Frí!

Streetlight, originally uploaded by Magnús Sveinn.

Þá er sumarfríið formlega hafið! Við Christian kláruðum lokaprófið með stæl. fengum 12 sem er hæsta einkunn á kjánalega danska skalanum. Við Ósk förum heim til Íslands á fimmtudaginn og byrjum sumarfríið okkar á því að fara á ættarmót á Siglufirði. Það verður örugglega mjög gaman, fyrsta og eflaust ekki síðasta ættarmót þessa hluta fjölskyldunnar.

Allt er klappað og klárt í sambandi við haustið. Við erum búin að leigja íbúðina okkar bæði í sumar og í haust og komin með íbúð í Austurríki rétt hjá skólanum okkar. Það er ekkert því til fyrirstöðu að við njótum þess í botn að vera í fríi í sumar og að við eigum góða skiptiönn í haust í Austurríki.

Maggi.

P.s: Fjóla, er ekki farinn að vera kominn tími á lítinn frænda eða litla frænku? Ég bara spyr. ;)

Hagenberg

IMGP2198, originally uploaded by Magnús Sveinn.

Við höfum staðið í því núna alla önnina að finna góðan skóla eða fyrirtæki til að eyða skiptiönninni okkar hjá. Næsta önn, sem er sú níunda og næstsíðasta í náminu, er skiptiönn og því eiga allir að finna sér eitthvað annað að gera þá önnina. Það hefur gengið á ýmsu hjá okkur, en það sem okkur langaði mest var að fara til Hagenberg í Austurríki. Þar er skóli sem heitir The Upper Austria University of Applied Sciences, og hann kennir akkúrat það sem okkur langar mest að læra. Það er animation og post-produtction og fög tengd því.

Þetta ferli er búið að vera þvílíkur rússíbani, við höfum haldið svo oft að þetta væri að ganga upp, en alltaf klikkaði það. Svo vorum við alveg búin að gefa þetta upp á bátinn þegar okkur var tjáð að það væri enginn sjéns fyrir okkur að taka þátt í mastersnáminu þeirra. En núna fyrir nokkrum dögum kom skólastjórinn þeirra með þá hugmynd að við myndum taka fimmtu önnina í bachelor náminu þeirra. Einn af kennurunum í skólanum stakk svo uppá því að við gætum setið tímana en ekki tekið prófin (því einhver þeirra gætu verið á þýsku) og skrifað þess í stað ritgerð um reynslu okkar og farið í próf hér í Danmörku. Þessi tillaga rann í gegn og allir aðliar samþykktu þetta, bæði í Austurríki og skólinn okkar hér í Danmörku.

Við erum semsagt á leiðinni til Austurríkis í haust til að vera í heila önn! Við erum hæst ánægð með þetta, námið er ótrúlega spennandi og skólinn lítur vel út. Ekki nóg með það, heldur eiga systur hennar Óskar heima rétt hjá okkur! Mandý í Vín í tveggja tíma fjarlægtð og Nóra í Passá í Þýskalandi, einn og hálfan tíma í hina áttina.

Það er fleira sem gerir þetta að hinu fullkomna tækifæri. Það eru tveir skiptinemar frá þessum skóla með okkur á þessari önn í Medialogy. Þau heita Hannes og Helene, og þau verða á staðnum í haust og geta ekki beðið eftir að sýna okkur allt þarna í kring og kynna okkur fyrir vinum sínum. Þau eru bæði mjög skemmtileg og við erum ánægð að þekkja nú þegar fólk í skólanum! Við munum líka fá herbergi á kollegí sem er við hliðina á skólanum, og það er líkara hóteli en kollegíi! Herbergin eru þrifin reglulega og það er skipt um á rúmunum fyrir mann! Svo er mötuneyti í húsinu þar sem maður getur fengið sér að borða fyrir lítinn pening.

Þannig að þetta er allt saman bara draumur í dós og við hlökkum ótrúlega mikið að fara þangað. Skólinn byrjar ekki fyrr en í október sem þýðir að við fáum extra langt sumarfrí á Íslandi, langt fram í september. :)

Myndin efst er úr Kjarrmóanum, ég tók hana á gamlársdag. Ef þið smellið á myndina þá getiði séð fleiri myndir af skýjunum. Ég snerti myndirnar ekkert í Photoshop, þær komu svona beint úr vélinni. Ótrúlegir litir. :)

Maggi.

Sumarfrí handan við hornið

Við kláruðum lokaverkefni annarinnar í síðustu viku og skiluðum því á fimmtudaginn. Það var góð tilfinning eins og alltaf. Skrítið að mega slappa aðeins af og hugsa um eitthvað annað en skólann. Helgin var nýtt vel í afslöppun og rólegheit í ótrúlega góðu veðri hér í Köben. Hitinn náði 25 gráðum og við sleiktum sólina á Islands Brygge, kíktum í Tívolí, sötruðum bjór í Fælledparken og höfðum það gott heima.

Magga stjúpa kom svo í heimsókn á mánudaginn og við elduðum handa henni dýrindis rétt þótt við séum afskaplega miklir nýgræðingar í því að elda fyrir grænmetisætu. Takk fyrir skemmtilega heimsókn Magga! :)

Arndís hin ólétta kom svo í heimsókn til okkar í gær og verður fram á sunnudag. Við kíktum á Jensens Bøfhus (til að jafna okkur eftir allt grænmetið! Nei, ég segi svona) og Rakel joinaði okkur. Við sátum og spjölluðum fram að lokun, ég held ég hafi aldrei verið jafn lengi á Jensens! Skemmtilegt kvöld.

Um helgina verður svo haldið Bjórþróttamót hjá Bigga í Óðinsvéum, og það verður eflaust mjög skemmtilegt! Ég hlakka í það minnsta mikið til.

Í næstu viku hefst svo undirbúningur fyrir lokaprófið sem við þreytum 22. júní. Við komum svo heim á klakann 2. júlí. Engin Hróarskelda þetta árið, í fyrsta sinn í sjö ár.

Hér kemur að lokum stuttmyndin sem við gerðum fyrir lokaverkefnið okkar. Takk Jói og Rakel fyrir leikinn, og Ósk fyrir hjálpina við tökurnar. Við Christian vorum bara sáttir með afraksturinn þótt auðvitað hefði margt mátt fara betur. En þannig lærir maður. :)



Maggi.

Nú er sumar, gleðist gumar...

...og styttist í sumarfrí! En það er nú samt ekki alveg komið. Skilin á lokaverkefninu eru á fimmtudaginn og því snúast allar hugsanir manns um verkefnið.

Ég veit nú ekki alveg hvað ég á að skrifa um. Ég er bara búinn að vera með skrifræpu í allan dag og ákvað að nýta hana áður en ég færi að sofa til þess að blogga! Ég held ég hafi aldrei skrifað jafn mikið á einum degi. Ég er búinn að skrifa tólf blaðsíður af hreinum texta í Word. Svo er ég búinn að búa til 13 síður af gröfum og slíku fyrir appendix. Á morgun ætlum við Christian að hittast í skólanum og leggja lokahönd á þessa skýrslu. Svo fer restin af dögunum í að yfirfara og svo fínpússa þetta þar til við þurfum að skila.

Af hverju þarf allt að gerast á sama tíma? Eins og við erum nú ódugleg við að plana helgarnar okkar þá er ein helgi í júní þar sem fjórir atburðir eru, hver öðrum stærri! Þannig að maður þarf heldur betur að velja og hafna. Reyndar er valið ekki mjög erfitt, þegar fjölskyldumeðlimir koma í heimsókn þá er þeim að sjálfsögðu sinnt eins og höfðingjum. ;)

Maggi.

Allt á milljón

Rétt tæp vika í skil og allt á milljón í skólanum. Við kláruðum stuttmyndina okkar á sunnudaginn og gerðum prófanir í gær. Það gekk ágætlega, prófuðum 30 manns, en útkoman var því miður ekki alveg eins og við vonuðumst eftir. En það skiptir nú ekki öllu máli, verkefnið er ekkert verra útaf því. :) Ég set inn stuttmyndina þegar ég má vera að því!

Maggi.

Törnin að hefjast

Þá er komið að enn einni lokaverkefnis-törninni. Mánuður í skil og allt of mikið eftir! En þetta verður eflaust fljótt að líða, um að gera að hafa bara gaman að þessu. Í þetta sinn er ég bara í tveggja manna hóp þannig að þetta er með öðruvísi sniði en áður. Meira álag að sumu leiti, en auðveldara að taka ákvarðanir því það þarf ekki að taka tillit til jafn margra skoðana.

Það er heldur betur komið sumar í Danmörku, 18-19 gráður og sól alla daga undanfarið og á næstunni. Maður kvartar ekki yfir því. Við fórum meira að segja á ströndina um helgina! Það var mjög gott að sóla sig aðeins og borða ferskan ananas. :) Eftir strandferðina hljóp ég svo kílómetrana fimm heim í stað þess að taka Metro! Ótrúlegur dugnaður, ekkert lítið dasaður eftir sól og 18 stiga hita.

Maggi.

Kaldbakur

IMGP9708, originally uploaded by Magnús Sveinn.

Ég er búinn að setja inn myndir á flickr frá ferðinni á Kaldbak frá því í fyrra. Betra seint en aldrei!

Maggi.

Páskahrekkur

maggi.tk sneri aftur til heimahagana

Ég var að skoða hvort ég gæti ekki fengið nýja og styttri slóð á þessa bloggsíðu því carrottop.blogspot.com er ekki mjög þjált og erfitt að muna. Ég var alveg búinn að kveðja maggi.tk lénið en viti menn, ég athugaði það og það var laust! Þannig að núna hef ég endurheimt lénið sem var stolið af einhverri ljótri auglýsingasíðu fyrir ári síðan.

Nú styttist í að við Ósk förum aftur til Danmerkur í vorblíðuna. Verst að maður þarf að helga sig lokaverkefninu næstu tvo mánuðina tæpa. Þetta verður samt eflaust fljótt að líða og komið sumar áður en maður veit af! :)

Maggi.

Myndir frá Akureyrarför

IMGP2688, originally uploaded by Magnús Sveinn.

Ég er farinn að nota flickr til að setja inn myndir og er búinn að setja inn nokkrar myndir frá ferðalaginu frá Akureyri til Reykjavíkur nú á mánudaginn.

Maggi.

Blip FM

Það er til ótrúlega mikið af "social networking" síðum á netinu. Ég nota nokkrar þeirra (eins og sjá má á linkunum hér til hægri á síðunni), en sú nýjasta sem ég hef prófað heitir Blip FM. Þar get ég sent inn ábendingar um tónlist sem mér þykir góð og þannig deilt tónlist með fólki sem langar að fylgjast með því. Til þess að sameina þessa sniðugu síðu og bloggið mitt setti ég spilara hér efst á síðuna með nýjustu færslunni frá mér. Þannig að ef þig langar að hlusta á lagið sem ég er að benda á, þá smelliru einfaldlega á "play" og svo getur þú hlustað á lagið svo lengi sem glugginn er opinn. Sniðugt, ekki satt? Til að sjá fleiri ábendingar frá mér þá smellir þú einfaldlega á Blip FM táknið vinstra megin við ábendingarnar.

Maggi.

Magnaðir hlutir að gerast í dag!

Björk syngur fyrir Led Zeppelin - bjork.com

Leynilegt neðanjarðarbyrgi á gamla vallarsvæðinu - vf.is

Selja húsbúnað úr gömlum bönkum - mbl.is

Jónsi í SigurRós syngur með Coldplay - sigur-ros.co.uk

Google gerir, CADIE, tölvu sem hugsar sjálfstætt
- Hér er heimasíðan sem CADIE útbjó sjálfkrafa

Nýr bjór, Icelandic Poverty Ale, gefinn í Kringlunni - visir.is

Thom Yorke í Fríkirkjunni í kvöld - rjominn.is

Maggi.

Animeisjön

Það eru stór skil í skólanum nú á föstudaginn. Á þessari önn, líkt og þeirri síðustu, er einn áfangi þar sem við ráðum nokkurnvegin sjálf hvað við gerum. Auðvitað verður það að vera innan þess sviðs sem skólinn er að kenna og við fáum leiðsögn frá kennurum ef við þurfum, en þar fyrir utan sjáum við sjálf um að læra það sem okkur langar til. Við Ósk ákváðum að fá æfingu í animation. Ég set útkomuna hér á bloggið síðar í þessari viku.

***

Ég reyni oft að forðast það að sletta of mikið á ensku, í það minnsta þegar ég skrifa. Ég fletti því upp orðinu animation í ensk-íslenskri orðabók og fékk þrjár mismunandi niðurstöður.

- Hreyfimynd
- Lífgun
- Myndlífgun

Mér þykja þær allar mjög slæmar. Ef fjallað er um mynd sem er flokkuð sem animation, þá er kannski hægt að segja að hún sé hreyfimynd (þótt það sé alls ekki lýsandi orð því öll myndskeið eru jú hreyfimyndir ekki satt?) en það er ekki hægt að segja að myndin sé lífgun eða myndlífgun. Ef einhver er að búa til slíka mynd, eða að animeita, er sá hinn sami þá að búa til hreyfimynd, að lífga eða að myndlífga? Af þrennu illu er síðasti kosturinn þó skástur.

Ósk vill nota orðið hreyfivæða. Það er gott að því leyti að það er hægt að segja ég ætla að hreyfivæða þetta, en það myndi þó ekki duga sem lýsing á slíkum myndum. Það væri kannski hægt að hreyfivæða hreyfimynd?

Er einhver annar með betri tillögu? Það er synd að orðið animeita sé komið í orðaforða manns. Ætli maður noti ekki teiknimynd frekar en animation um slíkar myndir, en þrívíddar-teiknimyndir eru þó ekki teiknaðar, eða hvað?

***

Að lokum ætla ég að deila með ykkur mynd sem mér finnst mjög flott. Myndina fékk ég af Wikipedia og hún er af Hong Kong. Það er hægt að fá enn stærri upplausn af myndinni þar. Ég minnkaði hana þannig að hún passar á "skjáborðið" mitt. ;)


Maggi.

The Lonley Island - I'm On a Boat

Útihlaup

Í grunnskóla fannst mér fátt leiðinlegra en útihlaup. Það var í það minnsta það allra leiðinlegasta í leikfimi, meira að segja leiðinlegra en bíp-test. Síðan þá hef ég alltaf haldið því fram að mér finnist leiðnlegt að hlaupa, en núna undanfarið hef ég komist að því að það getur verið mjög skemmtilegt!

Ég er farinn að hlaupa af og til hér um nágrennið, og þar sem við búum niðri í bæ hér í Köben þá er ótrúlega margt að sjá. Ég hef enn ekki hlaupið sömu leiðina og það er af nógu að taka. Ekki spillir fyrir að ef ég hleyp með símann minn við höndina þá get ég notað forrit sem heitir RunKeeper sem skráir niður leiðina sem ég hleyp, hversu hratt ég hleyp hverju sinni og fleiri upplýsingar í þeim dúr. Það er gaman að skoða leiðina eftirá og deila því með öðrum því það er mikil hvatning til að halda þessu áfram. Í dag hljóp ég að litlu hafmeyjunni og til baka framjá Kongens Nytorv og Nyhavn.


Maggi.

iChat

Það er miklum mun auðveldara að búa í útlöndum ef það er auðvelt að hafa samband við fólkið sitt. Það er gaman að nota MSN eða Facebook fyrir textaskilaboð, og svo er frábært að geta "skæpað" við fjölskylduna heima. Nú er meira að segja komið svo að flestir (næstum allir) eru komnir með makka, og þá er hægt að nota iChat. Við prófuðum í fyrsta skipti að tengja þrjár tölvur í iChat og það virkaði mjög vel! Það er líka hægt að fíflast eins og sést á myndinni hér fyrir neðan. :)

Við Ósk horfðum á Breakfast at Tiffany's í kvöld sem er merkilegt fyrir þær sakir að ég hef aldrei séð hana áður! Það er auðvitað synd og skömm, en nú er ég búinn að bæta úr því. Listinn yfir klassískar myndir sem allir eiga að vera búnir að sjá en ég á eftir að sjá er reyndar alveg skammarlega langur. Ég er búinn að verða mér út um slatta af þeim og vonast til að bæta úr þessu smám saman.
Maggi.

Here's looking at you, blog

Ég tók mig til og breytti blogginu mínu. Hér í den gerði ég það frekar reglulega, en það hefur fengið að halda sér í svipaðri mynd í nokkur ár. Eftir að maggi.tk nafninu var stolið síðasta vor hef ég lítið nennt að blogga en ég ætla að reyna að breyta því. Það eru kannski einhverjir heima á klakanum sem eru forvitnir um hvort íslenskir námsmenn svelti heilu hungri í Danaveldi eða hvort við náum að skrapa saman aurum fyrir leverpostej svo við getum fengið okkur smá smörrebröd. Kannski verður líka skemmtileg nostalgía að lesa gamlar færslur eftir nokkur ár.

Við erum í skemmtilegum tímum þessa önnina í skólanum. Einn þeirra er vídjóvinnsla (Advanced Audiovisual Production) þar sem við hlaupum um ganga skólans með flottar vídjóvélar og þykjumst vera kvikmyndagerðarmenn. Útkoman er svona upp og ofan en yfirleitt er mjög gaman bæði að skipuleggja, taka upp og klippa myndirnar. Nýjasta afurðin er mynd sem við ákváðum að kalla Fjórir eða FOUR. Í henni er sögð saga með fjórum myndavélum, en öll myndskeiðin sjást allan tímann á skjánum. Hljóðið er notað til að leiða áhorfandann að því sem er merkilegast í sögunni hverju sinni. Hér er útkoman. Athugið að það er hægt að horfa á myndina í háskerpu með því að smella á HD hnappinn á spilaranum.


Maggi.

Breytingar

Ég fer nú fljótlega að bæta úr skorti á færslum á þessu bloggi. :)

Maggi.

Til hamingju með afmælið elsku Ósk! :D

Við Ósk, afmælisbarn dagsins, höfum verið að fylgjast með breska X-factor núna í haust og það er flott skemmtun. Leona Lewis, sigurvegarinn í X-factor fyrir tveimur árum, kom í þáttinn um daginn og söng lag sem hún var að gefa út. Þegar ég heyrði hana byrja að syngja lagið þá var ég ekki alveg að kaupa það, því lagið er Run með Snow Patrol, sem er virkilega flott lag og ég hef hlustað á það margoft. En hún er ótrúlega hæfileikarík og tók lagið alveg virkilega vel og því ákvað ég að skella því hérna á bloggið mitt.

Maggi.

Styttist í annan endann

Nú er þessi önn senn á enda liðin! Það var ekki lengi gert. Síðustu tvær vikurnar í hverju lokaverkefni eru iðulega uppspretta mikils álags, svefnleysis og mataræðis sem er ekki uppá marga fiska. Bókstaflega. Það verður ákaflega gott að komast heim í frí.

Maggi.

MGMT

Uploaded by www.cellspin.net

Makkinn mættur!

Þá er biðin langa á enda! Á miðvikudagskvöldið fékk ég í hendurnar nýju tölvuna mína. Sú er búin að láta bíða eftir sér. Ég ætlaði að kaupa mér nýja tölvu í ágúst en frétti þá af því að það væri meiriháttar uppfærsla á fartölvum frá Apple handan við hornið. Ég bjóst við að þurfa að bíða í nokkrar vikur, kannski mánuð eftir því, en auðvitað létu þeir bíða eftir sér fram í miðjan október. Það hefði svosem verið í lagi hefði íslenski efnahagurinn ekki tekið uppá því að hrynja akkúrat á þessum tíma! Afleiðingin var að þrátt fyrir að ég átti pening til að kaupa tölvuna þá gat ég það ekki því hann var fastur á Íslandi og engin leið að koma honum yfir til Danmerkur.

Að lokum myndaðist glufa og ég gat sent peninginn yfir. Auðvitað tók viku fyrir beiðnina að fara í gegn, aðra viku fyrir peninginn að komast yfir til Danmerkur og þá gat ég loksins pantað tölvuna! Þá tók við enn önnur viku bið því það þurfti að senda tölvuna til mín. Allt þetta er nú yfirstaðið sem betur fer og ég er orðinn alvöru tölvu-njörður á ný.


Við fyrstu sýn og notkun er tölvan alveg frábær! Þrusuvirkar og er rosalega flott. Ég er hæstánægður og vona að það haldist þannig. Ég var hræddur um að skjárinn myndi fara í taugarnar á mér því hann er glansandi en ekki mattur. Ég hefði tekið mattan ef það stæði til boða. En ég verð að segja að það fer lítið sem ekkert í taugarnar á mér og skjárinn er mjög flottur, og bjartur. Lyklaborðið er svart og það er svört umgjörð um skjáinn. Þetta er töluverð útlitsbreyting frá eldri týpunni. Þetta er öðruvísi og venst eflaust fljótt. Hvort þetta sé flottara skal ég ósagt látið, kannski langaði þá bara að breyta til, sem er auðvitað svolítil áhætta því fyrri týpan er virkilega flott.

iMagg.

Mal

Uploaded by www.cellspin.net

Second Hand Smoking

Þetta er útkoman úr verkefni sem við Ósk unnum saman. Verkefnið snerist um að bæta tölvugerðum hlut inn í alvöru myndskeið.



Maggi.

Risakisa líður vel hjá okkur :)

Uploaded by www.cellspin.net

Meira haust í Köben - Ósk labbar ad strætóstoppinu

Uploaded by www.cellspin.net

Kisinn er kominn og hann er frábær! :D

Uploaded by www.cellspin.net

Haustlitir í Köben

Uploaded by www.cellspin.net

Risakisi

Við Ósk erum bæði miklar kisumanneskjur og söknum þess að eiga kisu. Ef við myndum fá okkur kisu hér úti myndi kosta um 200 þúsund að flytja hana heim, og ekki myndum við vilja skilja hana eftir. Því auglýstum við á nokkrum vefsíðum hér í Danaveldi eftir kisu til að passa í nokkra mánuði. Nokkrum dögum síðar fengum við svar! Kisueiganda vantaði einhvern til að passa kisuna hennar þar til í mars því þá flytur hún í húsnæði þar sem hún getur haft kisuna. Þannig að eftir eina viku fáum við til okkar kisu sem verður hjá okkur þar til í mars! :)

Kisan er strákur og heitir Bandit. Hann er fimm ára og er risastór eins og sjá má á myndinni hér fyrir neðan! Við hlökkum mikið til að hafa kisu á heimilinu, þótt við fáum ekki að eiga hana.

Maggi.

iPhone

Er ekki kominn tími á ad endurlífga tetta blogg? Er ad skrifa tetra á nyja símanum mínum sem Ósk gaf mér í afmælisgjöf! Takk fyrir mig ástin mín! Meira sídar. :)

Maggi.

26 ára BSc

Þá er maður orðinn gamall. Ég er kominn með háskólagráðu og orðinn 26 ára frá og með deginum í dag! Svona líður þetta. :)

Maggi.

The Sinking City of Atlantis

Þá er þessi önn á enda! Ég tók lokaprófið ásamt hópfélögum mínum á mánudaginn og það gekk bara mjög vel! Kennararnir og prófdómarinn voru mjög ánægð með verkefnið okkar og töluðu vel um það. Ég fékk tíu í einkunn og er mjög sáttur með þá útkomu, hvernig er annað hægt. :)

Einkunnirnar á önninni voru líka í hærri kantinum í þetta skiptið, og var það mjög verðskuldað. Virkilega flott verkefni hjá öllum hópunum og allir mjög vel undirbúnir. Hér er vídjóið sem við bjuggum til um leikinn okkar sem við sýndum á prófinu. Það útskýrir í mjög grófum dráttum útá hvað verkefnið snýst.



Til að sýna ykkur hvað hinir voru að gera þá eru hér nokkrir linkar á verkefni samnemenda minna. Efsti liknkurinn er fyrir DigiBoard sem er verkefni hópsins hennar Óskar, sem var mjög vel heppnað. :)

- DigiBoard
- Deathmatch Chronicles
- Oculusia: Multi-touch gaming

Svo er það bara Hróarskelda eftir rétt rúma viku! Það er komið á hreint að við munum ekki borga neinn aðgang í þetta skiptið heldur vinna okkur fyrir miðanum með því að safna dósum fyrir gott málefni. Við þurfum að taka þrjár átta tíma vaktir og spörum þennan tæpa þrjátíu þúsund kall sem kostar inná hátíðna samkvæmt genginu í dag! Vonum nú bara að það rigni ekki eins og í fyrra. :)

Maggi.

maggi.tk heyrir fortíðinni til... :(

Eins og einhverjir hafa sjálfsagt tekið eftir þá er linkurinn maggi.tk ekki virkur lengur. Í það minnsta sendir hann gestina ekki á bloggsíðuna mína eins og venjan hefur verið undanfarin... tjah... sex ár eða svo. Það er þýsk heimasíða fatafyrirtækisins Espirit sem birtist þegar maggi.tk er slegið inní vafrann. Því legg ég til sjö ára viðskiptabanni allra lesenda þessarar síðu við Espirit og öll möguleg dóttur- og móðurfyrirtæki.

Ástæðan fyrir því að þessi fjandsamlega yfirtaka á léninu mínu átti sér stað er að fyrir rétt rúmum þremur árum borgaði ég fyrir að losna við auglýsingar á síðunni minni. Ég borgaði tæpa 20 dollara fyrir að hafa síðuna án auglýsinga í þrjú ár. Þar sem ég stofnaði þennan aðgang fyrir fjöldamörgum árum síðan þá er hann á mjög gömlu netfangi og það er ástæðan fyrir því að ég fékk engin boð um að endurnýja áskriftina (get ég mér til um). Eitthvað fyrirtæki hefur séð sér leik á borði og stolið undan mér þessu ágæta léni og sankað að sér fleiri tugum gesta í viku hverri. Svona getur fólk verið óprúttið.

Fyrir utan þessa óheppilegu atburðarás, sem verður til þess að ég þarf að breyta nafninu á blogginu mínu, þá er allt gott að frétta. Við skiluðum lokaverkefninu síðasta miðvikudag og vorum bara mjög sátt með það! Því var svo fagnað með ýmsu móti, tónleikum, strandferðum, ferðalagi til Helsingör svo fátt eitt sé nefnt. Í byrjun vikunnar komu svo Halla, Biggi, Bragi Már og Jón Arnar í heimsókn til Köben og voru í tvo daga. Við fórum saman í Tívolí, oft í öll tækin (flestir þorðu í fallturninn), og svo út að borða um kvöldið. Rosalega gaman að fá þau í heimsókn. Takk kærlega fyrir heimsóknina! ;)

Nú á mánudaginn er lokapróf og nú snúast allir dagar um að undirbúa það. Við (ásamt einum öðrum) erum fyrsti hópurinn á önninni sem tekur prófið og það verður voða gott að klára. Við tekur svo að það þarf að mála íbúðina, flytja og þess á milli að vinna í nýju sumarvinnunni minni. Ég hef nefnilega ákveðið að vera "freelancer" í sumar! Er eitthvað annað orð til yfir það á íslensku en "verktaki"? Verktaki hljómar eins og ég sé að taka að mér að byggja tuttugu raðhús í Innri-Njarðvík. Það er ekki það sem ég ætla að gera, heldur mun ég búa til vefsíður, vinna í Flash, og sitt lítið af hverju. Það þýðir að ég get byrjað strax að vinna hér úti, og er reyndar nú þegar byrjaður. Það er tæplega hægt að segja að maður sitji auðum höndum.

maggi (ekki .tk)

Light at the end of the tunnel

Jæja það styttist í skil! Tveir dagar eftir til að fínpússa skýrsluna og svo er törnin búin! Í bili. Við taka nokkrir dagar til að fagna og slappa af og svo beint í að undirbúa lokaprófið. Þetta gengur mjög vel hjá okkur, lokaspretturinn hefur oft verið erfiðari, en samt hefur þetta tekið á. Ég tók 18 tíma törn á laugardaginn, frá sjö um morguninn til tvö um nóttina, í að lesa og leiðrétta góðan part af skýrslunni. Hún er um 130 síður og á eftir að lengjast eitthvað smá, en endar eflaust í kringum 140 síður í heildina með öllu aukaefni. Hún er bara nokkuð þétt að mínu mati. Ég hlakka liggur við til að fara í prófið því ég get svarað flestum spurningum held ég sem ég gæt verið spurður um verkefnið okkar.

Ef þú ert ekki búinn að sjá Charlie The Unicorn þá mæli ég með því ef þú fílar steiktan húmor. Framhaldið er ekki síðra, og meira að segja betra að mínu mati. Ekki er öll vitleysan eins. :)

Maggi.

Twitter er skenntilet

Glögg augu hafa kannski tekið eftir því að það er kominn nýr kassi hér til hægri sem heitir Twitter Míkróblogg. Twitter er einföld þjónusta sem biður fólk um að svara spurningunni "Hvað ert þú að gera?" með 140 stöfum. Þannig er hægt að fylgjast með öðru auganum með þeim sem maður þekkir! Mjög óþarfar upplýsingar svosem, en samt skemmtilegt. Verst er að ég er frekar einmanna þarna, þannig að endilega vertu með. :)

Maggi.

Lokaverkefni

Jæja! Bloggiblogg!

Það er brjálað að gera í skólanum nú þegar endamarkið nálgast. Við skilum lokaverkefninu okkar þann 4. júní. Svo er það eitt stykki Bachelor lokapróf þann 16. júní og útskrift 27. júní! Ég kem svo heim 9. júlí eftir að hafa kíkt á Roskilde. Bara ef einhver hefði áhuga á dagsetningunum sem skipta máli á næstunni hjá mér. :)

Lokaverkefnið gengur bara vel, við prófuðum það á föstudaginn og fengum virkilega góð viðbrögð. Fyrir þá sem ekki vita (og ætli það séu ekki flestir) þá gerðum við tölvuleik sem veit hvernig spilandanum líður! Þetta hugtak kallast Affective Gaming og er virkilega áhugavert. Það er reyndar ekki komið svo langt að við getum látið tölvuna vita hvernig þér líður, en í þessu verkefni mældum við vöðvaspennu í höndum spilandans og fengum þannig upplýsingar um hversu afslappaður eða æstur spilandinn var. Ef fólk varð of æst þá hægði leikurinn á sér til að fólk gæti komist áfram auðveldlega, og ef fólk var of afslappað þá fór leikurinn hraðar til að fólki leiddist ekki. Fólkið sjálft vissi ekki að leikurinn væri að stjórnast af því hvernig því leið, það átti bara að fá á tilfinninguna að það væri gott "flæði" í leiknum, og það heppnaðist mjög vel samkvæmt niðurstöðum föstudagsins.

Í viðbót við þetta, til að láta fólk hafa sterkari viðbrögð við leiknum, þá létum við fólkið klæðast vesti sem gaf því "haptic feedback", þ.e.a.s. bætti við snertiskynjun í leikinn. Ef leikmaður klessti á óvini þá fékk hann vægt högg frá vestinu, og ef leikmaður dó þá fann hann fyrir því bæði á bringunni og bakinu með potum frá vestinu. Fólki fannst þetta virkilega skemmtielgt og áhugaverð viðbót við leikinn. Leikurinn sjálfur er mjög einfaldur, takmarkið er að komast upp allt borðið með því að hoppa á milli palla og forðast óvini og hindranir. Neðst á skjánum er vatn og vatnsborðið hækkar smám saman og ef maður er ekki nógu fljótur þá dettur maður í vatnið. Vatnið fór semsagt hraðar eða hægar eftir því hversu æst fólkið var þegar það spilaði.

Endum þetta á snilldar Youtube vídjói frá Weezer.



Ef þú vilt sjá öll vídjóin sem var vísað í þá eru þau hér.

Free Hugs

Henry Ford sagði...

Hvort sem þú trúir að þú getir eða trúir að þú getir ekki þá hefurðu rétt fyrir þér.

Mikið til í því.

Maggi.

Ekkert vín, bara Vín

Við höfum ekki enn náð að fagna próflokum með almennilegu djammi! Vorum í rólegheitunum um helgina bara og það var mjög næs. Í fyrramálið fljúgum við svo til Vínar að heimsækja Mandý og fjölskyldu. Komum heim á sunnudaginn, og svo byrjar næsta önn strax á mánudaginn! Best að fara að sofa í hausinn á sér svo maður vakni til að ná fluginu.

Maggi.

Próflok

Það er rétt hjá Höllu, ég má ekki hætta að vera duglegur að blogga þótt vikan sé liðin! :)

Nú eru prófin búin! Loksins! Loksins! Síðasta prófið mitt var á mánudaginn og það gekk alveg glimrandi vel! Allur hópurinn minn fékk 10 í einkunn. Við voru farnir að efast um að einkuninn okkar yrði góð, því það var mjög margt ábótavant í skýrslunni sem við skiluðum inn. Á prófinu bentum við hinsvegar á alla hlutina sem hefðu mátt fara betur og hvernig við hefðum gert það og það gaf okkur helling af stigum. Í einstaklings hlutanum af próinu stóðum við okkur allir mjög vel líka og það náði að hækka einkunnina upp í tíu!

Prófið fer s.s. þannig fram að fyrst er klukkutíma kynning á verkefninu, og svo er hálftíma munnlegt einstaklingspróf á mann. Fyrir þá sem eru á Íslandi og kunna lítið á danska einkunnakerfið, þá er það nú ekki skrítið því það er fáránlegt. Á síðasta ári tóku þeir sig til og gerðu það ennþá fáránlegra! Í gamla skalanum voru mögulegar einkunnir:

00 03 5 6 7 8 9 10 11 13

Þessar tölur þýddu:

00 03 5 = fall.
6 7 8 9 10 11 = náð, ellefu "hæsta" einkunn.
13 = frábærlega æðislegt (mjög sjaldgæft).

Í nýja skalanum eru bara sjö skref:

-3 00 02 4 7 10 12

Þessar tölur þýða:

-3 00 = fall.
02 4 7 10 12 = náð, tólf er hæsta einkunn.

Já þeir eru ótrúlegir þessir Danir. Stökkin milli einkunna eru ekki einu sinni jöfn, stundum munar tveimur og stundum þremur. Núllin á undan sumum tölunum eru sett til að fólk geti ekki skrifað inná einkunnaspjaldið og til dæmis breytt tveimur í tólf. Að geta fengið mínustölu á prófi er líka alveg magnað! Þetta eru húmoristar.

Við vorum semsagt með 7 fyrir skýrsluna, en stóðum okkur svo vel í kynningunni og í prófinu að við náðum að klóra okkur upp í 10! :D

Óskar hópur fer í prófið í dag. Vonandi gengur þeim vel. Ég hef enga trú á öðru. :) Jæja, nú þarf ég að drífa mig í klippingu. Tveggja vikna fríið þar til næsta önn byrjar er vel nýtt. :)

Maggi.

Próóóóf

Jæja, þá er maður á leið í próf enn einu sinni. Sem betur fer síðasta prófið í þessari prófatörn. Ég er búinn að vera hér uppí skóla síðan tíu í morgun og ætla að gista hér. Prófið er svo kl. 9 í fyrramálið og ég fæ að vita einkunnina beint eftir prófið því þetta er munnlegt próf. Gangi mér vel! :)

Maggi.

Meira YouTube

Þetta er ansi fyndin barátta tveggja sjónvarpsþáttastjórnenda í Bandaríkjunum, Conan O'Brien og Stephen Colbert, um hver þeirra á meira í framboði Mike Huckabee til forseta.




Skelli með öðru myndskeiði þar sem Conan fer í hafnarbolta árið 1864. :)





Maggi.

Törnin næstum búin

Þessir dagar fara í fátt annað en að undirbúa stóra prófið sem er á mánudaginn. Það fer þannig fram að hópurinn heldur kynningu í klukkutíma (í mesta lagi) og eftir það fara allir hópmeðlimir inn einn í einu og eru þá spurðir spurninga um verkefnið. Inni í prófinu eru tveir kennarar úr skólanum sem voru okkar umsjónarkennarar í vetur, og einn prófdómari sem að þessu sinni er kennari frá DTU. Það er pínu ógnvekjandi að þurfa að sitja fyrir framan þrjá kennara og svara spurningum um þessi fög sem maður hefur bara haft þessa einu önn til að læra. Það fer vonandi allt saman vel. :)

Hér er önnur teiknimynd sem við kynntumst í tíma á önninni, hún heitir Billy's balloon.

Maggi.

Falleg teiknimynd

I'm lovin' it

Stundum er bara einfaldast að láta Makkann sjá um þetta. Það er í lagi svo lengi sem stundum breytist ekki í oft. :)


MaggDónalds.

Loudness war

Hér til hliðar, í krækju-dálkinum mínum, setti ég tvær krækjur á síður sem fjalla um The Loudness War sem er í gangi í tónlistariðnaðinum. Það er ekkert nýtt að tónlistariðnaðurinn snýst um að búa til peninga, og þar sem framleiðendurnir hafa tekið eftir því að fólk er líklegra til að kaupa tónlist sem er með hátt loudness þá hefur hljóðblöndun fyrir geisladiska snúist um það í auknum mæli að framleiða háa tónlist.

Skalinn sem geisladiskar og annað stafrænt efni (t.d. DVD diskar) er hinsvegar ekki gerður til að vera nýttur í botn, heldur á að heyrast munur á hljóðum sem eru há og þeim sem eru lág. Tökum dæmi:


Bryan Adams - Cuts Like a Knife (1983)



Ricky Martin - Livinig La Vida Loca (1999)


Tónlist í líkingu við seinna dæmið er sorglega algeng og eyðileggur upplifunina. Fólk verður meira að segja þreytt og fær hausverk af því að hlusta á tónlist þar sem enginn munur er á hæstu og lægstu hljóðunum. Þetta er ein af ástæðunum af hverju mörgum finnst LP plötur hljóma betur en geisladiskar. Ef þú hefur ekki skoðað það nú þegar, kíktu á þetta afbragðs dæmi frá YouTube um hvernig tónlistin breytist.

YouTube - The Loudness War

Eftir að ég komst á snoðir um þetta skildi ég loksins hvað vinur minn Bob Dylan átti við þegar hann sagði að það hefði ekki komið út plata í áratugi sem hljómaði vel. Vonandi fer tónlistariðnaðurinn að átta sig á þessu fljótlega og snýr þessari þróun við svo tónlist geti aftur farið að hljóma eins vel og hún getur.

Maggi.



Þessi stelpa er ekki sátt við tónlistariðnaðinn.

Mánudagur

Ef maður ætlar að blogga einu sinni á dag í viku, er þá ekki upplagt að byrja á mánudegi?! :p

Nú er prófatörn hjá okkur Dönunum, tvö próf búin og eitt (og það stærsta) eftir. Stærðfræði og forritun gengu bara ágætlega hjá okkur báðum og nú er bara að massa þriðja prófið sem er eftir viku.

Fríið okkar er svo vel skipulagt. Eftir prófið eru tvær vikur þar til næsta önn hefst og til að byrja með fáum við Dagnýju vinkonu Óskar í heimsókn yfir helgina. Það verður eflaust þrusu-stuð hjá okkur, enda próflokadjamm og svona. Eftir að Dagný fer aftur heim kíkjum við Ósk svo til Austurríkis! Þar ætlum við að heimsækja Mandý og fjölskyldu, en hún er systir hennar Óskar. Um leið og við komum svo aftur heim til Köben þá hefst Bachelor-önnin okkar! Jább, við útskrifumst í vor með Bachelor gráðu! Alveg magnað.

Það þýðir samt ekkert að slá slöku við, því í haust ætlum við að halda áfram og fara í masterinn. Vorið 2010 verðum við semsagt með meistaragráðu í Medialogy! (ef allt fer að óskum)

Jæja, þýðir ekki að segja frá öllu, þá hefur maður ekkert að segja á morgun.

Maggi.


Vissir þú að árið 2008 er hlaupár?

Ein...

...færsla á dag í viku? Jú ég held að það sé málið. Koma smá lífi í þetta. Bíðið spennt.

Maggi.

Gleðileg jól og farsælt komandi ár!

Hér er lokaverkefnið mitt á þessari önn, þrívíddarstuttmyndin Ace From Space! :)

Maggi.

Á Íslandi núna

Ennþá þreyttur.

Maggi.

Ísland á eftir

Ég er ansi þreyttur.

Maggi.

Britney, Britney, Britney

Er engin sía á fréttum um Britney Spears sem berast frá Bandaríkjunum? Þessi frétt birtist á Vísi.is í dag.

Britney stelur kveikjara

Ég get svo svarið það.

Maggi.

Skrapp frá í tíu mínútur, kem aftur eftir þrjá klukkutíma...

...eða í mínu tilviki 34 daga. Skömm að þessu. Skamm Maggi. Skammaggi.

Það er ekki búin að vera lognmolla hjá okkur skötuhjúunum í Rødovre undanfarið. Við höfum í nógu að snúast og það virðist sem listinn yfir hluti sem maður ætti að vera að gera lengist hraðar í annan endan en hann styttist í hinn. Með þessu áframhaldi förum við að eiga eftir það sem við erum búin að gera. Nei það er nú kannski ekki alveg svo slæmt. Við getum samt ekki kvartað yfir því að hafa ekki skemmt okkur reglulega því nú hafa allir viðburðirnir sem ég skrifaði um um daginn átt sér stað, og þeir voru hver öðrum skemmtilegri. Tökum þetta bara skipulega:

19. okt: An Evening with SigurRós
SigurRós stóðu fyrir sínu og spiluðu nokkur lög áður en þeir sýndu heimildarmyndina sína "Heima". Þeir spiluðu órafmagnað og það var alveg ótrúlega flott hjá þeim! Ég hef aldrei heirt þá spila þannig áður (enda hafa þeir aldrei gert það fyrr en nýlega) og eftir myndina sögðu þeir frá því að þetta hafi bara verið útaf tónleikunum sínum hjá Kárahnjúkum þar sem þeir neyddust til þess að prófa það. Það hljómaði líka svona vel að þeir hafa spilað órafmagnað á nokkrum tónleikum síðan. Eftir myndina var semsagt spjall við hljómsveitina og leikstjóra myndarinnar þar sem áhorfendur gátu spurt spurninga og það var mjög áhugavert og fékk mann til að sjá hljómsveitina og myndina þeirra í öðru ljósi. Mjög vel heppnað kvöld með SigurRós.

24. okt: Muse í Forum
Ég bloggaði síðast þegar við vorum á leiðinni á Muse í Forum, og það var mikill spenningur í okkur. Þeir stóðu fyrir sínu, með flott show, og auðvitað ótrúlega kraftmikla og góða frammistöðu. Lögin þeirra eru svo tónleikavæn að það er engu lagi líkt. Sjúklega mikill troðningur við fatahengið eftir tónleikana setti svip sinn á kvöldið og það leið næstum því yfir Ósk sem hræddi okkur bæði frekar mikið. Það fór samt allt vel að lokum.

7. nóv: Arcade Fire í KB-Hallen
Við höfðum beðið eftir þessum tónleikum síðan í mars, þegar þeir hættu við tónleikana deginum áður en þeir áttu að vera haldnir. Til að vera örugg með að miðarnir okkar síðan þá væru enn í gildi hafði ég sent Billetlugen, fyrirtækninu sem sá um miðana, póst og spurt hvor svo væri ekki. Þeir staðfestu það og sögðu okkur engar áhyggjur að hafa. Sama dag og tónleikarnir voru, eftir að hafa heyrt að sumir hafi fengið endurgreitt án þess að hafa beðið um það, athuga ég svo kreditkortið mitt í netbankanum og sá að við höfðum fengið miðana endurgreidda í apríl! Ég neitaði að trúa því og við fórum á tónleikana með miðana okkar, og útprentaðan tölvupóstinn frá fyrirtækinu, því við höfðum alls ekkert viljað fá endurgreitt! Eftir að gaur í dyrunum hafði eytt 10 mínútum í símann við einhvern (kannski þann sem sendi mér póstinn) til að athuga hvort við mættum fara inn, var okkur svo hleypt inn. Það voru ófáir sem voru ekki svo heppnir og stóðu fyrir utan með ógilda miða.

En nóg um það! Tónleikarnir voru frábærir, vægast sagt. Við vorum í stúkunni allan tímann, ólíkt Muse tónleikunum en þá vorum við á gólfinu. Það var virkilega skemmtilegt að sjá hvað hljómsveitin skemmti sér vel, og auðvitað er æðislegt að heyra tónlist sem maður þekkir eins og handarbakið á sér spilaða á sviði. Þetta var æðislegt, og skrítið að hugsa til þess hversu litlu munaði að við hefðum ekki fengið að fara inn.

21. nóv: Ísland - Danmörk, EM-forkeppni í Parken
Eins og flestir vita eflaust þá tapaði Ísland fyrir Danmörku 3-0 í EM-forkeppninni. Leikurinn skipti þó engu máli því hvorug þjóðin hefði getað komist áfram. Kannski útskýrir það litla aðsókn, en Gilli frændi benti á það í komment-kerfinu að það hefði ekki verið svona lítil aðsókn á landsleik á Parken í 30 ár! Kannski á það bara vel við, því Ísland skoraði síðast mark í landsleik í Danmörku árið 1974, fyrir 33 árum síðan. Við vonuðumst eftir því að þeir næðu að pota boltanum amk einu sinni í netið hjá Baunum, en varð ekki að ósk okkar. Það var samt mjög gaman að prófa að fara á landsleik í fótbolta, og líka á svona stórum leikvangi. Þannig að þetta var mjög gaman þrátt fyrir tapið. :)

26. nóv: múm á Lille-Vega
Í gærkvöldi voru síðustu tónleikarnir okkar í þessari tónleika-hrinu þegar við sáum múm spila á litla Vega. Við höfum ekki hlustað á þá lengi, en höfðum heyrt góða hluti um frammistöðu þeirra á tónleikum og ákváðum því að skella okkur. Þeir stóðu sig mjög vel og þrátt fyrir að við höfum ekki þekkt lögin þá var gaman að sjá hvað þau eru frumleg og hæfileikarík. Þó má segja að upphitunarhljómsveitin Seabear hafi stolið senunni, því við vorum alveg yfir okkur hrifin af þeim og keyptum okkur diskinn þeirra eftir tónleikana. Þau eru líka íslensk og ég held að þau hafi átt einhver vinsæl lög á Íslandi þótt ég viti ekkert hvort fólk viti af þeim eða ekki. Þetta er mjög þægileg og róleg tónlist en hress og skemmtileg inn á milli. Mæli hiklaust með þeim, og auðvitað múm líka. :)


Jól
Ég kem heim 18. desember en stoppið verður stutt því fyrsta prófið okkar er 4. janúar. Þangað til verðum við á milljón að vinna lokaverkefnið okkar því það er lítið eftir af önninni en við eigum langt í land með að klára verkefnin.

Maggi.

MUSE Í KVÖLD

Muse eru ekki vanir því að leggja lítið í show-ið þegar þeir spila á tónleikum. Ég held að kvöldið í kvöld verði lengi í minnum haft.

Tónleikar og fótbolti

Það er búið að vera brjálað að gera hjá okkur undanfarið í skólanum. Fyrir utan verkefnavinnu þá erum við búin að vera í fyrirlestra-törn og ótrúlega mikið lesefni fyrir hvern tíma og oft á tíðum heimaverkefni eftir tímann. En nú er betri tíð framundan. Ekki það að skólavinnan eigi eftir að minnka eitthvað, heldur er að taka við törn af tónleikum og uppákomum! :D Hérna er það sem er planað hjá okkur Ósk í október og nóvember:

19. okt: An Evening with SigurRós
24. okt: Muse í Forum
7. nóv: Arcade Fire í KB-Hallen
21. nóv: Ísland - Danmörk, EM-forkeppni í Parken
26. nóv: Múm á Lille-Vega



An Evening with SigurRós er núna á föstudaginn, þá verður myndin Heima sýnd en á undan því spilar SigurRós nokkur lög fyrir áhorfendur. Ísland - Danmörk í EM undankeppninni verður örugglega virkilega gaman því við Ósk ætlum að fjölmenna með slatta af Dönum úr deildinni okkar. Þannig að þið leitið að okkur í dönsku stúkunni, eina fólkið með íslensku litina! Úff, ef við vinnum þá erum við í vondum málum.



Fyrir utan allt þetta erum við búin að kaupa miða á The Cure 13. febrúar! Þannig að við ætlum heldur betur að verðlauna okkur fyrir allt stritið. Það er líka miklu ódýrara að fara á tónleika hérna heldur en á Íslandi, þannig að auðvitað nýtir maður tækifærin þegar þau gefast. :)

Magggi.

Stop Motion

Um daginn í skólanum gerðum við stutt animation á nokkrum klukkutímum. Hópurinn minn notaðist við Street Fighter kall auk annarra hluta og hérna er afraksturinn!



Maggi.

Netið heim

Ég er reyndar í skólanum að blogga núna, en við erum komin með netið heima! Og því ekkert til fyrirstöðu að við getum verið á Skype eða MSN þegar við eigum að vera að læra. :)

Við eigum enn eftir að snurfusa pínulítið í íbúðinni áður en við tökum myndir af öllu og setjum á netið.

Við erum ekki enn komin með sjónvarp en það er á dagskrá að kaupa eitt slíkt. Við erum þó með skjávarpann og höfum horft á nokkrar bíómyndir síðan við komum út og merkilegt nokk þá hafa flestar þeirra verið virkilega góðar.


Reign Over Me
Adam Sandler fer á kostum í þessari frábæru mynd sem er þó langt frá því að vera týpísk "Sandler-mynd". Lýsingin á myndinni á imdb.com er á þessa leið: A man (Sandler) who lost his family in the September 11 attack on New York City runs into his old college roommate (Cheadle). Rekindling the friendship is the one thing that appears able to help the man recover from his grief.


Knocked Up
Sáum þessa í gærkvöldi. Mjög fyndin, eða fíluðum við Ósk amk húmorinn í henni í tætlur. Tekur sig ekki of alvarlega. imdb.com: or fun loving party animal Ben Stone, the last thing he ever expected was for his one night stand to show up on his doorstep eight weeks later to tell him she's pregnant.


Hot Fuzz
Snilldar grínmynd frá gaurunum sem gerðu Shaun of The Dead. imdb.com: Jealous colleagues conspire to get a top London cop transferred to a small town and paired with a witless new partner. On the beat, the pair stumble upon a series of suspicious accidents and events.

Skrifa kannski um fleiri myndir síðar, en ég mæli amk hiklaust með þessum þremur. :)

Maggi.

Netþurrð

Ég lofa að blogga þegar við erum komin með netið heima, en það gengur eitthvað brösulega. Við pöntuðum það um leið og við vissum hvar við myndum búa og áttum að fá það í gang í gær, en við höfðum engan útbúnað fengið eins og þeir voru búnir að lofa! Vonandi reddast það fljótlega. Annars allt gott að frétta, búin að koma okkur mjög vel fyrir í íbúðinni og við erum ótrúlega sátt með hana! Alveg fullkomin fyrir okkur og við komum öllu dótinu okkar fyrir. :) Skólinn gengur ágætlega, nóg að gera og flestir tímarnir mjög áhugaverðir. Meira síðar! :)

Maggi.

Góða ferð, góða ferð, góða feeeeerð!

Svo mæltu Stebbi og Eyfi og voru eflaust að tala til mín og Óskar. Við förum til Danmerkur næsta sunnudag til að takast á við þriðju önnina okkar í Medialogy. Við höfum reynt hörðum höndum allan mánuðinn að redda okkur íbúð í Köben og það var ekki fyrr en núna um helgina að við höfðum erindi sem erfiði. Og gott betur en það! Við fengum æðislega íbúð, ódýra, á fínum stað. Það er hægt að sjá myndir af íbúðinni hér á robinhus.dk og hægt er að sjá staðsetningu hennar með hjálp findvej.dk. Það er virkilega almennilegur gaur sem á hana og vildi hjálpa einhverjum góðum stúdentum með því að leigja ódýrt á meðan hann reynir að selja íbúðina. Jon vinur okkar úr skólanum fór og spjallaði við hann og skrifaði undir samning í okkar nafni, þannig að allt er klappað og klárt!

Eini ókosturinn er nafnið á hverfinu og götunni. Það er ekki nóg með að við búum í Rødovre, þá búum við á Rødovrevej! Og fyrir þá sem ekki vita, þá er mjööög erfitt að segja Rødovre með réttum dönskum hreim! Það er ekki sjens að Danirnir skilji okkur ef við segjum þetta með íslenskum hreim, þannig að við erum í vondum málum ef við ætlum að taka leigubíl heim til okkar. Ósk stakk uppá því að við búum okkur til plöstuð kort með heimilisfanginu okkar á! Ætli það sé ekki besta lausnin.

Maggi.

Maggi Simpson

Roskilde, Taður o.fl.

Eins og aðrir bloggarar vita þá verður alltaf erfiðara að blogga því lengra sem líður frá því að maður bloggaði síðast. Í það minnsta þeir bloggarar sem segja frá því sem á daga þeirra drífur. En það þýðir ekki að leggja árar í bát og gefast upp heldur bretta upp ermarnar og gefa 110%.

Við fórum á Hróarskeldu. Hún var blaut, drullug og skemmtileg. Björk, Arcade Fire og Muse voru bestu tónleikarnir eins og við bjuggumst við. Í staðinn fyrir að setja myndir á netið setti ég myndir í TVF (Tímarit Víkurfrétta) og þið getið nálgast það í sjoppum og matvörubúðum hér á Suðurnesjum. :)

Síðan við komum heim hefur ýmislegt gerst líka. Hið árlega, opna, alþjóðlega Biggapúttmót var haldið fyrir rúmri viku síðan og ég kom, sá og sigraði með því að byrja fyrstu 18 holurnar á 6 undir pari. Það hef ég ekki gert áður og verður erfitt að leika eftir. Á mánudaginn fyrir viku átti ég afmæli og fyrst fjölskyldan mín var öll annað hvort úti á landi eða í Danmörku þá fékk ég Óskar fjölskyldu lánaða. Ósk eldaði fyrir mig og bakaði köku og hvort tveggja var mjög vel heppnað. Ég fékk líka fullt af pökkum og þar stendur hæst svona harður diskur frá Ósk. Algjör snilld því hann er pínulítill og það þarf ekki að stinga honum í samband við rafmagn. Mælimeðissu. :) Eftir afmælismatinn fórum við í keilu og það var mjög gaman! Nokkrir lögðu leið sína í Öskjuhlíðina alla leið úr Keflavík og nokkrir úr Reykjavík líka.

Um helgina fórum við svo í hinn árlega AfmælisTað og var hann virkilega vel heppnaður. Þar fékk ég enn fleiri pakka, og hæst ber þar að nefna 4.7 kg Toblerone! Rosalega, rosalega, rosalega stórt! Mikið hlegið að því sem og öðru sem gerðist um helgina. Takk fyrir mig og takk fyrir komuna allir sem mættu!

Vinnan hefur gengið vel og hefur mikið snúist um golf. Og það mun ekki linna mikið á næstunni, Íslandsmótið í golfi verður haldið á Hvaleyrarvelli í Hafnarfirði um helgina og ég verð þar alla fjóra keppnisdagana að skjóta og klippa vídjó.

Hmm, þetta varð nú ekki jafn langt og ég bjóst við! Enda var þetta farið á hundavaði. Kannski ég bloggi aftur fljótlega. Hver veit! Ekki ég.

Maggi.

Roskilde Festival

Eftir fyrstu Hróarskelduna mína sagði ég að ég myndi fara næstu tíu árin. Þetta er fimmta árið og ég er ekki enn búinn að sleppa hátíð! Við erum að leggja af stað rétt á eftir. Vonandi rætist veðurspáin EKKI. :) Sjáumst á Íslandi.

Maggi.

25. kafli

Þegar við skildum við Magnús síðast var hann í miðjum prófundirbúningi í hitabylgju í Kaupmannahöfn. Það er heldur betur búið að skipast veður í lofti síðan þá. Það er komin rigning. Við skyggnumst inní hugarheim hans...

Já við erum búin að standa í ströngu síðan ég bloggaði síðast. Prófin okkar gengu vel. Við vitum ekki enn hvað við fáum í forritunarprófinu en náum eflaust bæði, við náðum bæði stærðfræði (engin einkunn í því fagi, bara fallið eða náð), og fengum bæði flotta einkunn í stóra lokaprófinu.

Um leið og prófin kláruðust fór að rigna og hefur rignt síðan! Eða því sem næst. Við erum reyndar alveg sátt við það svo lengi sem rigningin teygir sig ekki yfir Hróarskeldu. Veðurspáin er búin að breytast fram og til baka undanfarna daga og við vitum eiginlega ekki við hverju við eigum að búast. En að öllum líkindum verður sitt lítið af hverju, smá rigning, smá sól. Eflaust smá drulla. En bara smá.

Undanfarin vika er búin að fara í að pakka, þrífa og flytja. Og í þessum skrifuðu orðum er allt sem við eigum pakkað, þrifið og flutt! Við erum búin að afhenda lyklana og fá "thumbs up" á þrifin okkar og ástand íbúðarinnar. Kolla, Birna og Camilla voru svo frábærar að geyma allt dótið okkar í sumar og það var flutningabíll frá Rent-A-Wreck sem hjálpaði okkur að flytja dótið til þeirra.

Næst á dagskrá er svo... Hróarskelda! Og við stefnum á að hún verði góð. Vonandi eruð þið heima ekki að drukkna í umferðinni, er búinn að heyra hryllingssögur af undanförnum ferðahelgum. :)

Maggi.

Snertanlegt hljóð

24°C hiti í dag. Heitara á morgun. Búið að vera svipað undanfarna daga og er ekkert að fara að kólna í bráð eins og sjá má á veðurspánni fyrir næstu daga. 25-30°C hiti amk fram á miðvikudag!



Mikið rosalega er erfitt að fá sig til að læra undir próf í svona hita. Hvað þá forritun sem er búin að vera hrikalega leiðinleg þessa önnina. Forritun getur verið fín, en þetta snýst allt um að búa til "diagrams" og skipuleggja sig og einhver leiðindi.

Í dag fórum við á Sound Days, þar sem einhverjir skólar og listamenn sýndu ýmis verk sem tengjast hljóði. Hópurinn hennar Óskar fór með lokaverkefnið sitt fyrir þessa önn sem snýst um að gera hljóð snertanlegt. Þau stálu senunni og fengu virkilega jákvæð viðbrögð hjá öllum, jafnt krökkum sem gamalreyndu fólki í hljóð-bransanum. Við fengum okkur líka ís og spiluðum Hacky Sack og höfðum það notalegt í skugganum. Frábær dagur. Þegar við komum heim gerði ég við hjólið mitt og við ætlum að hjóla í skólann á morgun í hitanum. Held að við verðum að taka fram sólvörnina. :)

Over and out!

Maggi.

Búin, loksins búin

Þá er lokaverkefnið á enda. Um leið og við erum búin að ná andanum aftur þá hefst þriggja vikna prófatörn. Þrátt fyrir að skýrslan hafi ekki verið tilbúin fyrr en kvöldið fyrir skil þá náði ég að eyða nóttinni í að búa til smá vídjó fyrir verkefnið. Þetta er nú hvorki stórt né mikið vídjó en við lentum í eintómu veseni við að búa það til og þessvegna tók það alla nóttina. Hér er afraksturinn.



Maggi.

Vf.is Widget

Á meðan ég er ekki að vinna að lokaverkefninu mínu þá bý ég til Widget! Hér er Vf.is Widget sem sýnir nýjustu greinarnar á síðunni. Þið Suðurnesjafólk sem notið makka getið sótt hann hér! Hér sjáið þið svo framan og aftan á Widget-inn.





Maggi.

Fallegt lag fyrir svefninn

Alexi Murdoch er mjög hugljúfur og skemmtilegur tónlistarmaður. Hér er lag með honum sem heitir Orange Sky af plötunni Time Without Consequence.



Maggi.

Lokaspretturinn

Tveir dagar eftir af lokaverkefninu! Brjálað að gera.



Maggi.

A-N-DRÉ-S!

Það klikkaði fyrir mánuði síðan að setja inn myndbandið sem við gerðum fyrir hann Andrés. Ef einhver vanmetur þá vinnu sem fer í að gera tónlistar myndband þá... ég veit ekki alveg hvernig ég ætlaði að klára þessa setningu. En það er amk mikil vinna! :D Þrátt fyrir að eitthvað skorti uppá sönghæfileikana hjá okkur sem gerðum myndbandið þá er textinn við lagið þeim mun betri. :) Njótið vel!



Maggi.

Widget

Ég rakst á mjög skemmtilegt forrit í gær. Það heitir Dashcode og er það notað til að búa til Widgets á auðveldan hátt. Þeir sem eru makka-notendur þekkja þetta hugtak væntanlega vel en fyrir hina, þá eru þetta lítil forrit sem birtast á skjánum þegar maður kallar á Dashboard, sem er í öllum epla-tölvum.

Að sjálfsögðu stóðst ég ekki mátið og bjó mér til minn eigin Wdget sem sýnir öll nýjustu kommentin á blogginu mínu. Þannig að ég þarf ekki að opna bloggið mitt til að skoða kommentin heldur opna ég bara Dashboard og þar eru þau! Fyrir utan að þetta sparar tíma þá eru líka minni líkur á því að ég missi af kommenti ef einhver kommentar á eldri færslur. Svona lítur Widget-inn minn út:



Ég efast um að einhver sé svo mikil áhugamanneskja um bloggið mitt að þau langi í þennan Widget, en hey, af hverju ekki að leyfa ykkur makkafólki að prófa. :)

maggi.tk comments widget

Maggi.

Fleiri getraunir

Þetta var greinilega allt of auðvelt í síðustu færslu. Hér kemur önnur getraun. Í þetta skiptið eru það þrjú mismunandi geisladiskahulstur;



Það er leyfilegt að giska bara á eitt ef þú nærð ekki öllum.

Maggi.

Getraun

Brjálað að gera! Vika í skil á lokaverkefni. Hér er getraun.

Framan á hvaða geisladisk er þessi mynd?
(Ath. þetta er bara lítill hluti af myndinni)



Maggi.

One

Ég veit að Metallica or U2 eru sammála mér, þetta orð er til. Hérna er líka sönnun á því! En sumir vilja bara ekki viðurkenna þetta.



Maggi.

Loka

Lokaverkefnið okkar er nú í algleymingi (alltaf hefur mér þótt þetta orð verið vitlaust notað, mér finnst það sem er í "algleymingi" vera mjög auðgleymt, en svo er víst ekki). Við erum í skólanum alla daga þótt fyrirlestrarnir séu löngu búnir og vinnum eins og við ættum lífið að leysa. Þegar þetta er skrifað eru tvær og hálf vika í skil.

Þetta er dæmi um það sem ég hef verið að vinna undanfarna daga og vikur. Þetta er "patch" í forriti sem heitir Max/MSP. Þetta forrit er notað til að búa til tónlist meðal annars en það sem ég sýndi ykkur notum við í verkefninu til að reikna stigin í tölvuleiknum okkar. Þetta er svona einn tíundi af því sem ég er búinn að gera í forritinu. Ég veit þetta lítur illa út (og þess vegna sýndi ég ykkur það!) en þetta er frekar skemmtilegt barasta. Alltaf gaman að kunna eitthvað sem lítur út fyrir að vera rosalega flókið! :)

Allt gott að frétta úr Danmörku. Gott veður flesta daga en við náum að sjálfsögðu ekki að njóta þess. En það styttist í að mánaðarkortin okkar í strætó renni út og þá verður hjólað í skólann á hverjum degi! Þá verðum við sko brún og stælt, bíðiði bara.

Maggi.

Smá próf...

## Update! Könnunin er búin. Til ykkar sem tókuð þátt, takk fyrir! ##

Ég ætla að biðja þig lesandi góður að taka smá próf fyrir mig. Þetta tekur eina mínútu og þú þarft að prófa smá leik og svara svo einni spurningu í lokin. Þetta er á ensku en ég býst nú við því að flestir sem þetta lesa kunni ensku.

Smelltu hér til að taka prófið

Takk fyrir hjálpina! :)
Maggi

"Help, I'm in a nutshell!"

Ég var að lesa blogg hjá manni sem er mjög ósáttur við íslenskukunnáttu þeirra sem vinna hjá mbl.is. Ég er hættur að kippa mér upp við að þar komi fram stafsetningar- og málvillur því þær eru orðnar ansi algengar. En ég varð að röfla svolítið sjálfur um uppsetningu frétta hjá þeim. Þeir taka sig stundum til og setja neðst í fréttina stuttan texta með fyrirsögninni "Í hnotskurn". Maður hefði ætlað að það þýddi að fréttin væri endursögð í mjög stuttu máli fyrir þá sem vilja vita eitthvað um innihald hennar án þess að lesa hana alla. Maður hefði líka búist við því að sniðugra væri að hafa slíkan texta fyrir ofan fréttina svo maður reki ekki augun í þetta þegar maður er búinn að lesa fréttina. Þeir sem eru búnir að lesa alla fréttina ættu heldur ekki að þurfa að lesa hana "í hnotskurn" því þeir eru búnir með hana alla. En þetta er bara það sem mér finnst.

Þeim hjá mbl.is finnst greinilega að fréttin í hnotskurn þurfi ekki að innihalda eina einustu staðreynd sem kom fram í fréttinni heldur eingöngu nýjar staðreyndir. Sbr. þessi frétt:

Hætt við Live Earthtónleika í Reykjavík

Mér finnst þetta alveg fáránlegt. Vonandi átta þeir sig á þessu og breyta þessu fyrirkomulagi.

Í hnotskurn
- Stærsti fíll sem veiðst hefur var 12 tonn og 4.2 metrar á hæð.
- Lake Geneva er stærsta stöðuvatn í mið-Evrópu.
- Susie Hewer á heimsmetið í "að prjóna trefil á meðan maður hleypur maraþon". Trefillinn hennar var 1.2 metrar.


Maggi.

Please wait

Mér fannst þetta fyndið.

Maggi.

Þrívídd á baráttudegi verkalýðs

Ekki versnar það.

Í dag var síðasti dagurinn hans Hilmars hjá okkur hér í Köben og nýttum við hann í að skoða Planetarium Tycho Brahe. Það var mjög fínt, byrjuðum á að fara í þrívíddarbíó í IMAX bíósal og skoðuðum okkur svo um á safninu og fræddumst um stjörnufræði. Svo var meira þrívíddarbíó, bæði rússíbani og safarí í Afríku, en safaríið var toppurinn á þessari heimsókn að mínu mati. Ótrúlegar myndir af fílum í návígi og ennþá ótrúlegra að sjá þá í þrívídd svona nálægt.

Eftir það fór Hilmar uppá flugvöll en ég og Ósk nýttum bæjarferðina og fórum í Fields og keyptum okkur brauðrist! Hún er búin að vera lengi á innkaupalistanum en við fundum ekki þá réttu (lesist; nógu ódýra) fyrr en í dag.


Hver man ekki eftir þessum?
Framundan er brjáluð vinna við að klára lokaverkefnið sem á að skila í lok mánaðarins. Nóg er eftir og því þurfa hóparnir okkar að láta hendur standa fram úr ermum ef við viljum skila góðum verkefnum. Báðir hóparnir voru með þeim hæstu á síðustu önn og vonandi verður engin breyting þar á.

Maggi.

Einkahúmor

Það leiðinlega við að blogga á hverjum degi er að maður fær svo fá komment! Hér kemur myndbandið sem við gerðum fyrir hann Jóa. Það er stuttmynd og fjallar um nokkur umtöluð atriði í hans lífi. Þetta er frekar mikill einkahúmor þannig að ætli það séu ekki mest þeir sem þekkja Jóa sem hafa gaman að þessu.


Maggi.

Göngutúr

Hilmar pabbi hennar Óskar er í heimsókn hjá okkur og við röltum um borgina og skoðuðum nokkra fræga túristastaði, til dæmis Nyhavn og Litlu hafmeyjuna. Það var frábært veður eins og er búið að vera undanfarna daga og þetta var mjög góður göngutúr. Í kvöld er svo planið að horfa á mafíósamyndina The Departed og hafa það gott. Vonandi var þessi sunnudagur hjá ykkur jafn næs og hjá okkur.
Maggi.

Nýjung(agirni)

Það eru ár og aldir síðan ég hef gert eitthvað nýtt á blogginu mínu og það var því heldur betur kominn tími til. Ég bjó til smá Flash sem birtir nýjustu bókamerkin sem ég set inn í Firefox. Ég rakst nefnilega um daginn á síðu sem heitir því óþjála nafni del.icio.us og er mikið notuð af fólki sem vill hafa bókamerkin sín á netinu svo hægt sé að nálgast þau úr öllum tölvum. Auðvitað langaði mig að prófa þetta og ákvað að deila því sem mér finnst vert að muna með fólkinu sem les bloggið mitt. Þannig að ef þú kemur hér inn og ég hef enga færslu skrifað (sem er þó harla ólíklegt) þá getur þú fundið einhverja afþreyingu í að kíkj á linkalistann hér á hægri hönd. :)
Maggi.

E.s: Það eru víst smá byrjunarörðugleikar á þessu. Endilega látið vita hvort þetta virkar hjá ykkur og hvaða stýrikerfi og vafra þið eruð að nota. (Gæti verið að þú þurfir að leyfa pop-up fyrir þessa síðu.)

Sumar

Þetta er ekki amalegt.



Það er heldur betur farið að vora hjá okkur, jafnvel hægt að segja að sumarið sé komið í allri sinni dýrð. Verst að við þurfum að hanga inni í heilan mánuð í viðbót og vinna að lokaverkefninu okkar. Eftir það taka við þrjár vikur af prófum. Síðustu vikuna í júní þurfum við svo að flytja úr íbúðinni okkar. Eftir það er það Hróarskelda og svo heim! Jább, ákvörðunin er tekin, við munum fara á Hróarskeldu. Það eru verðlaunin okkar eftir fyrsta árið okkar í skólanum. Gott að taka sér pínulítið frí áður en maður fer svo heim til að vinna í allt sumar. Við Ósk vinnum á sömu stöðum og í fyrra og allt stefnir í mjög gott sumar. Ekki verra að byrja það á smá hitabylgju! :p

Maggi.

X-Moto

Ég og fleiri höfum endurvakið gamla fíkn á þessari önn en fíknin hefur nú breytt um nafn. Hún hét áður Elasto Mania, æðislegur mótorhjólaleikur sem var mjög undarlegt að stjórna. Það er komin ný útgáfa af þessum leik og heitir hann X-Moto.



Það er alveg merkilegt hvað maður getur festst í honum og tíminn flýgur frá manni ef maður álpast til að opna hann. Leikurinn er ókeypis og má hann finna hér:

Sækja X-Moto

Svo hef ég ákveðið að setja inn vídjóið hans Andrésar sem átti afmæli um daginn. Textinn er mun betri en söngurinn! :p



Maggi.