Tilgangur lífsins

Pælingar, pælingar. Ég gæti eflaust aldrei gefið út bók því Páll Skúlason er nú þegar búinn að gefa út bók sem heitir Pælingar og því er það nafn frátekið. Þótt það endi kannski aldrei í bók, í mesta lagi sem setningar ritaðar á þetta blogg, þá geri ég mikið af því að velta hlutunum fyrir mér, pæla, hugsa, spá og spögulera. Ég er ekkert að ýja að því að ég sé eitthvað sérstakur með það, langt í frá. Ég býst fastlega við því að allir pæli, bara mis mikið.

Þessi færsla ætti kannski frekar að heita tilgangur mannkyns. Ég hef pælt svolítið í því undanfarið af hverju við séum á þessari jörð. Nei annars, ég get ekki orðað það þannig. Ég hef pælt í því af hverju fólk pælir í því af hverju við séum á þessari jörð.

Nú er það talin nokkuð almenn vitneskja að heimurinn "varð til" við miklahvell, sama hvort hann hafi verið til fyrir það eða ekki, fyrir ansi löngu síðan. Eftir dúk og disk varð til líf á þessum hnetti sem við búum á. Það líf þróaðist í mannskepnuna sem hófst handa við að pæla, pæla í því af hverju í ósköpunum við værum hér.

Auðvitað eru þeir til, líklegast flestir mjög trúaðir, sem trúa öðrum kenningum um upphaf heimsins, jarðarinnar og mannkyns. Allt í góðu með það. Svo lengi sem þeir skaða engan (sem er því miður ekki alltaf raunin) þá mega þeir trúa því sem þeir vilja.

En hver er tilgangurinn með þessu öllu saman? Svona fyrir okkur hin sem trúum ekki á Biblíuna eða Kóraninn. Hver er tilgangurinn með manninum og dýrunum, jörðinni, sólkerfinu, alheiminum? Mér finnst sú spurning skemmtileg og það er gaman að velta sér uppúr henni, en ég held að þeir sem komast að einhverri niðurstöðu séu strax komnir á villigötur. Af hverju þarf að vera tilgangur? Það að það sé tilgangur þýðir fyrir mér að það sé eitthvað æðra en við. Eitthvað sem veit betur, eitthvað sem "skapaði" okkur, hvort sem það var kall í skýjunum eða einhverskonar "intelligent design" eins og einhver sagði. En ekkert er æðra okkur, og ekkert er óæðra. Hlutirnir bara eru. Heimurinn varð til, við urðum til. Á sama hátt munum við hætta að verða til og heimurinn mun hætta að verða til. Það er hvorki gott né slæmt, þannig er það bara.

Ef allt mannkyn myndi deyja í dag, væri það slæmt? Segjum að öll dýr og plöntur, allt líf á jörðinni myndi deyja á sama tíma. Game over. Þýðir það að eitthvað hafi misheppnast? Að eitthvað hafi farið úrskeiðis og að við hefðum átt að geta betur? Nei, við erum ekki í tölvuleik. Það er ekkert lokaborð. Það er enginn endakall. Það er enginn sigurvegari, og enginn sem tapar. Það er líka allt í lagi. Af hverju þurfum við tilgang?

Sumir segja að tilgangurinn sé ást, nú eða hamingja. Mér finnst það göfug markmið og ég held að mannkynið eigi algjörlega að lifa eftir þeim. Það er ekki það sem ég á við hinsvegar. Tilgangurinn er ekki ást, tilgangurinn er ekki hamingja. Tilgangurinn er ekki að lifa að eilífu eða að láta mannkynið aldrei deyja út. Douglas Adams sagði að tilgangur lífsins væri 42 og tilgangur jarðarinnar væri að finna út raunverulegu spurninguna um tilganginn. Það er jafn gáfulegt svar og hvað annað. :)

Þetta á alls ekki að vera leiðinleg eða þunglynd færsla. Hún breytir í sjálfu sér ekki miklu fyrir mig eða aðra. Ég er ekki sá fyrsti sem kemst á þessa skoðun og ég verð ekki sá síðasti og ég er alls ekki að taka sjálfan mig mjög alvarlega. Ég og allir hinir munum vakna og fara framúr á morgun alveg eins og alla daga og lifa lífinu.

Hverju breytir þetta þá fyrir mér? Mér finnst þægileg tilhugsun að það er óþarfi að taka hlutina of alvarlega, eða taka sjálfan mig of alvarlega. Það er enginn sigurvegari og allir eru jafnir. Enginn er æðri en þú, og það sem er kannski mikilvægara, enginn óæðri. Allt tekur enda. Þar til það gerist, láttu þér líða vel og komdu vel fram við alla í kringum þig. :)

Maggi.

Ömurlegur dagur?

Í dag í Kaupmannahöfn er allt frekar grámyglulegt. Það er rigning, frekar kalt, og augljóst að haustið er alveg að koma og fáir eða engir sólardagar eftir í þessu sumri. Flestir kannast eflaust við að hugsa í svona aðstæðum, "Oj hvað þetta er ömurlegur dagur."

En það er ekki rétt! Eina sem er ömurlegt er manns eigin hugsun, það er ekkert ömurlegt við daginn. Maður ræður því algjörlega hvernig maður upplifir hlutina og það er ekki hægt að skella skuldinni á þennan dag. Hann er bara eins og hann er. :)

Eyrnakonfekt

Ég elska tónlist. Ég hlusta á tónlist næstum allan daginn og er duglegur að sanka að mér nýjum plötum. Ef ég heyri lag í sjónvarpsþætti, sé tónlistarmyndband sem einhver setur á Facebook, eða heyri fólk tala um hljómsveit sem það hefur gaman að þá er ég oftast snöggur að kynna mér viðkomandi tónlist. Sæki diska, les um uppruna sveitarinnar á Wikipedia og skoða tónlistarmyndbönd. Þegar ég er kominn með leið á öllu eða langar í eitthvað ferskt þá fer ég stundum á metacritic.com og sæki tónlistina sem fær bestu dómana. Meira að segja þó það sé eitthvað sem ég myndi vanalega ekki hlusta á. Stundum er það eitthvað sem er alls ekki fyrir mig en þá er enginn skaði skeður. Ég hef meira að segja tekið uppá því nokkrum sinnum undanfarið að hlusta á Hip-Hop playlista á YouTube sem ég hef haft mjög gaman að þó ég sé ekki mikil hipphoppari í eðli mínu.

Ég get ekki sagt að ég sé alæta á tónlist (eins og er svo algengt að heyra frá fólki hvort sem það meinar það eða ekki) en það er ansi margt sem ég get hlustað á. Hljómsveitirnar sem ég hlusta mest á í augnablikinu eru Arcade Fire, Fanfarlo, Edward Sharpe & The Magnetic Zeros og Beirut svo einhverjir séu nefndir. Í vor og sumar hlustaði ég mjög mikið á Bon Iver, The Temper Trap, Gorillaz, The xx og Miike Snow. Þetta er fljótt að breytast og ég verð eflaust kominn með eitthvað nýtt á fóninn þegar líður á haustið. Ég set auðvitað líka oft eldri tónlistina á fóninn, en það er svo gaman að hafa tilbreytingu í þessu og prófa eitthvað nýtt.

***

Saint Augustine of Hippo skrifaði; Dilige, et quod vis fac. Það þýðir á ensku; Love, and do what you will. Mér finnst það fallegt og mikil speki. Fyrir mér þýðir það að maður eigi að gera hvað það sem gerir mann hamingjusaman svo lengi sem maður gerir það af ást. Með öðrum orðum; þú átt að gera það sem þig langar til svo lengi sem það kemur ekki niður á hamingju annara.

***

Mig langar ekki að þetta blogg lognist alveg útaf. Ég hef skrifað hér síðan 2002 og mér þætti synd að hætta því. Ekki bara til að halda í einhverja gamla hefð heldur hef ég gaman að því að skrifa og gaman að því að lesa það seinna meir. Ég hef reyndar dottið í þá grifju eins og svo margir bloggarar að eyða of miklu púðri í upptalningu á öllu sem maður tekur sér fyrir hendur. Mig langar að minnka það töluvert, enda er allt mitt fólk á Facebook sem gæti langað að fylgjast með mér. Það er miklu skemmtilegra að blogga um vangaveltur um hitt og þetta, ákveðin efni (eins og tónlist t.d.) eða ákveðna atburði sem gaman er að segja frá.

Svo ég geri nú samt upp sumarið sem var gersamlega bloggsnautt þá skemmti ég mér konunglega. Fór fyrst á Hróarskeldu sem var hreint út sagt æðisleg, flutti inní nýja íbúð á kollegíinu, fór beint til Íslands á ættarmót á Ísafirði, hélt afmælisbústað, fór í eins árs afmæli, fór í þrefalt afmæli á bát, fór á fáránlega skemmtilega Þjóðhátíð í Eyjum, heimsótti pabba á Akureyri, fór í innflutningspartý, fór í tveggja ára afmæli, fór á bjórþróttamót, fór í brúðkaup, átti besta bæjardjamm í manna minnum, púttaði með afa, spilaði Wii með Bigga, spilaði fótbolta með strákunum, heimsótti systur mínar, knúsaði allar litlu frænkurnar og frændana, kynntist nýju frábæru fólki, bjó til besta bragðarefs-kombó sem um getur og svo miklu miklu fleira. Haustið hefur líka byrjað með trompi með Hot Chip tónleikum, öðru brúðkaupi (þar sem ég mætti í vitlausa kirkju ásamt fleirum), Klakamóti í Svíþjóð og fleiru. Nú þarf ég bara að komast á skrið í að skrifa Mastersritgerðina mína og klára skólann með stæl.

Bless kex!
Maggi.

Hvað gerðist?

Það væri kannski fyrsta setningin hjá mér ef ég myndi vakna úr dái. Bloggið mitt hefur verið í dái í einhverja mánuði, og að sumu leyti ég líka. Það er kannski kominn tími til að vakna!

Ég lenti inná eldgömlum færslum á þessu bloggi áðan. Fyndið að lesa um það sem maður var að hugsa fyrir sex sjö árum síðan. Skrítið að segja frá því, en ég saknaði mín svolítið. Ég hafði ekki hugmynd um hvað ég vildi, var nýhættur í H-skólanum og vissi ekkert í minn haus. Eitthvað var ferðabakterían farin að segja til sín og ég var á leiðinni á mína fyrstu Hróarskeldu. Ég var yngri, vitlausari, óheflaðri og hressari! Ég held ég hafi yfir höfuð verið mjög hress á þessum tíma. Ég er ekki að segja að ég sé dauður úr öllum æðum núna, en það er líklega óumflýjanlegt að maður róist aðeins með árunum. Nú hljóma ég eins og ég sé helmingi eldri en ég er, en ég býst við að margir hafi einhverntíman hugsað eitthvað svipað. :)

Maður er þó ekki orðinn of gamall fyrir Hróarskeldu! Ég á reyndar enn eftir að kaupa mér miða en það stefnir allt í að ég sé að fara á mína sjöundu hátíð. Ég fór samfleytt frá 2003 til 2008. Svo tók ég mér eitt ár í pásu og ætla að mæta aftur og endurnýja kynnin við þessa æðislegu upplifun. Eftir fyrstu hátíðina mína sagði ég hverjum sem vildi heyra að ég ætlaði að fara tíu ár í röð. Aldrei bjóst ég þó við því að ég myndi komast svona nálægt því!

Það skal engan að undra en ég er farinn að gæla við tilhugsunina um að fá mér iPad. Ég er ekki að ljúga því að sjálfum mér að ég þurfi að eignast slíkt tæki, en það breytir því ekki að mig langar í það! Ég held að ástæðan sé 50% tækjafíkn og 50% forvitni. Ég er nefnilega mjög forvitinn hvort ég myndi falla í hinn stóra hóp fólks sem segir að iPad sé búinn að taka yfir 90% þeirra verka sem fólk notar tölvuna sína í. En eins og ég segi, ég hef enga þörf fyrir þetta, mann langar bara alltaf í nýtt dót.

Ég fékk mér reyndar nýtt Apple dót um daginn! Ég keypti mér Magic Mouse í fríhöfninni á Íslandi. Þetta er fínasta mús og ég er bara nokkuð sáttur með hana. Ég hikaði lengi vel við að kaupa svona, en það virðist bara enginn annar músaframleiðandi skilja að það er hægt að gera Bluetooth mús sem er stærri en eldspýtustokkur. Það er mjög gaman að skrolla (kann ekki að segja það á góðri íslensku) með nýju músinni, það virkar svipað og í iPhone (og iPad). Skrollið nær ákveðinni ferð og stoppar rólega eins og eitthvað sem rúllar og hægir svo á sér. Mér finnst að þetta ætti að vera möguleiki í öllum músum og snertiflötum (e. trackpads). Kannski taka fleiri þetta upp. Jæja venjulegt fólk fer að fara á fætur þannig að kannski ætti ég að fara að sofa! :)

..:: maggiPad ::..

Kristjánshöfn

Þá er austurríska ævintýrinu lokið. Síðustu dagarnir okkar áður en við fórum aftur til Danmerkur voru heldur betur viðburðaríkir. Við fórum á handboltaleik, fórum á skíði og héldum partý eins og ég minntist á í síðustu færslu. Ég fékk skíðabakteríu eftir að við fórum á skíði og við ákváðum að nýta tækifærið fyrst skíða-útsölurnar voru byrjaðar og kaupa handa mér skíði! Þannig að við skelltum okkur til Linz og ég fékk mér svaka flottar græjur á hálfvirði, og ég hlakka ótrúlega mikið til að fara til Akureyrar um páskana og prófa þær. Við nýttum ferðina til Linz vel því við skelltum okkur líka á Ars Electronica safnið með Hannesi og það var virkilega skemmtilegt. Með skemmtilegri söfnum sem ég hef komið á.

Eftir þessa viðburðaríku viku tók við helgi sem var undirlögð verkefnavinnu. Við þurftum að klára stóra verkefnið okkar og áttum ansi mikið eftir. Einu pásurnar sem við tókum voru til að horfa á undanúrslitaleikinn við Frakkland í EM, og úr því að við töpuðum honum þá lentum við á móti Póllandi í leiknum um þriðja sætið. Það var lán í óláni hjá okkur því Rafa l vinur okkar er frá Póllandi og okkur langaði mikið að horfa á Ísland - Pólland einu sinni í keppninni. Við horfðum á leikinn hjá Rafal og það var mjög gaman, sérstaklega af því að við unnum! :)

Okkur tókst að klára verkefnið okkar og eftir helgina sýndum við kennaranum okkar það. Við fórum líka á tvær aðrar kynningar á verkefnum og þær tókust bara vel. Við tókum semsagt engin próf heldur áttum bara að skila verkefnum í öllum áföngunum. Svo voru öll verkefnin sýnd á sérstökum kynningum og við fengum spurningar frá kennurunum og nemendum um vinnslu verkefnisins. Við misstum þó af þremur kynningum því við þurftum að koma okkur aftur til Danmerkur og byrja á næstu önn. Við þurftum að kveðja alla nýju vini okkar sem var frekar sorglegt, en vonandi munum við hitta þau flest aftur. Við vitum í það minnsta að bestu vinir okkar úr Hagenberg munu koma til Danmerkur eða Íslands einhvern daginn, en suma mun maður aldrei hitta aftur.

Áður en við flugum frá Austurríki stoppuðum við tvo daga í Vín hjá Mandý og fjölskyldu. Það var gaman að fá að hitta þau einu sinni í viðbót, við áttum heldur betur margar góðar stundir með þeim í Vín og Nóru og fjölskyldu í Passau á önninni. Á föstudeginum 5. febrúar flugum við svo til Danmerkur. Við vorum með hvorki meira né minna en níu töskur og eitt par af skíðum! Það var frekar skrautlegt að taka lestina uppá flugvöll, við tvö að drösla tíu hlutum með okkur. Við vorum þó búin að borga fyrir töskurnar fyrirfram þannig að við þurftum enga auka yfirvikt að borga. Reyndar stálumst við með allt of mikinn handfarangur, en það slapp einhvernvegin fyrir horn. :)

Það er voða gott að vera komin aftur í íbúðina okkar. Við þurftum að flytja allt dótið okkar aftur heim, því það var í geymslu hjá Jóa og Rakel, og það tók nokkra daga að koma okkur fyrir aftur. Fyrstu dagarnir, og því miður vikurnar, fóru í að skrifa skýrslur um önnina okkar fyrir skólann hér í Köben. Við þurftum að gera eina skýrslu um verkefnin sem við unnum og aðra um aðstæðurnar í Hagenberg.

Um miðjan mánuðinn héldum við svo partý sem var hálfgert afmælispartý fyrir Birnu sem átti afmæli fyrr í mánuðinum. Við buðum íslensku vinum okkar og vinum okkar úr Medialogy líka. Það var mjög vel heppnað og eiginlega ótrúlegt að engir nágrannar hafi kvartað! :)

Ég er búinn að kaupa mér mánaðarkort í líkamsrækt, og sú líkamsrækt snýst ekki um að lyfta lóðum eða hlaupa á hlaupabretti. Ég get valið milli þess að fara í Kickboxing, Jiu Jitsu, Rosstraining, Kettlebells eða Mixed Martial Arts. Ég er búinn að prófa nokkra mismunandi tíma og þetta er hörku fjör, sérstaklega þar sem ég fer þarna með Jóa og Andrési sem drógu mig með í þetta. Ég er allur marinn og blár og rispaður, en það er bara partur af programmet. Vonandi kemst maður í ágætis form við þessi læti.

Það eina sem við eigum að vera að hugsa um núna er að koma mastersverkefninu okkar á skrið, en það hefur gengið mjög hægt svona til að byrja með. Það er bara allt of gaman að búa í Köben! Þetta reddast samt allt vonandi einhvernvegin, það gerir það vanalega. :)

Myndin efst í póstinum er tekin hér á Christianshavn á miðnætti fyrir viku síðan. Það var mjög fallegt og stillt veður og ég ákvað að fara út með þrífótinn og myndavélina og taka nokkrar myndir. Útkoman er á flickr.

Maggi.

Hálfleikur

Ísland er að vinna Noreg með tveimur mörkum þegar þetta er skrifað. Vonandi vinnum við þennan leik og komumst í undanúrslit! Það væri geggjað. Við Ósk fórum á leik um daginn, sáum Ísland - Austurríki hér í Linz. Það var virkilega gaman þrátt fyrir að hafa misst unnin leik úr höndunum á okkur á síðustu mínútunni. Það var samt gaman að sjá austurrísku áhorfendurna tryllast þegar boltinn lak í markið í lokin, þakið ætlaði að rifna af!

Þetta er ekki það eina sem við erum búin að gera undanfarið, við erum búin að vera ótrúlega iðin, bæði í skólanum og utan hans. Við fórum á skíði á eitt af flottustu skíðasvæðum Austurríkis. Vá hvað það var flott. Endalaust margar brekkur, kringum 40 lyftur, aldrei biðraðir, góður snjór og við fengum mjög gott veður. Það besta var þó eiginlega útsýnið, því hvert sem maður leit sá maður ótrúlega falleg fjöll og snævi þakta skóga. Þetta var ævintýri líkast. Því miður gátum við bara verið þarna einn dag. Ég væri mikið til í að fara í skíðaferðalag hingað einhverntíman seinna, og hitta þá austurrísku vini okkar í leiðinni.

Sama dag og við fórum á skíði var haldið Bad Taste partý í skólanum. Þemað þýddi að allir áttu að klæða sig eins asnalega og mögulegt var. Við Ósk höfðum keypt okkur föt sérstaklega fyrir partýið. Við eyddum þó ekki miklum pening því þetta voru ljótustu fötin sem við fundum á útsölu í H&M. Það var mjög gaman í partýinu þrátt fyrir að við höfum verið virkilega þreytt eftir skíða-ævintýri dagsins.

Við héldum líka partý, það fyrsta og síðasta sem við höldum hér í Hagenberg. Það var fyrir skiptinemana vini okkar og það var mjög vel heppnað. Við spiluðum og drukkum og spjölluðum og skemmtum okkur mjög vel. Þetta er mjög skemmtilegt fólk frá hinum ýmsu löndum hér í Evrópu. Vonandi eigum við eftir að hitta einhver þeirra aftur.

Það er margt annað búið að gerast en leikurinn er að byrja aftur og ég klára að segja frá síðar! ÁFRAM ÍSLAND! :D

Maggi.

Þotuliðið

Í dag eru 24 dagar þar til við förum aftur til Danmerkur. Við eigum s.s. flug frá Vín til Köben þann 5. febrúar! Reyndar byrjar önnin okkar 1. febrúar í Danmörku en tæknilega séð er önnin okkar hérna ekki búin fyrr en 11. febrúar eða jafnvel seinna, þannig að við þurftum að gera smá málamiðlun. Missa smá af hvorri önn. Við þurfum ekki að taka nein próf hér úti þannig að það skiptir ekki öllu máli. Við tökum próf þegar við komum aftur til Danmerkur.

Fyrst maður er að nefna dagsetningar á fullu þá er hægt að minnast á að við erum líka búin að bóka flug til Íslands! Þann 23. mars förum við til Íslands og verðum í þrjár vikur! Við ætlum að nýta tímann og vinna að verkefninu okkar, sem er mjög gott að gera á Íslandi (ef maður er að vinna í samvinnu við íslenskt fyrirtæki) og það spillir ekki fyrir að páskarnir eru akkúrat á þessum tíma! Slá fullt af flugum í einu höggi.

Það gengur vel hjá okkur Jóa, við erum enn að pósta einni mynd á dag á Tumblr síðurnar okkar. Ég (eða öllu heldur nördinn í mér) bætti litlum glugga við hér til hægri á síðunni þar sem sjá má nýjustu myndina sem ég setti inn. Sumir skilja ekkert í mér að þurfa að tengja allt svona saman, en ég hef bara gaman að því. Það skaðar í það minnsta ekkert að hafa þetta þarna. :)

Mig langar að benda á bloggið hennar Óskar, hún skrifaði svaka annál um árið 2009 með myndum og vídjóum og alles. Ég ætla ekki að gera slíkt hið sama heldur læt hennar annál nægja, við gerðum hvort sem er nokkurnvegin nákvæmlega það sama. :)

Maggi.

Jólin og nýtt ár

Þessi jól og áramót voru öðruvísi en áður. Í stað þess að fara til Íslands vorum við Ósk hér í þýskumælandi löndunum með systrum Óskar og fjölskyldum þeirra. Fyrst fórum við til Nóru og fjölskyldu í Passau í Þýskalandi, rétt við landamæri Austurríkis, og vorum þar í tæpa viku. Þar héldum við jólin hátíðleg og höfðum það virkilega gott. Við komum með risa ferðatösku með okkur fulla af pökkum, bæði pökkum frá okkur til fjölskyldnanna tveggja sem voru með okkur og pökkum til okkar frá Íslandi. Maður hefði haldið að fyrst við vorum ekki á klakanum þá fengjum við töluvert færri pakka en vanalega en sú var nú ekki raunin! Ég bjóst líka við því að sakna matarins á Íslandi meira, en við fengum svo gott að borða að það var lítill tími til að velta sér uppúr hangiketsleysi. :)

Planið hafði svo verið að kíkja á skíði með Hannesi og Helenu en úr því að það rigndi svo mikið fyrir jólin að það var voða lítill snjór og við ákváðum að fresta því. Í staðinn fyrir það kíktum við á heimaslóðir Helenu nálægt Salzburg. Salzburg er virkilega flott borg og gaman að heimsækja hana. Við sáum flottustu byggingarnar, borðuðum ekta austurrískan mat og fórum á geggjaðan útýnisstað þar sem við sáum yfir alla borgina.

Yfir áramótin vorum við svo í Vín hjá Mandý og fjölskyldu. Þar héldu veisluhöldin áfram, fengum rosa gott að borða, þ.á.m. súkkulaði-fondu í fyrsta sinn sem var rosa gott. Það var meira sprengt af flugeldum í Vín en við áttum von á, og á miðnætti dönsuðum við vals. Það er hefð í Austurríki, allar útvarpsstöðvarnar spila vínarvals og allir dansa heima í stofu eða hvar sem þeir eru. Áður en við fórum heim aftur til Hagenberg skelltum við okkur öll saman á skauta sem var voða gaman. Við Ósk fórum líka í bíó að sjá Avatar sem var mikil upplifun að sjá í 3D.

Við Jói ákváðum að fara í smá keppni sem byrjaði um áramótin. Kannski er betra að kalla það tilraun. Það snýst um að taka eina mynd á dag og setja hana á netið. Jói er líka kominn með iPhone og því er það frekar lítið mál, bara spurning um að muna eftir þessu. Við notum Tumblr bloggþjónustuna til að pósta myndunum. Ég sett líka hlekk á nýjustu myndina hér til hægri á síðunni.

Myndasíða Magga

Myndasíða Jóa

Ég er líka kominn með nýtt kommentakerfi hér á síðuna. Haloscan hætti og vildi láta mann borga fyrir nýja þjónustu og því fór ég yfir til Disqus. Ekki vera feimin við að nota nýja kerfið! ;)

Nú erum við komin aftur til Hagenberg og lokatörnin er er hefjast. Við förum aftur til Danmerkur þann 5. febrúar. Við erum líka komin með flug til Íslands um páskana! Allt að gerast.

Maggi.

Tilraun

Smá tilraun. Ég sit við eldhúsborðið og skrifa þetta blogg. Það væri svosem ekki í frásögur færandi nema að tölvan mín er á sófanum, u.þ.b. þrejá metra frá mér. Þetta er ekki mont yfir því að eiga þráðlausts lyklaborð, heldur tilraun í því hversu vel mér gengur að skrifa án þess að ruglast. éÉg ætla að senda færsluna án þess að leiðrétta hana. Venjulega er ég frekar smámunasamur gagnkvart málfari og stafsetningu á blogginu mínu, ég veit ekki af hverju það nú er. Úff nú er ég að ruglast þvílíkt, jæja, það verður að hafa það. Vá, þetta á eftir að verða ein leiðinlegasta færsla sem ég hef skrifað. Það er kannski ágætt því það endurspeglar daginn minn, hann var grútleiðinlegur. Þessi helgi verður þó vonandi betri.

Á morgun er partý á skólabarnum. Þar munu spila tvær hljómsveitir og það verður eflaust gaman. Á sunnudaginn er svo planið að fara til Vínar og hitta Ósk sem kemur frá Íslandi, og auðvitað Mandý og fjölskyldu. Á mánudaginn á Ósk svo afmæli! Stór-afmæli meira að segja, hún verður aldarfjórðungs gömul. Kannski við nýtum tímann og kíkjum á jólamarkaðina í Vín og jafnvel á ljósmyndasýningu, hver veit?

Jæja, best að hætta þessu. Ég ætla að lesa yfir það sem ég skrifaði. Kannski er skemmtilegra að ég leiðrétti villurnar og segi frekar í lokin hvað ég gerði margar? Sjáum til, ég skrifa bara eftirmála um þessa glötuðu tilraun. :)

Maggi.

E.s: Þetta var bara ekki svo slæmt! Villurnar fá að standa. :p

Fjögur ár

Það er aldeilis að mér finnst gaman að setja tölur í titilinn á bloggfærslunum mínum. Í dag erum við Ósk fjögurra ára! Til hamingju með daginn okkar Óskin mín! ;) Það var 1. desember 2005 sem við byrjuðum saman þótt við værum sitt í hvoru landinu. Það er því kannski viðeigandi þótt það sé mjög svekkjandi að við séum ekki í sama landinu á þessum degi. Nei, það er ekkert viðeigandi, það er bara svekkjandi. En það líður ekki að löngu þangað til Óskin kemur aftur til mín og þá getum við fagnað saman. Ekki spillir fyrir að um leið og hún kemur heim þá á hún 25 ára afmæli sjálf! Það verður gaman og ég er farinn að hlakka mikið til.

Í dag fór ég til Linz í bíó þar sem voru sýndar stuttmyndir eftir nemendur í skólanum mínum í Hagenberg. Margar þeirra voru mjög flottar en því miður voru þær flestar á þýsku þannig að ég skildi ansi lítið. Við kíktum líka á jólamarkaðinn í miðbænum og á finnskan jólamarkað hvorki meira né minna! Við fórum þangað með finnskum vini okkar og hann spjallaði við allt sölufólkið á finnsku. Frekar súrealískt því maður býst ekki við svo norrænni stemmningu í Austurríki. Þetta er víst markaður sem ferðast um Austurríki (og kannski Þýskaland, man ekki alveg) en var að koma til fyrsta skipti til Linz. Ég smakkaði Gluhwein (heitt jóla-vín) og finnskan grillaðan lax sem var mjög gómsætur. Ég verð nú líka að koma því að að í dag keypti ég mér úlpu í dag, bara af því að hún var á 85% afslætti! Hún er reyndar mjög þægileg og ágætlega flott, en ég keypti hana aðallega útaf afslættinum. Gerir það mig að nýskupúka?

Maggi fjögurra ára og 10.000 daga gamli.

Níuþúsundníuhundruðníutíuogníu

Í á morgun er ég tíu þúsund daga gamall. Það þýðir að í dag er ég 9.999 daga gamall! :D Ég veit ekki af hverju það er skemmtilegt, en það er það samt. Ef þú ferð á WolframAlpha.com og slærð inn fæðingardaginn þinn (t.d. "July 16th 1982") þá getur þú sérð hvað það eru margir dagar síðan þú fæddist. Passaðu þig ef þú notar 8.10.1982 þá túlkar leitarvélin það sem tíunda ágúst en ekki áttunda október. Þetta er nefnilega ameríska kerfið. :) Annars er þetta ótrúlega sniðug vél. Maður getur látið reikna fyrir sig samanburð á allskonar hlutum. Prófaðu t.d. að gera "Iceland vs. Denmark". Þá færð þú tölulegan samanburð á þessum tveimur löndum.

Maggi.

Sítrónukjúklingur

Ég prófaði að elda sítrónukjúkling í fyrsta sinn í kvöld. Við fengum svo svakalega góðan kjúkling hjá Mandý og Franz um daginn að ég varð bara að prófa. Hann varð ekki eins góður hjá mér og hjá þeim en nokkuð góður var hann samt! Mæli með þessu. Leitið bara að "sítrónukjúklingur" á Google og þið fáið fullt af uppskriftum. Finnið eflaust eitthvað sem ykkur finnst hljóma vel. Ég gerði heilan kjúkling en auðvitað er hægt að gera kjúklingabita eða bringur. Mér finnst mjög gaman að elda kjúkling, og þá sérstaklega heilan kjúkling. Ég veit ekki af hverju, ætli ástæðan sé ekki einfaldlega að hann er oftast svo góður á bragðið! Svo er ekki verra að eiga afgangs kjöt og búa til eitthvað gott úr því. :)

Annars er ég einn í kotinu þessa dagana og það er óttalega skrítið eitthvað. Við Ósk erum vön að vera svo mikið saman að þetta eru mikil viðbrigði! Það verður eflaust minna einmannalegt þegar vinnuvikan hefst og ég mæti í skólann.

Magg1.

Á eftir 1000 kemur 700

Ég rak augun í það á Blogger að þessi færsla mín er númer 700! Það er svolítið mikið. Sjö hundruð sinnum hef ég sest niður og skrifað bloggfærslu fyrir þetta blogg. Ég var mun afkastameiri á árum áður, en það hefur nú oftast verið eitthvað líf á þessari síðu. Það eru 2581 dagar síðan ég stofnaði bloggið og skrifaði fyrstu færsluna. Hún hljómaði svo:

Hellúú. Ég ákvað að búa til mitt eigið blogg just 4 the fun of it! Gaman að þessu. Ætla að reyna að samtvinna þetta eitthvað við heimasíðuna mína og uppfæra reglulega (yeah right!). En hver veit, kanski býr í mér lítill athafnamaður sem langar að láta listræna útrás sína blómstra hér á þessari forlátu síðu. Sem verður uppfull af flash dóti áður en langt um líður! Sjáðu bara til!
Kveðja, Maggi.

Ég stóð við orðin mín og setti fullt af Flash-dóti inná síðuna, en það skraut var tekið niður fyrir löngu. Þegar þetta var skrifað var ég nýhættur í verkfræðinni í H-skólanum og farinn að velta því fyrir mér að kíkja í heimsspeki. Mikið vatn hefur runnið til sjávar síðan þá! Heldur betur. Eftir rúmt hálft ár verð ég búinn með masters gráðuna mína og árið 2002 hefði ég ekki getað giskað á í hverju hún er! Reyndar geta flestir sem þekkja mig í dag ekki heldur sagt í hverju hún er, en það skiptir kannski ekki öllu máli. :)

Kannski fer ég með sögu bloggsins míns þegar ég er búinn með 1000 færslur eða bloggið verður tíu ára. En bloggið er nú bara sjö ára og færslurnar eru bara 700. Þess má til gamans geta að það hafa að meðaltali liðið 3.7 dagar á milli færslna hjá mér (eða reyndar 3.6871) þannig að mér finnst ég bara hafa verið nokkuð iðinn! Hundrað færslur á ári eða svo. Hvað ætli ég endist lengi hérna? Verð ég ennþá að blogga eftir sjö ár í viðbót? Verður fólk kannski búið að gleyma hvað blogg er eftir þann tíma? Maður spyr sig.

Maggi.

1000

Þegar ég fer út að hlaupa þá er ég með símann minn í hönd og hlusta á tónlist. Mér finnst mjög skemmtilegt þegar ég er með hann stilltan þannig að ég hlusti á lög af handahófi og Chariots of Fire spilast. Þá líður mér eins og ég ég að klára síðustu 500 metrana í 100 kíómetra ofur-maraþoni og áhorfendur hvetji mig áfram. Sannleikurinn er því miður sá að ég silast áfram af því að ég er ekki í formi, en ekki af því að ég er búinn að hlaupa í tíu klukkutíma. Ég rétt næ að hlaupa fjóra eða fimm og þá er það komið gott. Ég hef farið allt of sjaldan út að hlaupa hér í Hagenberg. Það má telja skiptin á fingrum annarar handar... á manni sem er bara með tvo putta á hvorri hendi. Í bæði skiptin sem ég fór hljóp ég mjög skemmtilegar leiðir, það er svo margt flott að sjá hérna í kring. Það er synd að lang flesta daga sér maður bara “stóru” götuna sem við löbbum í skólann.

Um helgina sáum við reyndar aðeins meira af bænum þegar Nóra systir Óskar og Matti maðurinn hennar komu í heimsókn með dætur sínar þrjár, Nínu Dís, Emilíu Ósk og Önnu Sóleyju. Þá fórum við í göngutúr og fundum flottan leikvöll fyrir aftan grunnskólann í bænum. Það er gaman að systur Óskar búi svona nálægt, þá er dvöl okkar hér einhvernvegin ekki jafn fjarri heimahögunum og hún hefði annars verið.

Í dag þegar við vorum rétt ókomin heim úr skólanum sáum við flugvél á lofti. Það var þota sem skildi eftir sig rák á himninum. Það væri í sjálfu sér ekki í frásögur færandi nema að við sáum aðra. Og svo aðra. Og aðra. Og aðra. Og aðra. Og aðra. Og aðra. Átta flugvélar á lofti sáum við á sama tíma! Allar skildu þær eftir sig rák þannig að þetta voru allt saman stórar vélar. Við sáum meira að segja eina rák í viðbót en við töldum hana ekki með því hún var gömul og við sáum ekki flugvélina sem bar ábyrgð á henni.

Í kvöld (þriðjudag) buðum við Hannesi og Helene í mat. Við bökuðum handa þeim pítsur og gerðum franska súkkulaðiköku í eftirrétt. Ekki leiðinlegt að koma í heimsókn til okkar! Við hittumst iðulega á þriðjudögum og horfum saman á nýjustu þættina af How I Met Your Mother. Í Ameríkunni eru ansi margir góðir þættir sýndir í sjónvarpinu á mánudagskvöldum sem þýðir að við sem nálgumst þá á netinu höfum nóg að gera á þriðjudögum. Við fylgjumst líka með House, Dexter og Desperate Housewives. Við fylgjumst líka með fleiri þáttum en þetta eru bara þeir sem eru á mánudögum!

Við horfum ansi mikið á þætti í tölvunni. Það kemur líka fyrir að við horfum á þýskt sjónvarp þrátt fyrir að við erum ekki með neitt sjónvarp! Hannes lánaði okkur nefnilega tæki sem heitir EyeTV. Það er pínulítið loftnet sem tengist við tæki sem er eins og USB lykill. Á loftnetinu er segull þannig að maður getur sett það á hvaða hlut sem er úr járni, t.d. ofn, og þá virkar það eins og risa loftnet. Mjög sniðugt. Útsendingin er stafræn og því mjög skýr! Það er verst að ég er ekki með nægan grunn í þýsku til að geta skilið hvað er í gangi. Ég hef þó verið að læra þýsku með því að nota forrit sem Hannes reddaði okkur (já, Hannes er reddarinn okkar því hann er með mjög hraða nettengingu!) sem heitir Rosetta Stone. Með því get ég talað við tölvuna og hún segir mér hvort ég sé að bera þýskuna rétt fram. Maður lærir líka orðaforða, málfræði og nokkurnvegin allt sem maður þarf til að kunna tungumál! Auðvitað gerist það ekki á einum degi, en einhversstaðar verður maður að byrja. Ég er líka í þýskutímum á hverjum miðvikudegi, sem er bara nokkuð skemmtilegt. Ósk prófaði að mæta með mér í fyrsta tímann en eins og við var að búast þá var námsefnið of auðvelt fyrir hana, hún hefur jú lært þýsku og búið í Þýskalandi.

Við söknum þess að búa í Kaupmannahöfn. Auðvitað söknum við Íslands og allra heima á klakanum, en það er alltaf þannig. Það er óvanalegt að við söknum þess að búa í Kaupmannahöfn, nú einfaldlega vegna þess að við erum vön að vera þar! Ætli við séum ekki að átta okkur á að við munum sakna þess að vera þar þegar við flytjum heim til Íslands. Það er margt gott við að búa þar, íbúðin okkar er frábær, við eigum góða vini, borgin er falleg og vingjarnleg (oftast), og veðráttan er voðalega passleg. Ekki of heitt á sumrin og ekki of kalt á veturna. Ef bangsamamma ætti að velja sér borg til að búa í þá myndi hún eflaust velja Köben og Gullbrá myndi pottþétt elta hana þangað.

Við erum mikið að vinna með After Effects þessa dagana, sem mér finnst ekki leiðinlegt! Að vísu erum við mest að stússast í að laga stop-motion myndbandið sem við gerðum, sem þýðir að það er mikil handavinna og ekki mjög skapandi, en það er samt skemmtilegt því After Effects er alveg frábært forrit. Það eru svo margir möguleikar í því til að vinna með hverskyns mynbönd. Mig langar að kunna miklu meira á það. Alltaf þegar ég læri eitthvað nýtt fæ ég á tilfinninguna að ég sé bara að klóra í yfirborðið af því sem er hægt. Nú þurfum við að fara að sinna stóra annarverkefninu okkar betur, sem þýðir að við verðum að vinna með Maya. Svo þurfum við fljótlega að fara að ákveða hvað við ætlum að vinna með í stóra lokaverkefninu okkar á næstu önn! Það styttist heldur betur í annan endann á þessu námi okkar. Bara sjö og hálfur mánuður eftir! Alveg magnað.

Jæja Fjóla, þá er þetta komið gott. Ég ætla ekki að biðja um aðra áskorun því ég held að enginn myndi lesa bloggið mitt ef ég myndi skrifa færslu sem væri tvöþúsund orð, en samt fjallaði ekki um neitt. ;)

Maggi.

Föstudagurinn þrettándi

Klukkan er 21.21 föstudaginn þrettánda nóvember, tvöþúsundogníu.

Ég er hræddur um að Fjóla væri ansi reið ef ég myndi ekki blogga í dag, það eru komnir níu dagar síðan ég bloggaði síðast og hún var búin að heimta a.m.k. tíu mínútna blogg innan við tíu dögum síðar. Þannig að hér er bloggið Fjóla! :)

Í dag var ég að teikna í skólanum, og ég er ekki mjög góður í því. En það snerist sem betur fer minna um að teikna vel og meira um að teikna rétt. Við vorum í hand-drawn animation tíma. Það fóru ansi margar arkir í að teikna bolta sem skoppar og snæri sem sveiflast, allt eftir kúnstarinnar reglum. Við höfum reyndar lært svipaða hluti áður en nú fáum við meiri tíma til að spreyta okkur og með betri græjur en í skólanum okkar í Danmörku. Allir fengu sitt eigið hvíta hálfgagnsæja teikniborð og fyrir aftan það skein ljós þannig að auðvelt var að sjá síðustu teikninguna gegnum blaðið. Þannig teiknar maður hverja teikninguna af annarri og reynir eftir fremsta megni að setja rétt bil á milli og teygja, toga og sveifla hlutnum í rétta átt. Á morgun höldum við svo áfram með því að teikna öldur. Þegar öldurnar eru tilbúnar eigum við að teikna bát sem skoppar á öldunum. Ef við getum eigum við að teikna mann sem skoppar í bátnum. Ef það reynist auðvelt eigum við að láta hatt skoppa á hausnum á honum! Þannig að það eru orðin ansi flókin sambönd milli allra þessara hluta. Reyndar langar mig svolítið að gera flöskuskeyti frekar en bát, og láta skeytið hoppa uppúr flöskunni. Kannski fæ ég aðra hugmynd á morgun sem verður ennþá skemmtilegri.

Að flestu leyti er skólinn hérna skemmtilegur. Þótt við séum ekki bara í tímum sem okkur langar að vera í (suma þurftum við að taka til að fá nægilega margar einingar) þá eru verkefnin í þeim flestum alveg ágæt, og kennararnir mjög fínir. Það var mjög gaman að prófa að taka upp green-screen myndband, og gaman að vinna með þau vídjó. Það var ennþá meira gaman að gera stop-motion mynd með brúðu sem við bjuggum til. Hún var um fótboltakall sem var frekar óheppinn. Ég set þá mynd hér á bloggið þegar við erum búin að vinna alla eftirvinnsluna.

Ósk er að hlusta á jólalög! Ég veit ekki alveg hvað mér finnst um það, það er frekar kósí, en nóvember er ekki einu sinni hálfnaður og það er ekki farið að snjóa ennþá hjá okkur! Hún vildi meina að ég væri bara heppinn að hún væri ekki byrjuð fyrr, og kannski er það rétt hjá henni.

Við bökuðum muffins áðan. Nammmm þær eru góðar og eru fullkomið nesti fyrir morgundaginn þar sem við þurfum að vera í skólanum frá níu til fimm að teikna. Þetta er eini laugardagurinn alla önnina sem við þurfum að vera í skólanum. Næsta laugardag er svaka ball í skólanum, allir að dressa sig flott og svona. Það er haldið í kastalanum hér í bænum. Jebb, þótt bærinn sé ekki stór þá er kastali og allt. Áður en ballið er, á fimmtudaginn, er partý í skólanum. Það eru mjög reglulega skólapartý hérna, og iðulega er þema. Þemað núna næst er Ninjas vs. Pirates. Virkilega nördalegt, en ekki jafn nördalegt og síðasta þema. Þá var þemað "Hello World!". Þeir skilja sem hafa einhverntíman forritað eitthvað.

Fólkið sem býr á efri hæðinni er ekki búið að vera heima í marga daga, sem er ekki nógu gott því þá getum við ekki borgað leigu! Það er sonur hjónanna sem eiga húsið sem býr hér fyrir ofan með kærustunni sinni, og hann á að taka á móti leigunni frá okkur. Vonandi verður okkur ekki hent út fyrir að vera lélegir leigjendur.

Hahaha, Ósk var að segja mér að Fjóla hefði verið að minna á áskorunina á Facebook. Ég var byrjaður og allt saman áður en hún minnti á þetta! Ég stend við mitt. Núna er ég meira að segja búinn að röfla í heilar sextán mínútur! Ætli þetta sé ekki komið gott. Þessi færsla er farin að minna á þegar ég skrifaði eins langa og leiðinlega færslu og ég mögulega gat til að tjékka hverjir nenntu að lesa hana til enda. Ég fékk nokkur komment frá óánægðum lesendum sem þrjóskuðust til að lesa hana til enda! Haha! Ég get verið svo fyndinn.

Klukkan er 21:39, föstudaginn þrettánda nóvember, tvöþúsundogníu.

Jæja Fjóla, hver er næsta áskorun? ;)

Magnús bróðir.

Á leið í þýskutíma

Klukkan er 17.53.

Þetta verður stutt færsla því þýskutíminn minn byrjar eftir sjö mínútúr! Það var svaka stuð í Búdapest, myndir á facebook á morgun. Við fórum í heimsókn til Nóru og co. í Passau um sl. helgi og það var svaka næs! Gerðum ekkert í tengslum við Halloween í fyrsta skipti í nokkur ár. Í kvöld er Trailer-night í stærsta salnum hér í skólanum. Hannes vinur okkar sér um það, þar mun fólk hittast og drekka bjór og horfa á svosem eins og 100 bíómynda-treilera, eða stiklur eins og ég held að það heiti á íslensku. Það verður eflaust gaman, en maður verður eflaust steiktur á því að fá svona mikið af upplýsingum á svona stuttum tíma! :)

Klukkan er 17:56.

Maggi.

Ungverjaland

Afskaplega lítið veit ég um Ungverjaland. Ég veit þó að það er eitt af... fjölmörgum löndum sem eiga landamæri að Austurríki og þau landamæri eru í austri Austurríkis. Á morgun er för okkar heitið til Búdapest, höfuðborgar Ungverjalands, og því munum við vakna eldsnemma (fyrir klukkan sjö!) og fara til Linz þar sem bíður okkar langferðabíll. ("Þetta er engin helvítis rúta, þetta er langferðabíll!")

Planið er að skoða þessa (eflaust) flottu borg með túristarútum (sem eru líklega á tveimur hæðum og efri hæðin opin), kíkja út á lífið, versla jafnvel svolítið, og hvað annað sem okkur dettur í hug. Reyndar hefur þetta verið allt ákveðið fyrirfram af einhverjum í skólanum okkar en við höfum ekki fengið að sjá nákvæma dagskrá ennþá. Vonand er hún góð og hótelið okkar líka. Þetta er pínulítið eins og óvissuferð því við vitum svo lítið hvernig þetta verður! Ef þú ert búinn að lesa þessa færslu þá veistu nákvæmlega jafn mikið og ég um ferðina. Ef þú hefur komið til Búdapest veistu eflaust meira.

Myndavélin verður á lofti og ég set eflaust myndir á Facebook. Vonandi verður helgin ykkar góð, og ef þú sérð þetta Halla, skilaðu kveðju til Jóns Arnars og vonandi líður honum ágætlega í puttanum. Pabbi sagði mér hvað gerðist og ég vorkenni honum alveg afskaplega mikið! En hann er stór og sterkur og tekst eflaust á við þetta eins og sannur karlmaður. :)

Maggi frændi.

Stöcklgraben 5, Hagenberg im Mühlkreis

Jæja, við erum komin með netið heima þannig að það er ekkert annað í stöðunni en að byrja að blogga! Við erum búin að vera í Hagenberg í þrjár vikur og það gengur bara mjög vel. Það eru allir ótrúlega almennilegir, skólafélagar okkar og kennarar, fólkið sem leigir okkur og sérstaklega vinir okkar Hannes og Helene. Þau eru búin að bjarga okkur svo oft, ég veit ekki hvað við hefðum gert hér án þeirra. Það er margt skemmtilegt framundan, næstu helgi t.d. erum við að fara til Búdapest með skiptinemum hér úr skólanum og vinir okkar ætla að koma með okkur. Ósk er búin að vera dugleg að nota netið í skólanum til að blogga, þannig að kíkið endilega þangað til að sjá hvað við erum búin að vera að bralla.


Húsið okkar. Skólinn er upp og til vinstri, þar sem stendur Softwarepark.
Maggi.

Frí!

Streetlight, originally uploaded by Magnús Sveinn.

Þá er sumarfríið formlega hafið! Við Christian kláruðum lokaprófið með stæl. fengum 12 sem er hæsta einkunn á kjánalega danska skalanum. Við Ósk förum heim til Íslands á fimmtudaginn og byrjum sumarfríið okkar á því að fara á ættarmót á Siglufirði. Það verður örugglega mjög gaman, fyrsta og eflaust ekki síðasta ættarmót þessa hluta fjölskyldunnar.

Allt er klappað og klárt í sambandi við haustið. Við erum búin að leigja íbúðina okkar bæði í sumar og í haust og komin með íbúð í Austurríki rétt hjá skólanum okkar. Það er ekkert því til fyrirstöðu að við njótum þess í botn að vera í fríi í sumar og að við eigum góða skiptiönn í haust í Austurríki.

Maggi.

P.s: Fjóla, er ekki farinn að vera kominn tími á lítinn frænda eða litla frænku? Ég bara spyr. ;)

Hagenberg

IMGP2198, originally uploaded by Magnús Sveinn.

Við höfum staðið í því núna alla önnina að finna góðan skóla eða fyrirtæki til að eyða skiptiönninni okkar hjá. Næsta önn, sem er sú níunda og næstsíðasta í náminu, er skiptiönn og því eiga allir að finna sér eitthvað annað að gera þá önnina. Það hefur gengið á ýmsu hjá okkur, en það sem okkur langaði mest var að fara til Hagenberg í Austurríki. Þar er skóli sem heitir The Upper Austria University of Applied Sciences, og hann kennir akkúrat það sem okkur langar mest að læra. Það er animation og post-produtction og fög tengd því.

Þetta ferli er búið að vera þvílíkur rússíbani, við höfum haldið svo oft að þetta væri að ganga upp, en alltaf klikkaði það. Svo vorum við alveg búin að gefa þetta upp á bátinn þegar okkur var tjáð að það væri enginn sjéns fyrir okkur að taka þátt í mastersnáminu þeirra. En núna fyrir nokkrum dögum kom skólastjórinn þeirra með þá hugmynd að við myndum taka fimmtu önnina í bachelor náminu þeirra. Einn af kennurunum í skólanum stakk svo uppá því að við gætum setið tímana en ekki tekið prófin (því einhver þeirra gætu verið á þýsku) og skrifað þess í stað ritgerð um reynslu okkar og farið í próf hér í Danmörku. Þessi tillaga rann í gegn og allir aðliar samþykktu þetta, bæði í Austurríki og skólinn okkar hér í Danmörku.

Við erum semsagt á leiðinni til Austurríkis í haust til að vera í heila önn! Við erum hæst ánægð með þetta, námið er ótrúlega spennandi og skólinn lítur vel út. Ekki nóg með það, heldur eiga systur hennar Óskar heima rétt hjá okkur! Mandý í Vín í tveggja tíma fjarlægtð og Nóra í Passá í Þýskalandi, einn og hálfan tíma í hina áttina.

Það er fleira sem gerir þetta að hinu fullkomna tækifæri. Það eru tveir skiptinemar frá þessum skóla með okkur á þessari önn í Medialogy. Þau heita Hannes og Helene, og þau verða á staðnum í haust og geta ekki beðið eftir að sýna okkur allt þarna í kring og kynna okkur fyrir vinum sínum. Þau eru bæði mjög skemmtileg og við erum ánægð að þekkja nú þegar fólk í skólanum! Við munum líka fá herbergi á kollegí sem er við hliðina á skólanum, og það er líkara hóteli en kollegíi! Herbergin eru þrifin reglulega og það er skipt um á rúmunum fyrir mann! Svo er mötuneyti í húsinu þar sem maður getur fengið sér að borða fyrir lítinn pening.

Þannig að þetta er allt saman bara draumur í dós og við hlökkum ótrúlega mikið að fara þangað. Skólinn byrjar ekki fyrr en í október sem þýðir að við fáum extra langt sumarfrí á Íslandi, langt fram í september. :)

Myndin efst er úr Kjarrmóanum, ég tók hana á gamlársdag. Ef þið smellið á myndina þá getiði séð fleiri myndir af skýjunum. Ég snerti myndirnar ekkert í Photoshop, þær komu svona beint úr vélinni. Ótrúlegir litir. :)

Maggi.