 200 myndir að eitthvað álíka, en í þetta sinn tók ég tvær. Þetta er munurinn á því að eiga stafræna myndavél eða Polaroid vél þar sem hver mynd kostar kringum 130 krónur íslenskar. Kannski rætist úr myndavéla-leysi mínu fljótlega, hver veit. Over and out.
Maggi.

London, París, Róm

Það er aldeilis þeytingur á manni þessa dagana. Í gær fórum við í skólaferð til Århus og sáum þar listasafn sem sýndi verk Bill Viola sem er video-listamaður. Verkin hans voru flott en ég er nú samt ekki alveg að fatta svona nútímalist eitthvað. Ég fílaði samt upplifunina og það var gaman að sjá þetta. Eftir að hafa skoðað safnið röltum við niður í bæ og ég skoðaði Århus í fyrsta sinn því ég hef aldrei komið þangað áður. Við fengum okkur að borða og kíktum á kaffihús og röltum um miðbæinn. Þetta var mjög fín ferð og allir voru mjög hissa á því hvað hún gekk snuðrulaust fyrir sig! Að vísu átti hún að vera farin síðasta laugardag en henni var frestað á síðustu stundu og því var þetta nú ekki algjört success. Ég keypti loksins filmu sem passar í Polaroid myndavélina mína, en þá var hún með gulum bakgrunni og einhverjum asnalegum myndum á botninum! Ég veit ekki hvar þetta Polaroid ævintýri mitt endar.

Á eftir er ég svo á leiðinni til Hamborgar! Þar eru tónleikar með hljómsveitinni Bloc Party og ætlum við (ég, Aggi, Camilla, Tiina og Bodil) að freista gæfunnar og mæta á svæðið án þess að eiga miða. Vonandi komumst við inn, en hvort sem það tekst eða ekki þá verður eflaust gaman. Ég uppgötvaði þessa hljómsveit nú bara í þessari viku, en fíla þá í tætlur! Þeir spila líka á Hróarskeldu þannig að það er nú ekki hundrað í hættunni þótt við komumst ekki á tónleikana í kvöld. Við förum á Fiat druslunni hennar Camillu og við verðum bara að krossleggja fingur og vona að hún bili ekki á hraðbrautinni! :D Ekta road trip ævintýri. Við erum ekki einu sinni með gistingu, þetta verður bara að koma í ljós! Hehehe. Svo er frí í Danmörku á morgun því það er bænadagur, hvað sem það nú er. Þannig að þetta verður löng, og eflaust mjög skemmtileg helgi! Kveðja frá Kolding,
Maggi.

Sumarið er tíminn

Koldingbúar leika við hvern sinn fingur í góða veðrinu og er þessi helgi er búin að einkennast af mikilli útiveru. Við erum búin að vera í Legeparken og sitja við Koldinghus, spila strand-tennis þótt engin væri ströndin, grilla úti í garði og ganga um bæinn. Ég er alveg hættur að taka strætó nema í skólann, og hjóla því um allar trissur sem er rosalega fínt. Vonandi verður þetta gott sumar. Danir eiga það nú skilið því veðrið í fyrrasumar var alveg hundleiðinlegt og veturinn mun harðari en þeir eiga að venjast.

Ég er búinn að bæta við einkar skemmtilegri nýjung á þetta blessaða blogg. Það er linkur á veðurstofuna í Danmörku þar sem þú sérð hvernig veðrið er hér í Kolding. Þannig að ef það er rigning og rokrassgat heima á Íslandi, þá getiði kíkt á bloggið mitt og huggað ykkur við það að sólin skín nú að minnsta kosti á Magnús. :D Ef spáin er hinsvegar leiðinleg fyrir Kolding (sem við vonum nú að gerist ekki oft) þá getiði sent mér góða strauma og vonað að ég fjúki ekki af hjólinu mínu eða rigni niður eða verði fyrir eldingu eða eitthvað. Kveðjur úr góða veðrinu í Danmörku.
Maggi.

3ds max og Lego

Við erum farin að læra á þrívíddarforrit í skólanum. Það kom mér á óvart að það er tiltölulega einfalt að búa til hluti og láta þá hreyfast. Að vísu flækjast hlutirnir hratt ef maður vill búa til eitthvað meira og flóknara en maður verður þá bara að leggjast yfir þetta. Hérna geturu séð fyrsta verkefnið mitt sem ég gerði. Ef þú lætur vídjóklippuna lúppa þá sérðu þetta betur. Ég var mjög stoltur að geta gert þetta eftir tvær kennslustundir. Vatnið er að vísu pínu kjánalegt en við erum ekkert búin að læra að gera það ennþá! :)

Í dag fórum við til Billund að heimsækja höfuðstöðvar Lego. Þar lærðum við um fyrirtækið, hvernig það virkar (þó aðallega markaðsdeildina) og skoðuðum húsið, en þarna vinna 300 manns. Í næsta bæ við vinna 3000 manns í Lego verksmiðjunni, og allt í allt vinna 7000 manns fyrir Lego um allan heim! Þetta er ansi stórt fyrirtæki og það var gaman að forvitnast um hvernig það virkar. Þeir hafa átt í erfiðleikum undanfarið og vildu þeir meina að það væri vegna þess að þeir væru of mikið að vera í takt við tímann og gleymt því sem Lego snýst um, gömlu góðu kubbana. Þeir eru því komnir með svokallað "back-to-basics strategy" sem þýðir að þeir ætla að einbeita sér að einfaldleikanum aftur. Þetta virðist vera að ganga ágætlega hjá þeim og vonandi þurfum við því ekki að horfa framá að Lego fari á hausinn. Það væri mikil synd.
Maggi.

Fiskibollur í Kolding!

Ójá! Ég fékk íslenskar fiskibollur úr dós frá ORA í kvöld! Það var æðislegt! Ég er búinn að hugsa mér gott til glóðarinnar alveg síðan strákarnir komu í heimsókn því þeir komu hlaðnir gjöfum og ein þeirra var stór fiskibolludós. Í dag hringdi ég svo í mömmu og fékk uppskriftina af fiskibollum í tómatsósu og ekki var hún nú flókin. Ég gat nú auðvitað ekki setið einn að þessum kræsingum og bauð því Birnu, Láru og Elvu í mat, sauð helling af kartöflum og mixaði þessa líka ágætu tómatsósu fyrir fiskibollurnar! Þetta var nú ekki nákvæmlega eins og mamma gerir, en mjög gott samt. Takk kærlega fyrir mig Atli og Biggi!

Eftir átið var svo var skellt mynd í tækið, Fever Pitch með Drew Barrymore og Jimmy Fallon, leikstýrð af Farelli bræðrum. Hún var alveg ágæt en var þó oft trufluð af samræðum um Hróarskeldu og aðra hluti. Mér virðist á öllu að það þurfi ekki mjög margar ræður í viðbót um dásemdir Hróarskeldu til að sannfæra þessar stúlkur um að koma með. Ég stefni á að þekkja sex hundruð manns á næstu hátíð. Það er hellingur af fólki að fara sem ég þekki og ef ég fæ einhverju ráðið þá munu allir sem eru núna á "kannski" stiginu líka enda á hátíðinni. Enda er ekki fræðilegur möguleiki að einhver þeirra myndi sjá eftir því að fara. ;)
Maggi.

Free haircut

Síðasta þriðjudag í skólanum kom Camilla að borðinu okkar í matsalnum og spurði "vill einhver fá fría klippingu?". Ég og Bjarni samþykktum það enda vantaði okkur klippingu og auðvitað væri ekki verra að fá hana frítt! Jafnvel þótt að það væru nemendur í skólanum sem myndu klippa okkur. Við komumst þó fljótlega að því að það voru ekki nemendur sem áttu að klippa okkur heldur alvöru klippikonur, og ekki nóg með að það ætti að klippa okkur heldur átti að gera það uppá sviði fyrir framan fullt af öðrum klippikonum!!! Þegar við fréttum þetta þá var of seint að bakka með þetta og það var líka alltí lagi því þetta var bara skemmtilegt.

Þetta var kynning á vörum frá fyrirtæki sem selur allskonar vörur fyrir hárgreiðslustofur og konurnar sem klipptu okkur voru frá því fyrirtæki og konurnar sem komu til að horfa á áttu allar eða unnu á hárgreiðslustofum víðsvegar um Jótland. Þetta tók allan daginn, frá hádegi til níu um kvöldið. Sú sem sá um mig var algjör pæja og mjög skemmtileg. Hún setti í mig smá ljósar strípur og þetta var í fyrsta sinn sem ég hef fengið lit í hárið! Svo klippti hún slatta af hliðunum og svo einhverja voða þríhyrninga og ferhyrninga efst á kollinn á mér en skildi samt slatta eftir þannig að ég er nú ekki orðinn stutthærður. Svo greiddi hún mig alveg svakalega þannig að ég leit út eins og John Travolta þegar hann var uppá sitt besta í dans og söngvamyndunum! Toppurinn alveg þvílíkt hátt upp og svona. En klippingin var fín og auðvitað get ég greitt það eins og ég vill. Það var nú kominn tími á að snyrta aðeins enda hafði ég ekki farið í klippingu síðan í október.

Síðustu tvær vikur í skólanum höfum við verið að vinna að sérstöku verkefni og var það að útbúa útlit á bók sem við munum gefa út í haust. Hver nemandi fær að hanna nokkrar síður í bókinn og verður það hans portfolio. Mér finnst þetta vera mjög spennandi verkefni og það verður gaman að hanna þessar síður. Við höfum allt sumarið til þess og þurfum ekki að skila inn okkar síðum fyrr en í byrjun september. Bókin verður svo send til þeirra fyrirtækja sem við sækjum um starfsnám hjá. Hugmynd hópsins míns um að hafa eina gegnsæja blaðsíðu (svipað og bökunarpappír) var valin og það var mikil ánægja með þá hugmynd. Það gefur fólki allskonar möguleika ef það lætur ímyndurnaraflið ráða ferðinni.

Þessi helgi var frekar róleg. Á föstudaginn spiluðum ég og Birna og Lárelva á Munkegade og spjölluðum svo framá nótt. Í gærkvöldi var svo eitthvað af fólki sem hittist á Munkegade og spilaði drykkjuleikinn Jónas sem vakti gríðarlega lukku! Það var ótrúlega gaman og mikið hlegið. Svo var haldið á Pitstop þar sem einn af skólabræðrum okkar sem kemur frá Afríku spilaði afríska tónlist. Það var töluvert öðruvísi en við bjuggumst við og því fórum við frekar snemma heim. Frábær helgi engu að síður. :)
Maggi.

Veðurguðirnir...

...tóku heldur betur vel á móti Bigga og Atla um síðustu helgi. Það gerðum við líka, ég, Jóhannes Bjarni og Kristjana, og eyddum við helginni saman bæði hér í Kolding og í Horsens þar sem Jói og Kristjana eiga heima.

Á fimmtudaginn fór ég til Þýskalands með Camillu, Láru, Elvu og Rósu í bílnum hennar Camillu. Ætlunin var að kaupa bjór handa strákunum og svo endaði það með því að allir keyptu sér hellings bjór og fullt af dóti. Ég keypti þrjá kassa af bjór á 100 kr. danskar og tólf hvítvínsflöskur fyrir sama verð! Það finnst mér hrikalega ódýrt. Það gerir 90 kr. íslenskar á flöskuna! Svo um kvöldið komu strákarnir og það var mögnuð móttöku-athöfn á lestarstöðinni. Við skelltum upp partýi fyrir strákana og fórum útá líifð. Mig langaði svo mikið að eiga myndir af kvöldinu með strákunum að ég asnaðist til að taka myndavélina mína með mér út á lífið. Til að gera langa sögu stutta er hún týnd og tröllum gefin. Svona er lífið. Enn er smá sjens að hún finnist en tel ég það ólíklegt. Ég hef aldrei þorað að taka myndavélina mína með á djammið því ég er hræddur um að týna henni, og svo núna í fyrsta sinn sem ég geri það þá hverfur hún. Kaldhæðni örlaganna. En ég get engum um kennt nema sjálfum mér og ég nenni ekki að vera fúll útaf þessu. Shit happens.

Á föstudeginum vöknuðum við á hádegi og drifum okkur niðrí bæ í góða veðrinu. Við fórum með nokkrum krökkum úr skólanum í Legeparken sem er eins og nafnið gefur til kynna Leik-garður hér í bæ. Þar eru leiktæki og bekkir og útigrill og svona, og við spiluðum Boccia og fórum í bílaleik og það var hörku stuð. Seinni partinn fórum við svo til Horsens og hittum fleiri íslenska kunningja okkar. Um kvöldið kíktum við út en vorum nú ekki lengi.

Á laugardeginum röltum við um Horsens og ég og Atli keyptum okkur skó! Seinni partinn fórum við svo aftur til Kolding og gerðum okkur tilbúin fyrir pönk-partý sem finnsku stelpurnar héldu. Að sjálfsögðu þýðir þemapartý að ég fer alla leið, og ég var algjör pönkari þetta kvöld með hárið sem gadda í allar áttir! Það var magnað og vakti mikla athygli niðrí bæ. Partýið og kvöldið allt var frábært.

Sunnudagurinn var svo rólegasti dagurinn enda vorum við búin að vera á fullu síðan strákarnir stigu útúr lestinni! Þó kíktum við seinni partinn niður að Koldinghus eftir að hafa borðað íslenskar SS pylsur og flatbrauð með hangikjöti! Og já ég gleymdi að minnast á það, á föstudeginum fengum við Jói og Kristjana hamborgaratilboð af Básnum sem strákarnir komu með!! Úff hvað það var gott! :D Flest þið sem þekkið mig ættuð að vita hvað ég elska það mikið. ;)

Um kvöldið fórum við fínt út að borða á veitingastað sem heitir Bone's og fengum okkur rif, nema Kristjana sem fékk sér Hot-Wings. Maturinn var algjört æði og við gátum vart talað um annað! Þvílík snilld! Ég mæli sko með þessum stað. Svo fífluðumst við eitthvað niðrí bæ því þetta var síðasta kvöldið og við vildum ekki fara strax heim. Tekin var önnur umferð í fótboltaspili og við lékum okkur með einnota myndavélina hans Atla eftir að filman var búin. Stun-Gun anyone? Svo var eitt atvik þar sem ónefndir menn, tjah, spældu Koldingbúa með strípihneigð sinni skulum við bara segja! Hahahaha, ég hélt ég yrði ekki eldri, ég gat ekki andað úr hlátri!

En helgin tók enda og eru allir sammála um það að hún var ekkert nema frábær. Við skemmtum okkur konunglega allan tímann og ég vill þakka krökkunum fyrir komuna! Endilega komið sem oftast. Og þið sem eigið eftir að heimsækja mig, þið ættuð bara að vita hvað það er gaman að koma í heimsókn til Kolding! Það er bara ein leið að komast að því hversu gaman það er. :)

Ég fékk myndirnar sem voru teknar á myndavélina hans Jóa og ég set eitthvað af þeim á netið. Því miður hurfu allar myndirnar sem voru teknar fyrsta kvöldið því Jói var ekki með sína vél þá og mín vél týndist eins og áður segir.

Maggi.

Heimsókn!

Atli og Biggi koma á morgun! WooHooo!! :D Það verður fjör. Mikið fjör og mikið gaman. Ég ætla að vera duglegur að taka myndir eins og vanalega og þið fáið að sjá hvað var gaman hjá okkur eftir helgina! Ég og Jói fáum hamborgaratilboð frá Básnum! :D Hahahahaha!
Maggi.

PáskaKøbenMyndir

Nýjar myndir!

Ég skrifaði færslu sem Blogger ákvað að eyðileggja. Hún var greinilega ekki nógu merkileg til að birta hana hér þannig að ég nenni ekki að skrifa hana upp aftur. Biggi skrifaði einu sinni e-mail sem eyðilagðist þrisvar áður en hann náði að senda það. Hann var orðinn svo pirraður að síðasta útgáfan af e-mailinu var orðin hrikalega orðljót og leiðinleg og hann varð að marg-biðjast afsökunar á því að hafa sent það þegar hann hitti loksins viðtakandann aftur. Það var fyndið. En allavega, hér eru myndir frá því í Køben um daginn!
Maggi.

Gleðilega páska!

Nú er páskadagur og ég er fjarri heimahögum í fyrsta sinn (að mig minnir). Ekki að það sé neitt slæmt því páskarnir eru ekki mjög stór hátíð í mínum huga. Það er alveg hægt að chilla og borða páskaegg annarsstaðar en heima! Ég fékk sent Nóa Síríus páskaegg númer fimm í vikunni og það var meira að segja óbrotið! Ég gæddi mér á því áðan (náði samt ekki nærri því að klára) og málshátturinn var Iðnin eykur alla mennt. Ætli það þýði að ég sé ekki að leggja nógu hart að mér í skólanum? Naaahh...

Núna er ég staddur í Horsens hjá Jóa og Kristjönu og við erum að fara að borða páskamat! Þau voru ekki mjög sátt með málshættina sína, því þau fengu sama málsháttinn! Það eyðilagði næstum því páskana fyrir Jóa, og hann er að spá í að senda kvörtunarbréf til Nóa Síríus. Málshátturinn var Kenna má fyrr en klipið er til beins.

Á föstudaginn kom Hlynur í heimsókn til Kolding! Hann er búinn að vera í S-Ameríku í fjóra mánuði og er í Danmörku yfir helgina áður en hann fer heim. Það var rosa gaman að sjá kallinn og Jói og Kristjana kíktu líka til Kolding og eyddu deginum með okkur. Við röltum um bæinn og kíktum í bíó um kvöldið þar sem við sáum Ring 2. Hún er frekar spooky en svipuð og fyrri myndin. Meira af því sama. Svo kom ég hingað til Horsens í gær og kíkti út á lífið með Jóa og Kristjönu og íslenskum vinum þeirra. Það var mjög fínt þrátt fyrir frekar leiðinlegan endi á kvöldinu útaf ömurlegum dyravörðum með valdahroka. En það er búið að vera mjög gaman hjá okkur. Vonandi eigiði ánægjulega páskahátíð hvar sem þið eruð stödd í veröldinni!
Magnús.