I'm lovin' it

Stundum er bara einfaldast að láta Makkann sjá um þetta. Það er í lagi svo lengi sem stundum breytist ekki í oft. :)


MaggDónalds.

Loudness war

Hér til hliðar, í krækju-dálkinum mínum, setti ég tvær krækjur á síður sem fjalla um The Loudness War sem er í gangi í tónlistariðnaðinum. Það er ekkert nýtt að tónlistariðnaðurinn snýst um að búa til peninga, og þar sem framleiðendurnir hafa tekið eftir því að fólk er líklegra til að kaupa tónlist sem er með hátt loudness þá hefur hljóðblöndun fyrir geisladiska snúist um það í auknum mæli að framleiða háa tónlist.

Skalinn sem geisladiskar og annað stafrænt efni (t.d. DVD diskar) er hinsvegar ekki gerður til að vera nýttur í botn, heldur á að heyrast munur á hljóðum sem eru há og þeim sem eru lág. Tökum dæmi:


Bryan Adams - Cuts Like a Knife (1983)



Ricky Martin - Livinig La Vida Loca (1999)


Tónlist í líkingu við seinna dæmið er sorglega algeng og eyðileggur upplifunina. Fólk verður meira að segja þreytt og fær hausverk af því að hlusta á tónlist þar sem enginn munur er á hæstu og lægstu hljóðunum. Þetta er ein af ástæðunum af hverju mörgum finnst LP plötur hljóma betur en geisladiskar. Ef þú hefur ekki skoðað það nú þegar, kíktu á þetta afbragðs dæmi frá YouTube um hvernig tónlistin breytist.

YouTube - The Loudness War

Eftir að ég komst á snoðir um þetta skildi ég loksins hvað vinur minn Bob Dylan átti við þegar hann sagði að það hefði ekki komið út plata í áratugi sem hljómaði vel. Vonandi fer tónlistariðnaðurinn að átta sig á þessu fljótlega og snýr þessari þróun við svo tónlist geti aftur farið að hljóma eins vel og hún getur.

Maggi.



Þessi stelpa er ekki sátt við tónlistariðnaðinn.

Mánudagur

Ef maður ætlar að blogga einu sinni á dag í viku, er þá ekki upplagt að byrja á mánudegi?! :p

Nú er prófatörn hjá okkur Dönunum, tvö próf búin og eitt (og það stærsta) eftir. Stærðfræði og forritun gengu bara ágætlega hjá okkur báðum og nú er bara að massa þriðja prófið sem er eftir viku.

Fríið okkar er svo vel skipulagt. Eftir prófið eru tvær vikur þar til næsta önn hefst og til að byrja með fáum við Dagnýju vinkonu Óskar í heimsókn yfir helgina. Það verður eflaust þrusu-stuð hjá okkur, enda próflokadjamm og svona. Eftir að Dagný fer aftur heim kíkjum við Ósk svo til Austurríkis! Þar ætlum við að heimsækja Mandý og fjölskyldu, en hún er systir hennar Óskar. Um leið og við komum svo aftur heim til Köben þá hefst Bachelor-önnin okkar! Jább, við útskrifumst í vor með Bachelor gráðu! Alveg magnað.

Það þýðir samt ekkert að slá slöku við, því í haust ætlum við að halda áfram og fara í masterinn. Vorið 2010 verðum við semsagt með meistaragráðu í Medialogy! (ef allt fer að óskum)

Jæja, þýðir ekki að segja frá öllu, þá hefur maður ekkert að segja á morgun.

Maggi.


Vissir þú að árið 2008 er hlaupár?

Ein...

...færsla á dag í viku? Jú ég held að það sé málið. Koma smá lífi í þetta. Bíðið spennt.

Maggi.

Gleðileg jól og farsælt komandi ár!

Hér er lokaverkefnið mitt á þessari önn, þrívíddarstuttmyndin Ace From Space! :)

Maggi.

Á Íslandi núna

Ennþá þreyttur.

Maggi.

Ísland á eftir

Ég er ansi þreyttur.

Maggi.

Britney, Britney, Britney

Er engin sía á fréttum um Britney Spears sem berast frá Bandaríkjunum? Þessi frétt birtist á Vísi.is í dag.

Britney stelur kveikjara

Ég get svo svarið það.

Maggi.

Skrapp frá í tíu mínútur, kem aftur eftir þrjá klukkutíma...

...eða í mínu tilviki 34 daga. Skömm að þessu. Skamm Maggi. Skammaggi.

Það er ekki búin að vera lognmolla hjá okkur skötuhjúunum í Rødovre undanfarið. Við höfum í nógu að snúast og það virðist sem listinn yfir hluti sem maður ætti að vera að gera lengist hraðar í annan endan en hann styttist í hinn. Með þessu áframhaldi förum við að eiga eftir það sem við erum búin að gera. Nei það er nú kannski ekki alveg svo slæmt. Við getum samt ekki kvartað yfir því að hafa ekki skemmt okkur reglulega því nú hafa allir viðburðirnir sem ég skrifaði um um daginn átt sér stað, og þeir voru hver öðrum skemmtilegri. Tökum þetta bara skipulega:

19. okt: An Evening with SigurRós
SigurRós stóðu fyrir sínu og spiluðu nokkur lög áður en þeir sýndu heimildarmyndina sína "Heima". Þeir spiluðu órafmagnað og það var alveg ótrúlega flott hjá þeim! Ég hef aldrei heirt þá spila þannig áður (enda hafa þeir aldrei gert það fyrr en nýlega) og eftir myndina sögðu þeir frá því að þetta hafi bara verið útaf tónleikunum sínum hjá Kárahnjúkum þar sem þeir neyddust til þess að prófa það. Það hljómaði líka svona vel að þeir hafa spilað órafmagnað á nokkrum tónleikum síðan. Eftir myndina var semsagt spjall við hljómsveitina og leikstjóra myndarinnar þar sem áhorfendur gátu spurt spurninga og það var mjög áhugavert og fékk mann til að sjá hljómsveitina og myndina þeirra í öðru ljósi. Mjög vel heppnað kvöld með SigurRós.

24. okt: Muse í Forum
Ég bloggaði síðast þegar við vorum á leiðinni á Muse í Forum, og það var mikill spenningur í okkur. Þeir stóðu fyrir sínu, með flott show, og auðvitað ótrúlega kraftmikla og góða frammistöðu. Lögin þeirra eru svo tónleikavæn að það er engu lagi líkt. Sjúklega mikill troðningur við fatahengið eftir tónleikana setti svip sinn á kvöldið og það leið næstum því yfir Ósk sem hræddi okkur bæði frekar mikið. Það fór samt allt vel að lokum.

7. nóv: Arcade Fire í KB-Hallen
Við höfðum beðið eftir þessum tónleikum síðan í mars, þegar þeir hættu við tónleikana deginum áður en þeir áttu að vera haldnir. Til að vera örugg með að miðarnir okkar síðan þá væru enn í gildi hafði ég sent Billetlugen, fyrirtækninu sem sá um miðana, póst og spurt hvor svo væri ekki. Þeir staðfestu það og sögðu okkur engar áhyggjur að hafa. Sama dag og tónleikarnir voru, eftir að hafa heyrt að sumir hafi fengið endurgreitt án þess að hafa beðið um það, athuga ég svo kreditkortið mitt í netbankanum og sá að við höfðum fengið miðana endurgreidda í apríl! Ég neitaði að trúa því og við fórum á tónleikana með miðana okkar, og útprentaðan tölvupóstinn frá fyrirtækinu, því við höfðum alls ekkert viljað fá endurgreitt! Eftir að gaur í dyrunum hafði eytt 10 mínútum í símann við einhvern (kannski þann sem sendi mér póstinn) til að athuga hvort við mættum fara inn, var okkur svo hleypt inn. Það voru ófáir sem voru ekki svo heppnir og stóðu fyrir utan með ógilda miða.

En nóg um það! Tónleikarnir voru frábærir, vægast sagt. Við vorum í stúkunni allan tímann, ólíkt Muse tónleikunum en þá vorum við á gólfinu. Það var virkilega skemmtilegt að sjá hvað hljómsveitin skemmti sér vel, og auðvitað er æðislegt að heyra tónlist sem maður þekkir eins og handarbakið á sér spilaða á sviði. Þetta var æðislegt, og skrítið að hugsa til þess hversu litlu munaði að við hefðum ekki fengið að fara inn.

21. nóv: Ísland - Danmörk, EM-forkeppni í Parken
Eins og flestir vita eflaust þá tapaði Ísland fyrir Danmörku 3-0 í EM-forkeppninni. Leikurinn skipti þó engu máli því hvorug þjóðin hefði getað komist áfram. Kannski útskýrir það litla aðsókn, en Gilli frændi benti á það í komment-kerfinu að það hefði ekki verið svona lítil aðsókn á landsleik á Parken í 30 ár! Kannski á það bara vel við, því Ísland skoraði síðast mark í landsleik í Danmörku árið 1974, fyrir 33 árum síðan. Við vonuðumst eftir því að þeir næðu að pota boltanum amk einu sinni í netið hjá Baunum, en varð ekki að ósk okkar. Það var samt mjög gaman að prófa að fara á landsleik í fótbolta, og líka á svona stórum leikvangi. Þannig að þetta var mjög gaman þrátt fyrir tapið. :)

26. nóv: múm á Lille-Vega
Í gærkvöldi voru síðustu tónleikarnir okkar í þessari tónleika-hrinu þegar við sáum múm spila á litla Vega. Við höfum ekki hlustað á þá lengi, en höfðum heyrt góða hluti um frammistöðu þeirra á tónleikum og ákváðum því að skella okkur. Þeir stóðu sig mjög vel og þrátt fyrir að við höfum ekki þekkt lögin þá var gaman að sjá hvað þau eru frumleg og hæfileikarík. Þó má segja að upphitunarhljómsveitin Seabear hafi stolið senunni, því við vorum alveg yfir okkur hrifin af þeim og keyptum okkur diskinn þeirra eftir tónleikana. Þau eru líka íslensk og ég held að þau hafi átt einhver vinsæl lög á Íslandi þótt ég viti ekkert hvort fólk viti af þeim eða ekki. Þetta er mjög þægileg og róleg tónlist en hress og skemmtileg inn á milli. Mæli hiklaust með þeim, og auðvitað múm líka. :)


Jól
Ég kem heim 18. desember en stoppið verður stutt því fyrsta prófið okkar er 4. janúar. Þangað til verðum við á milljón að vinna lokaverkefnið okkar því það er lítið eftir af önninni en við eigum langt í land með að klára verkefnin.

Maggi.

MUSE Í KVÖLD

Muse eru ekki vanir því að leggja lítið í show-ið þegar þeir spila á tónleikum. Ég held að kvöldið í kvöld verði lengi í minnum haft.

Tónleikar og fótbolti

Það er búið að vera brjálað að gera hjá okkur undanfarið í skólanum. Fyrir utan verkefnavinnu þá erum við búin að vera í fyrirlestra-törn og ótrúlega mikið lesefni fyrir hvern tíma og oft á tíðum heimaverkefni eftir tímann. En nú er betri tíð framundan. Ekki það að skólavinnan eigi eftir að minnka eitthvað, heldur er að taka við törn af tónleikum og uppákomum! :D Hérna er það sem er planað hjá okkur Ósk í október og nóvember:

19. okt: An Evening with SigurRós
24. okt: Muse í Forum
7. nóv: Arcade Fire í KB-Hallen
21. nóv: Ísland - Danmörk, EM-forkeppni í Parken
26. nóv: Múm á Lille-Vega



An Evening with SigurRós er núna á föstudaginn, þá verður myndin Heima sýnd en á undan því spilar SigurRós nokkur lög fyrir áhorfendur. Ísland - Danmörk í EM undankeppninni verður örugglega virkilega gaman því við Ósk ætlum að fjölmenna með slatta af Dönum úr deildinni okkar. Þannig að þið leitið að okkur í dönsku stúkunni, eina fólkið með íslensku litina! Úff, ef við vinnum þá erum við í vondum málum.



Fyrir utan allt þetta erum við búin að kaupa miða á The Cure 13. febrúar! Þannig að við ætlum heldur betur að verðlauna okkur fyrir allt stritið. Það er líka miklu ódýrara að fara á tónleika hérna heldur en á Íslandi, þannig að auðvitað nýtir maður tækifærin þegar þau gefast. :)

Magggi.

Stop Motion

Um daginn í skólanum gerðum við stutt animation á nokkrum klukkutímum. Hópurinn minn notaðist við Street Fighter kall auk annarra hluta og hérna er afraksturinn!



Maggi.

Netið heim

Ég er reyndar í skólanum að blogga núna, en við erum komin með netið heima! Og því ekkert til fyrirstöðu að við getum verið á Skype eða MSN þegar við eigum að vera að læra. :)

Við eigum enn eftir að snurfusa pínulítið í íbúðinni áður en við tökum myndir af öllu og setjum á netið.

Við erum ekki enn komin með sjónvarp en það er á dagskrá að kaupa eitt slíkt. Við erum þó með skjávarpann og höfum horft á nokkrar bíómyndir síðan við komum út og merkilegt nokk þá hafa flestar þeirra verið virkilega góðar.


Reign Over Me
Adam Sandler fer á kostum í þessari frábæru mynd sem er þó langt frá því að vera týpísk "Sandler-mynd". Lýsingin á myndinni á imdb.com er á þessa leið: A man (Sandler) who lost his family in the September 11 attack on New York City runs into his old college roommate (Cheadle). Rekindling the friendship is the one thing that appears able to help the man recover from his grief.


Knocked Up
Sáum þessa í gærkvöldi. Mjög fyndin, eða fíluðum við Ósk amk húmorinn í henni í tætlur. Tekur sig ekki of alvarlega. imdb.com: or fun loving party animal Ben Stone, the last thing he ever expected was for his one night stand to show up on his doorstep eight weeks later to tell him she's pregnant.


Hot Fuzz
Snilldar grínmynd frá gaurunum sem gerðu Shaun of The Dead. imdb.com: Jealous colleagues conspire to get a top London cop transferred to a small town and paired with a witless new partner. On the beat, the pair stumble upon a series of suspicious accidents and events.

Skrifa kannski um fleiri myndir síðar, en ég mæli amk hiklaust með þessum þremur. :)

Maggi.

Netþurrð

Ég lofa að blogga þegar við erum komin með netið heima, en það gengur eitthvað brösulega. Við pöntuðum það um leið og við vissum hvar við myndum búa og áttum að fá það í gang í gær, en við höfðum engan útbúnað fengið eins og þeir voru búnir að lofa! Vonandi reddast það fljótlega. Annars allt gott að frétta, búin að koma okkur mjög vel fyrir í íbúðinni og við erum ótrúlega sátt með hana! Alveg fullkomin fyrir okkur og við komum öllu dótinu okkar fyrir. :) Skólinn gengur ágætlega, nóg að gera og flestir tímarnir mjög áhugaverðir. Meira síðar! :)

Maggi.

Góða ferð, góða ferð, góða feeeeerð!

Svo mæltu Stebbi og Eyfi og voru eflaust að tala til mín og Óskar. Við förum til Danmerkur næsta sunnudag til að takast á við þriðju önnina okkar í Medialogy. Við höfum reynt hörðum höndum allan mánuðinn að redda okkur íbúð í Köben og það var ekki fyrr en núna um helgina að við höfðum erindi sem erfiði. Og gott betur en það! Við fengum æðislega íbúð, ódýra, á fínum stað. Það er hægt að sjá myndir af íbúðinni hér á robinhus.dk og hægt er að sjá staðsetningu hennar með hjálp findvej.dk. Það er virkilega almennilegur gaur sem á hana og vildi hjálpa einhverjum góðum stúdentum með því að leigja ódýrt á meðan hann reynir að selja íbúðina. Jon vinur okkar úr skólanum fór og spjallaði við hann og skrifaði undir samning í okkar nafni, þannig að allt er klappað og klárt!

Eini ókosturinn er nafnið á hverfinu og götunni. Það er ekki nóg með að við búum í Rødovre, þá búum við á Rødovrevej! Og fyrir þá sem ekki vita, þá er mjööög erfitt að segja Rødovre með réttum dönskum hreim! Það er ekki sjens að Danirnir skilji okkur ef við segjum þetta með íslenskum hreim, þannig að við erum í vondum málum ef við ætlum að taka leigubíl heim til okkar. Ósk stakk uppá því að við búum okkur til plöstuð kort með heimilisfanginu okkar á! Ætli það sé ekki besta lausnin.

Maggi.

Maggi Simpson

Roskilde, Taður o.fl.

Eins og aðrir bloggarar vita þá verður alltaf erfiðara að blogga því lengra sem líður frá því að maður bloggaði síðast. Í það minnsta þeir bloggarar sem segja frá því sem á daga þeirra drífur. En það þýðir ekki að leggja árar í bát og gefast upp heldur bretta upp ermarnar og gefa 110%.

Við fórum á Hróarskeldu. Hún var blaut, drullug og skemmtileg. Björk, Arcade Fire og Muse voru bestu tónleikarnir eins og við bjuggumst við. Í staðinn fyrir að setja myndir á netið setti ég myndir í TVF (Tímarit Víkurfrétta) og þið getið nálgast það í sjoppum og matvörubúðum hér á Suðurnesjum. :)

Síðan við komum heim hefur ýmislegt gerst líka. Hið árlega, opna, alþjóðlega Biggapúttmót var haldið fyrir rúmri viku síðan og ég kom, sá og sigraði með því að byrja fyrstu 18 holurnar á 6 undir pari. Það hef ég ekki gert áður og verður erfitt að leika eftir. Á mánudaginn fyrir viku átti ég afmæli og fyrst fjölskyldan mín var öll annað hvort úti á landi eða í Danmörku þá fékk ég Óskar fjölskyldu lánaða. Ósk eldaði fyrir mig og bakaði köku og hvort tveggja var mjög vel heppnað. Ég fékk líka fullt af pökkum og þar stendur hæst svona harður diskur frá Ósk. Algjör snilld því hann er pínulítill og það þarf ekki að stinga honum í samband við rafmagn. Mælimeðissu. :) Eftir afmælismatinn fórum við í keilu og það var mjög gaman! Nokkrir lögðu leið sína í Öskjuhlíðina alla leið úr Keflavík og nokkrir úr Reykjavík líka.

Um helgina fórum við svo í hinn árlega AfmælisTað og var hann virkilega vel heppnaður. Þar fékk ég enn fleiri pakka, og hæst ber þar að nefna 4.7 kg Toblerone! Rosalega, rosalega, rosalega stórt! Mikið hlegið að því sem og öðru sem gerðist um helgina. Takk fyrir mig og takk fyrir komuna allir sem mættu!

Vinnan hefur gengið vel og hefur mikið snúist um golf. Og það mun ekki linna mikið á næstunni, Íslandsmótið í golfi verður haldið á Hvaleyrarvelli í Hafnarfirði um helgina og ég verð þar alla fjóra keppnisdagana að skjóta og klippa vídjó.

Hmm, þetta varð nú ekki jafn langt og ég bjóst við! Enda var þetta farið á hundavaði. Kannski ég bloggi aftur fljótlega. Hver veit! Ekki ég.

Maggi.

Roskilde Festival

Eftir fyrstu Hróarskelduna mína sagði ég að ég myndi fara næstu tíu árin. Þetta er fimmta árið og ég er ekki enn búinn að sleppa hátíð! Við erum að leggja af stað rétt á eftir. Vonandi rætist veðurspáin EKKI. :) Sjáumst á Íslandi.

Maggi.

25. kafli

Þegar við skildum við Magnús síðast var hann í miðjum prófundirbúningi í hitabylgju í Kaupmannahöfn. Það er heldur betur búið að skipast veður í lofti síðan þá. Það er komin rigning. Við skyggnumst inní hugarheim hans...

Já við erum búin að standa í ströngu síðan ég bloggaði síðast. Prófin okkar gengu vel. Við vitum ekki enn hvað við fáum í forritunarprófinu en náum eflaust bæði, við náðum bæði stærðfræði (engin einkunn í því fagi, bara fallið eða náð), og fengum bæði flotta einkunn í stóra lokaprófinu.

Um leið og prófin kláruðust fór að rigna og hefur rignt síðan! Eða því sem næst. Við erum reyndar alveg sátt við það svo lengi sem rigningin teygir sig ekki yfir Hróarskeldu. Veðurspáin er búin að breytast fram og til baka undanfarna daga og við vitum eiginlega ekki við hverju við eigum að búast. En að öllum líkindum verður sitt lítið af hverju, smá rigning, smá sól. Eflaust smá drulla. En bara smá.

Undanfarin vika er búin að fara í að pakka, þrífa og flytja. Og í þessum skrifuðu orðum er allt sem við eigum pakkað, þrifið og flutt! Við erum búin að afhenda lyklana og fá "thumbs up" á þrifin okkar og ástand íbúðarinnar. Kolla, Birna og Camilla voru svo frábærar að geyma allt dótið okkar í sumar og það var flutningabíll frá Rent-A-Wreck sem hjálpaði okkur að flytja dótið til þeirra.

Næst á dagskrá er svo... Hróarskelda! Og við stefnum á að hún verði góð. Vonandi eruð þið heima ekki að drukkna í umferðinni, er búinn að heyra hryllingssögur af undanförnum ferðahelgum. :)

Maggi.

Snertanlegt hljóð

24°C hiti í dag. Heitara á morgun. Búið að vera svipað undanfarna daga og er ekkert að fara að kólna í bráð eins og sjá má á veðurspánni fyrir næstu daga. 25-30°C hiti amk fram á miðvikudag!



Mikið rosalega er erfitt að fá sig til að læra undir próf í svona hita. Hvað þá forritun sem er búin að vera hrikalega leiðinleg þessa önnina. Forritun getur verið fín, en þetta snýst allt um að búa til "diagrams" og skipuleggja sig og einhver leiðindi.

Í dag fórum við á Sound Days, þar sem einhverjir skólar og listamenn sýndu ýmis verk sem tengjast hljóði. Hópurinn hennar Óskar fór með lokaverkefnið sitt fyrir þessa önn sem snýst um að gera hljóð snertanlegt. Þau stálu senunni og fengu virkilega jákvæð viðbrögð hjá öllum, jafnt krökkum sem gamalreyndu fólki í hljóð-bransanum. Við fengum okkur líka ís og spiluðum Hacky Sack og höfðum það notalegt í skugganum. Frábær dagur. Þegar við komum heim gerði ég við hjólið mitt og við ætlum að hjóla í skólann á morgun í hitanum. Held að við verðum að taka fram sólvörnina. :)

Over and out!

Maggi.

Búin, loksins búin

Þá er lokaverkefnið á enda. Um leið og við erum búin að ná andanum aftur þá hefst þriggja vikna prófatörn. Þrátt fyrir að skýrslan hafi ekki verið tilbúin fyrr en kvöldið fyrir skil þá náði ég að eyða nóttinni í að búa til smá vídjó fyrir verkefnið. Þetta er nú hvorki stórt né mikið vídjó en við lentum í eintómu veseni við að búa það til og þessvegna tók það alla nóttina. Hér er afraksturinn.



Maggi.

Vf.is Widget

Á meðan ég er ekki að vinna að lokaverkefninu mínu þá bý ég til Widget! Hér er Vf.is Widget sem sýnir nýjustu greinarnar á síðunni. Þið Suðurnesjafólk sem notið makka getið sótt hann hér! Hér sjáið þið svo framan og aftan á Widget-inn.





Maggi.

Fallegt lag fyrir svefninn

Alexi Murdoch er mjög hugljúfur og skemmtilegur tónlistarmaður. Hér er lag með honum sem heitir Orange Sky af plötunni Time Without Consequence.



Maggi.

Lokaspretturinn

Tveir dagar eftir af lokaverkefninu! Brjálað að gera.



Maggi.

A-N-DRÉ-S!

Það klikkaði fyrir mánuði síðan að setja inn myndbandið sem við gerðum fyrir hann Andrés. Ef einhver vanmetur þá vinnu sem fer í að gera tónlistar myndband þá... ég veit ekki alveg hvernig ég ætlaði að klára þessa setningu. En það er amk mikil vinna! :D Þrátt fyrir að eitthvað skorti uppá sönghæfileikana hjá okkur sem gerðum myndbandið þá er textinn við lagið þeim mun betri. :) Njótið vel!



Maggi.

Widget

Ég rakst á mjög skemmtilegt forrit í gær. Það heitir Dashcode og er það notað til að búa til Widgets á auðveldan hátt. Þeir sem eru makka-notendur þekkja þetta hugtak væntanlega vel en fyrir hina, þá eru þetta lítil forrit sem birtast á skjánum þegar maður kallar á Dashboard, sem er í öllum epla-tölvum.

Að sjálfsögðu stóðst ég ekki mátið og bjó mér til minn eigin Wdget sem sýnir öll nýjustu kommentin á blogginu mínu. Þannig að ég þarf ekki að opna bloggið mitt til að skoða kommentin heldur opna ég bara Dashboard og þar eru þau! Fyrir utan að þetta sparar tíma þá eru líka minni líkur á því að ég missi af kommenti ef einhver kommentar á eldri færslur. Svona lítur Widget-inn minn út:



Ég efast um að einhver sé svo mikil áhugamanneskja um bloggið mitt að þau langi í þennan Widget, en hey, af hverju ekki að leyfa ykkur makkafólki að prófa. :)

maggi.tk comments widget

Maggi.

Fleiri getraunir

Þetta var greinilega allt of auðvelt í síðustu færslu. Hér kemur önnur getraun. Í þetta skiptið eru það þrjú mismunandi geisladiskahulstur;



Það er leyfilegt að giska bara á eitt ef þú nærð ekki öllum.

Maggi.

Getraun

Brjálað að gera! Vika í skil á lokaverkefni. Hér er getraun.

Framan á hvaða geisladisk er þessi mynd?
(Ath. þetta er bara lítill hluti af myndinni)



Maggi.

One

Ég veit að Metallica or U2 eru sammála mér, þetta orð er til. Hérna er líka sönnun á því! En sumir vilja bara ekki viðurkenna þetta.



Maggi.

Loka

Lokaverkefnið okkar er nú í algleymingi (alltaf hefur mér þótt þetta orð verið vitlaust notað, mér finnst það sem er í "algleymingi" vera mjög auðgleymt, en svo er víst ekki). Við erum í skólanum alla daga þótt fyrirlestrarnir séu löngu búnir og vinnum eins og við ættum lífið að leysa. Þegar þetta er skrifað eru tvær og hálf vika í skil.

Þetta er dæmi um það sem ég hef verið að vinna undanfarna daga og vikur. Þetta er "patch" í forriti sem heitir Max/MSP. Þetta forrit er notað til að búa til tónlist meðal annars en það sem ég sýndi ykkur notum við í verkefninu til að reikna stigin í tölvuleiknum okkar. Þetta er svona einn tíundi af því sem ég er búinn að gera í forritinu. Ég veit þetta lítur illa út (og þess vegna sýndi ég ykkur það!) en þetta er frekar skemmtilegt barasta. Alltaf gaman að kunna eitthvað sem lítur út fyrir að vera rosalega flókið! :)

Allt gott að frétta úr Danmörku. Gott veður flesta daga en við náum að sjálfsögðu ekki að njóta þess. En það styttist í að mánaðarkortin okkar í strætó renni út og þá verður hjólað í skólann á hverjum degi! Þá verðum við sko brún og stælt, bíðiði bara.

Maggi.

Smá próf...

## Update! Könnunin er búin. Til ykkar sem tókuð þátt, takk fyrir! ##

Ég ætla að biðja þig lesandi góður að taka smá próf fyrir mig. Þetta tekur eina mínútu og þú þarft að prófa smá leik og svara svo einni spurningu í lokin. Þetta er á ensku en ég býst nú við því að flestir sem þetta lesa kunni ensku.

Smelltu hér til að taka prófið

Takk fyrir hjálpina! :)
Maggi

"Help, I'm in a nutshell!"

Ég var að lesa blogg hjá manni sem er mjög ósáttur við íslenskukunnáttu þeirra sem vinna hjá mbl.is. Ég er hættur að kippa mér upp við að þar komi fram stafsetningar- og málvillur því þær eru orðnar ansi algengar. En ég varð að röfla svolítið sjálfur um uppsetningu frétta hjá þeim. Þeir taka sig stundum til og setja neðst í fréttina stuttan texta með fyrirsögninni "Í hnotskurn". Maður hefði ætlað að það þýddi að fréttin væri endursögð í mjög stuttu máli fyrir þá sem vilja vita eitthvað um innihald hennar án þess að lesa hana alla. Maður hefði líka búist við því að sniðugra væri að hafa slíkan texta fyrir ofan fréttina svo maður reki ekki augun í þetta þegar maður er búinn að lesa fréttina. Þeir sem eru búnir að lesa alla fréttina ættu heldur ekki að þurfa að lesa hana "í hnotskurn" því þeir eru búnir með hana alla. En þetta er bara það sem mér finnst.

Þeim hjá mbl.is finnst greinilega að fréttin í hnotskurn þurfi ekki að innihalda eina einustu staðreynd sem kom fram í fréttinni heldur eingöngu nýjar staðreyndir. Sbr. þessi frétt:

Hætt við Live Earthtónleika í Reykjavík

Mér finnst þetta alveg fáránlegt. Vonandi átta þeir sig á þessu og breyta þessu fyrirkomulagi.

Í hnotskurn
- Stærsti fíll sem veiðst hefur var 12 tonn og 4.2 metrar á hæð.
- Lake Geneva er stærsta stöðuvatn í mið-Evrópu.
- Susie Hewer á heimsmetið í "að prjóna trefil á meðan maður hleypur maraþon". Trefillinn hennar var 1.2 metrar.


Maggi.

Please wait

Mér fannst þetta fyndið.

Maggi.

Þrívídd á baráttudegi verkalýðs

Ekki versnar það.

Í dag var síðasti dagurinn hans Hilmars hjá okkur hér í Köben og nýttum við hann í að skoða Planetarium Tycho Brahe. Það var mjög fínt, byrjuðum á að fara í þrívíddarbíó í IMAX bíósal og skoðuðum okkur svo um á safninu og fræddumst um stjörnufræði. Svo var meira þrívíddarbíó, bæði rússíbani og safarí í Afríku, en safaríið var toppurinn á þessari heimsókn að mínu mati. Ótrúlegar myndir af fílum í návígi og ennþá ótrúlegra að sjá þá í þrívídd svona nálægt.

Eftir það fór Hilmar uppá flugvöll en ég og Ósk nýttum bæjarferðina og fórum í Fields og keyptum okkur brauðrist! Hún er búin að vera lengi á innkaupalistanum en við fundum ekki þá réttu (lesist; nógu ódýra) fyrr en í dag.


Hver man ekki eftir þessum?
Framundan er brjáluð vinna við að klára lokaverkefnið sem á að skila í lok mánaðarins. Nóg er eftir og því þurfa hóparnir okkar að láta hendur standa fram úr ermum ef við viljum skila góðum verkefnum. Báðir hóparnir voru með þeim hæstu á síðustu önn og vonandi verður engin breyting þar á.

Maggi.

Einkahúmor

Það leiðinlega við að blogga á hverjum degi er að maður fær svo fá komment! Hér kemur myndbandið sem við gerðum fyrir hann Jóa. Það er stuttmynd og fjallar um nokkur umtöluð atriði í hans lífi. Þetta er frekar mikill einkahúmor þannig að ætli það séu ekki mest þeir sem þekkja Jóa sem hafa gaman að þessu.


Maggi.

Göngutúr

Hilmar pabbi hennar Óskar er í heimsókn hjá okkur og við röltum um borgina og skoðuðum nokkra fræga túristastaði, til dæmis Nyhavn og Litlu hafmeyjuna. Það var frábært veður eins og er búið að vera undanfarna daga og þetta var mjög góður göngutúr. Í kvöld er svo planið að horfa á mafíósamyndina The Departed og hafa það gott. Vonandi var þessi sunnudagur hjá ykkur jafn næs og hjá okkur.
Maggi.

Nýjung(agirni)

Það eru ár og aldir síðan ég hef gert eitthvað nýtt á blogginu mínu og það var því heldur betur kominn tími til. Ég bjó til smá Flash sem birtir nýjustu bókamerkin sem ég set inn í Firefox. Ég rakst nefnilega um daginn á síðu sem heitir því óþjála nafni del.icio.us og er mikið notuð af fólki sem vill hafa bókamerkin sín á netinu svo hægt sé að nálgast þau úr öllum tölvum. Auðvitað langaði mig að prófa þetta og ákvað að deila því sem mér finnst vert að muna með fólkinu sem les bloggið mitt. Þannig að ef þú kemur hér inn og ég hef enga færslu skrifað (sem er þó harla ólíklegt) þá getur þú fundið einhverja afþreyingu í að kíkj á linkalistann hér á hægri hönd. :)
Maggi.

E.s: Það eru víst smá byrjunarörðugleikar á þessu. Endilega látið vita hvort þetta virkar hjá ykkur og hvaða stýrikerfi og vafra þið eruð að nota. (Gæti verið að þú þurfir að leyfa pop-up fyrir þessa síðu.)

Sumar

Þetta er ekki amalegt.



Það er heldur betur farið að vora hjá okkur, jafnvel hægt að segja að sumarið sé komið í allri sinni dýrð. Verst að við þurfum að hanga inni í heilan mánuð í viðbót og vinna að lokaverkefninu okkar. Eftir það taka við þrjár vikur af prófum. Síðustu vikuna í júní þurfum við svo að flytja úr íbúðinni okkar. Eftir það er það Hróarskelda og svo heim! Jább, ákvörðunin er tekin, við munum fara á Hróarskeldu. Það eru verðlaunin okkar eftir fyrsta árið okkar í skólanum. Gott að taka sér pínulítið frí áður en maður fer svo heim til að vinna í allt sumar. Við Ósk vinnum á sömu stöðum og í fyrra og allt stefnir í mjög gott sumar. Ekki verra að byrja það á smá hitabylgju! :p

Maggi.

X-Moto

Ég og fleiri höfum endurvakið gamla fíkn á þessari önn en fíknin hefur nú breytt um nafn. Hún hét áður Elasto Mania, æðislegur mótorhjólaleikur sem var mjög undarlegt að stjórna. Það er komin ný útgáfa af þessum leik og heitir hann X-Moto.



Það er alveg merkilegt hvað maður getur festst í honum og tíminn flýgur frá manni ef maður álpast til að opna hann. Leikurinn er ókeypis og má hann finna hér:

Sækja X-Moto

Svo hef ég ákveðið að setja inn vídjóið hans Andrésar sem átti afmæli um daginn. Textinn er mun betri en söngurinn! :p



Maggi.

DVD

Ætlaði ég annars ekki að byrja á blogg átakinu í dag? :) Það er margt búið að drífa á daga okkar undanfarið. Sista mamma hennar Óskar kom í heimsókn til okkar um páskana og fjölskyldan hans Bigga líka! Það var mjög gaman, fjölskyldupáskar og auðvitað ofát á íslenskum páskaeggjum og meira að segja íslenskt lambalæri og hangikjöt á boðstólnum líka!

Eftir páskana tók við mikil vinna við að klára myndbönd sem við höfðum ákveðið að gera í tilefni af 25 ára afmælum Jóa og Andrésar. Jói átti reyndar afmæli í mars en við náðum ekki að klára myndbandið í tæka tíð eftir að afmælinu var flýtt. Það kom þó ekki að sök því við gerðum myndböndin bara á sama tíma og sýndum þau í afmælinu hans Andrésar sem var haldið síðustu helgi. Það var virkilega vel heppnað og þeir voru mjög ánægðir með gjafirnar sínar. Við bjuggum líka til DVD-cover fyrir myndirnar og DVD diska með alvöru valmynd og aukaefni og flottheitum. Ég set kannski myndböndin hérna inná fljótlega til að halda smá spennu í þessu en til að byrja með set ég DVD coverinn hér inn.

DVD-hulstrið hans Andrésar.
DVD-hulstrið hans Jóa.

Maggi.

Metnaður

Ég get sko svarið það. Ég er búinn að blogga á hverjum degi í þennan mánuðinn en einhvernvegin tekst blogger að henda út hverri færslunni á fætur annarri! Það virðist vera að ég hafi ekki bloggað síðan 25. mars!

...neeeeiii, ég fæ mig ekki til þess að ljúga að ykkur. Þetta er leti. Það má kalla það blogg-leti, skrif-leti eða bara almenna leti. Ég er ekki búinn að blogga í tæpan mánuð og það er skammarlegt! Ég ætla að bæta úr því. Það besta er að setja markmið eins og ég gerði um daginn. Eitt blogg á dag í amk viku! Höfum það amk átta daga svo það sé nú meira en síðast. :)

Í tilefni þess hvað ég ætla að vera duglegur næstu daga þá ætla ég að láta hér staðar numið. Meira á morgun!

Maggi.

Our House, in the middle of our street!

Hvað var Dr. House að gera á miðri götunni?

Einar Freyr var nokkuð nálægt því að finna lausnina á gátunni! Þar sem það var ekki til nein ákveðin lausn þá fær hann verðlaunin. Verðlaunin eru sú að hann fær ókeypis áskrift að blogginu mínu til ársins 2015. Til hamingju Einar! Lausnin hans Einars var:

Will heaven fix a knife for the tree to win?
No, heaven will fix 7654321 knives to win.

Önnur lausn hefði getað verið;

Will heaven fix a knife for the tree to win?
Yes, seven will six a five four the three two one.

En nóg af þessu bulli. Þetta er Ísland.




Ég bjó til vídjó sem mun spilast á undan fréttum í Vef-TV-inu á vf.is. Það er ekki enn komið í notkun en fylgist með og sjáið hvað mér tókst að galdra fram með After Effects.

Við týndum klukkutíma í dag! Þannig að núna erum við hér í Danmörku tveimur tímum á undan ykkur á Íslandi.

Þetta er ein samhengislausasta færsla á þessu bloggi.

Maggi

Hint

Heaven, fix, knife, for, tree, to, win.

Maggi.

Gáta

Mér datt í hug kjánaleg gáta í gær. Hún hljóðar svona:

Will heaven fix a knife for the tree to win?

Ég veit hún hljómar ekki einu sinni eins og gáta, en það er samt til lausn á henni.

Þetta tókst hjá mér! Að blogga einu sinni á dag í eina viku. Reyndar fylgdi svo vika þar á eftir sem ég bloggaði ekki neitt. Vá hvað tíminn er fljótur að líða! Það er alveg ótrúlegt. Það er miður mars, það eru að koma páskar! Ég skil bara ekkert í þessu.

Síðustu helgi fórum ég og Biggi til Horsens í afmælið hans Jóa. Það var vel heppnað, mikið af fólki og góð stemmning. Ég gaf Jóa dónapúðann í afmælisgjöf. Þeir sem fatta djókinn fatta hann, hinir fatta hann ekki.

Annars er lítið að frétta. Nóg að gera í skólanum og á öðrum vígstöðvum. Við erum farin að hjóla í skólann og það er komið vor! :)
Maggi.

Myspace

Myspace.com er ekkert sérlega falleg heimasíða. Á Myspace eru kringum 100 milljón notendur og eiga þeir hver sína síðuna. Maður hefði haldið að Myspace myndi hjálpa notendum að búa til síður sem líta ágætlega út en því miður, þvert á móti, þá eru síðurnar hjá þessum 100 milljón notendum virkilega ljótar. Myspace gefur notendum lausan tauminn við það að hanna síðurnar sína og þar sem fæstir þeirra eru vefhönnuðir þá er útkoman sú að þessar 100 milljón síður eru hver annari ljótari. Þetta er gríðarleg afturför á netinu, og minnir mann helst á árabilið 1998-2001 þegar fólk var að uppgötva að það gæti búið til heimasíður og tróð þær fullar af GIF myndum og öðrum óþverra.



Jájá, Myspace er æðislegt, og þú getur sýnt öllum heiminum að þú eigir átta þúsund vini og þröngvað uppáhalds laginu þínu uppá alla þá sem heimsækja síðuna þína sama hvort þeir vilji það eða ekki. En ég fatta þetta bara alls ekki. Maður á kannski ekki að dæma bók eftir kápunni en ég geri það hiklaust í þessu tilfelli. Mér finnst Myspace síður pirrandi, virkilega ljótar og illa upp settar og ég fer sjaldnast inná þær. Hver einasta síða lítur út fyrir að vera hönnuð af 12 ára stelpu sem reyndi að troða eins miklu rusli og hún gat inná hana og hefur ekki hundsvit á vefhönnun. Ef þú, lesandi góður, átt Myspace síðu sem er með þungum bakgrunni sem scrollast ekki niður með textanum, textinn á síðunni er í mörgum litum og vart læsilegur útaf bakgrunninum, og það spilast sjálfkrafa lag þegar maður kemur inná síðuna, gerðu þá öllum greiða og lagaðu þessa hluti á síðunni, eða lokaðu henni með öllu.
Maggi.

Rétt slapp!

Já, það er vesen að setja sér eitthvað svona markmið og svo er maður næstum því búinn að klúðra því. Ég er nú bara farinn að sötra bjór því vinkonur Óskar og Arndísar eru í heimsókn og við ákváðum að gera okkur glaðan dag. Á morgun er svo planið að kíkja til Horsens í amælisveislu hjá Jóhannesi Bjarna Bjarnasyni vini okkar Bigga. Stelpurnar verða eftir til að skemmta hinum stelpunum en við Biggi mætum til Horsens og tryllum lýðinn. Það verður stuð. Vonandi verður helgin ykkar skemmtileg. :)
Maggi.

Norsk hrísgrjón

Fyndið hvað maður dæmir vörurnar sem maður kaupir mikið af pakkningunum. Maður hefur kannski ekki hugmynd um gæði einhverrar vöru en ef pakkningin lítur vel út þá bara hlýtur þetta að vera eðal-vara. Við keyptum okkur hrísgrjón um daginn. Það er í sjálfu sér ekki í frásögur færandi nema af því að þegar kom að því að sjóða þau kom babb í bátinn.



Pakkinn leit mjög vel út, professinal pakkningar ef svo má að orði komast. En þegar kom að því að lesa leiðbeiningarnar aftaná var augljóst að það hafði ekki mikið verið vandað til verks. Það fer eftir því í hvaða landi maður er hversu lengi maður á að sjóða grjónin.

Í Svíþjóð skulu þau sjóða í 15 mínútur og malla undir loki í 5 mínútur. Í Danmörku hinsvegar eiga grjónin að sjóða í 10 mínútur og svo heilar 10-15 mínútur undir loki. Norðmennirnir eru hinsvegar á því að grjónin eigi að sjóða í 15 mínútur og malla svo í 3-5 mínútur undir loki. Svo er pæling með aðra hluti eins og hvort það eigi að vera akkúrat 1/4 teskeið af salti eða bara um það bil. Þetta geta norrænu þjóðirnar ekki verið sammála um.



Ég sauð að lokum bara hrísgrjónin þar til mér fannst þau vera tilbúin.
Maggi.

House-Cola

Við Ósk vorum að horfa á þáttinn okkar, House, í dag og Ósk fattaði eitthvað í þættinum sem ég fattaði ekki. Hún sagði mér hvað það var og ég sagði "Vá hvað þú ert klár!". Þá sagði hún "Ég veit, enda er ég í háskóla!" Við litum á hvort annað og föttuðum brandarann á sama tíma... "House-Cola!"

Já svona erum við með góðan húmor. Ég vildi að það væri til House-Cola, ég myndi drekka það.



Mouse.

P.s: Við ætlum á Hróarskeldu! Ósk bloggaði um það.

Kaupmannahöfn

Hér er mynd af Kaupmannahöfn og inná hana er ég búinn að merkja hvar við eigum heima og hvar skólinn okkar er. Við erum 20 mínútúr niður í miðbæ með strætó, og svipað á leiðinni í skólann. Við erum mjög sátt við þessa staðsetningu og langar helst ekkert að fara frá Brønshøj.



Stutt og laggott í dag.
Maggi.

In Theaters July 2007

Mér hefur alltaf þótt The Simpsons skemmtilegir þættir og um tíma var ég meira að segja aðdáandi og tók alla þætti sem ég gat upp á spólu. Ég átti einhverjar tíu fullar spólur af þáttum sem er nú ágætis slatti. En svo flutti Simpsons yfir á Stöð 2 og við vorum aldrei með Stöð 2 á mínu heimili. Ég reyndi stundum að sjá þættina hjá vinum sem voru betur settir í sjónvarpsmálum en að lokum hætti ég að reyna. Ef ég slysast til að sjá þátt þá þykir mér það skemmtilegt en ég sækist ekki í það eins og áður. Í sumar kemur hinsvegar hin langþráða Simpsons bíómynd og þá held ég að gamall aðdáandi vakni nú til lífsins og maður skelli sér í bíó, með popp í annari og kók í hinni og hlægi að öllum gömlu vinunum í Springfield. Sýnishornin sem búið er að gefa út lofa mjög góðu og mæli ég með að fólk kíki á þau hér.



Dagur tvö og enn blogga ég! Svei mér þá, þetta er nú ekki svo erfitt. Kannski ég taki tvö blogg á dag í næstu viku. Eða eitt blogg á klukkutíma! Eða ég eyði öllu mínum tíma að röfla hérna inná þannig að enginn nenni nokkurntíman að lesa alla þessa vitleysu!! AAAAAAAHAHAHAHAHAHAHAHAHAHAHA!!!

Nei, ok, ég lofa að gera það ekki.
Maggie.

Heit

Ég ætla að blogga á hverjum degi í þessari viku! Það er sunnudagur í dag og er hann að mestu búinn að fara í leti. Ég er að reyna að losna við þessa pest sem ég fékk og er því búinn að hanga uppí rúmi og sofa mikið og horfa á House. Ég og Ósk erum alveg búin að missa okkur í House, mjög fínir þættir. Fyrir þá sem ekki vita er House læknir sem er kaldhæðinn og leiðinlegur við fólk en hefur næstum alltaf rétt fyrir sér. Sem sagt alveg óþolandi, en maður elskar að hata hann af einhverjum ástæðum.

Ósk fór út í búð í gær og ég var eftir heima útaf veikindunum (aftur, ekki kindur sem segja vei (ég elska þennan brandara (ætli það sé löglegt að gera sviga innan sviga (kannski má allt þegar maður bloggar)))) og hún var svo sæt að kaupa handa mér blóm! Páskaliljur meira að segja enda styttist í páskana. Eggin komin í hillur búðanna og... já, eggin komin. Kannski ekki margt sem breytist þegar páskarnir nálgast. En maður getur átt von á því að fá blóm! Hér er mynd af blómunum því til sönnunar:



Hvernig ætli þetta gangi, að blogga á hverjum degi? Mun Magga takast ætlunarverk sitt? Er þetta dæmt til að mistakast? Fylgist spennt með. Hvatningarorð eru vel þegin í kommentkerfið.
Maggi ofurbloggari.

Partý

Eyjólfur Ásberg er í heimsókn frá Íslandi og ætlum við því að bjóða fólki heim í kvöld. Því miður verð ég takmarkað með í gleðskapnum vegna veikinda. Nei, það eru ekki kindur sem segja vei, heldur óþverraskítur í hálsinum á mér og nefinu. Ég var slæmur þegar ég vaknaði í morgun, en er skárri núna. Það verður samt eflaust gaman að fá fólk í heimsókn.
Maggi.

Sjaldan er ein báran stök

Það var ofsaveður í Danmörku í síðustu viku. Það heitir a.m.k. ofsaveður á danskan mælikvarða en þætti nú ekki stórmál á Íslandi. Í Danmörku er nefnilega enginn á vetrardekkjum og Danir kunna ekki fyrir sitt litla líf að keyra í snjó. Það fara allar samgöngur á annan endann og allt er ómögulegt. Það kom okkur samt á óvart að við skyldum fá póst frá skólastjórnendum á miðvikudaginn um að öll kennsla yrði felld niður daginn eftir. Við vorum ánægð með þær fréttir enda var ég að drukkna úr vinnu bæði frá skólanum og vinnunni minni hjá Víkurfréttum. Ég fékk því aukadag til að sinna þeim skyldum.

Á fimmtudaginn var svo fínasta veður, og við hefðum fengið samviskubit yfir því að mæta ekki í skólann á svona degi ef ekki hefði verið fyrir það að okkur var skipað að vera heima. En það kom okkur virkilega á óvart að fá aftur póst um það að öll kennsla væri felld niður á föstudeginum líka! Við sáum því fram á rólega fjögurra daga helgi og ákváðum að horfa á bíómyndirnar sem eru tilnefndar til Óskarsverðlauna yfir helgina. En...

Það vildi svo óheppilega til að hleðslutækið mitt fyrir tölvuna eyðilagðist. Það var of mikið álag á snúruna og hún juðaðist í sundur. Það væri svosem allt í lagi því Ósk á eins tölvu og eins hleðslutæki. En sama dag eyðilagðist líka hleðslutækið hennar! Það of-hitnaði því það lenti undir sæng og vildi ekki virka eftir það. Við vorum því tölvulaus á föstudeginum og ákváðum að fara niður í bæ í Apple búðina að athuga hvort þeir vildu laga þetta fyrir okkur. Þeir vildu heldur betur ekki samþykkja það og það var ekki fyrr en Hilmar, pabbi hennar Óskar, fór í Apple búðina á Íslandi og athugaði þetta fyrir okkur að þeir loksins samþykktu að taka við biluðu hleðslutækjunum. Það var íslenskur kvenskörungur sem vinnur hjá Apple sendi þeim harðort bréf þannig að þeir gátu ekki annað en samþykkt þetta.

Við ætluðum svo að redda bíómyndamaraþoninu með því að sækja myndirnar uppá nýtt og horfa á þær í tölvunni hans Bigga. Biggi sótti myndirnar og við hófumst handa við maraþonið á laugardeginum með The Queen sem var tilnefnd sem besta mynd. En þegar myndin var tæplega hálfnuð slökkti skjávarpinn á sér! Ég reyndi allt sem mér datt í hug til að koma honum í gang, en það kom í ljós að peran er ónýt! Hún var ekki einu sinni búin að duga eins lengi og hún átti að gera, heldur sprakk hún bara eða eitthvað. Svona pera kostar vel yfir 20 þúsund kr. Þannig að við fórum að þrífa húsið í staðinn. Bíómynda-maraþonið hélt svo áfram á 14 tommu skjánum hans Bigga, ekki alveg það sama og 110 tommurnar sem skjávarpinn sýndi.

Óskarsverðlaunin redduðust líka, horfðum á þau í tölvunni hans Bigga og það var mjög gaman að hafa séð svona mikið af myndunum sem voru tilnefndar. En þessi óvænta fjögurra daga helgi varð ekki jafn skemmtileg og hún hefði getað orðið. Raftækin voru ekki með okkur í liði.
Maggi.

Gestagangur

Það er heldur betur nóg að gerast á Edelsmindevej þessa dagana. Síðustu helgi voru Einar Þorgeirs og Birna kærastan hans í heimsókn hjá okkur og það var mjög skemmtilegt. Oftar en ekki rammíslensk gítarstemning og fjör. Þau fóru aftur á klakann á mánudaginn en þá tóku við Jóhann Már, Bebba og Hjörleifur! Þau eru búin að lifa í vellystingum hér í Köben og hafa tekið veitingastaðinn Kalaset ástfóstri. Það er reyndar ekkert skrítið þar sem það er ótrúlega góður matur þar.

Stuttu eftir að við vorum búnir með lokaprófið urðum við strákarnir í hópnum varir við það að vídjóið sem ég gerði fyrir Bomberman verkefnið var orðið ansi vinsælt á netinu. Einhver hefur greinilega séð vídjóið og haldið að gefa ætti leikinn út! Þannig komst vídjóið inná GameTrailers.com og þar stóð að útgáfudagur væri ekki vitaður á þessum nýja Bomberman leik. 65 þúsund manns sáu vídjóið á nokkrum dögum á þessari síðu og við fylgdumst spenntir með tölunni hækka.

Það linkuðu líka margir á YouTube.com þar sem vídjóið var staðsett líka og 41 þúsund manns hafa séð það þar. Ef maður googlar Bomberman Evolved þá getur maður fundið yfir 20 leikjasíður á hinum ýmsu tungumálum, sumar risastórar, sem hafa fjallað um leikinn. Margar þeirra hafa comment kerfi og við höfum fengið ótrúlega góð comment frá allskonar fólki. Flestir vilja prófa leikinn og finnst þetta geggjuð hugmynd. Ótrúlega gaman að fá svoleiðis undirtektir, sérstaklega hjá fólki sem skoðar svona leikjasíður og er greinilega mikið inní svona málum. Þannig að það hafa yfir 100 þúsund manns séð vídjóið sem ég vann einn frá byrjun til enda! Maður verður nú bara að monta sig pínulítið af því. :)

Annars er allt gott að frétta af okkur, nýja önnin komin á skrið og okkur líst bara vel á þetta allt saman. Önnin snýst um sensors annars vegar og audio design hins vegar. Hópurinn minn gerir líklega aftur nýja leið til að stjórna tölvuleik, en það hefur reynst okkur erfitt að komast að niðurstöðu um hvað okkur langar að gera. Sama hvað það verður þá verður þetta eflaust mjög áhugaverð og skemmtileg önn eins og sú fyrsta.
Maggi.

Próflok

Þá er maður búinn í prófum! Þetta var ágætis törn þótt prófin hefðu ekki verið mörg. Forritunarprófið var í byrjun mánaðarins og við erum nýbúin að fá útúr því prófi. Við Ósk fengum bæði 11 í einkunn sem er hæsta einkunn fyrir utan 13 sem er sjaldan gefin. Við erum að sjálfsögðu hæstánægð með þann árangur! :)

Svo tók við undirbúningur hjá mér fyrir stærðfræðipróf. Ég frétti viku fyrir prófið að það væri engin einkunn gefin heldur bara fall eða staðið. Og ég náði prófinu og allir í stærðfræðihópnum mínum þannig að það var bara ánægja með það.

Á mánudaginn fór hópurinn minn svo í síðasta prófið sem snýst um að verja lokaverkefnið og að svara spurningum úr þremur áföngum í skólanum. Fyrst fluttum við 50 mínútna kynningu á verkefninu okkar og eftir það var hópurinn spurður útí kynninguna og verkefnið. Það tók bara 15 mínútur og eftir það fór hver og einn inn í 20 mínútur og svaraði spurningum. Kennarinn og prófdómararinn voru svo sáttir með okkur að við fengum allir 13! Það þarf vart að taka það fram að við vorum ótrúlega sáttir með það og alveg steinhissa bara því við vorum hættir að láta okkur dreyma um þá tölu. 13 er mjög sjaldan gefin því maður þarf að sýna framá framúrskarandi hæfni og hæfni umfram það sem er kennt í námsefninu.

Við vorum líka á síðasta sjens að fá þessa einkunn því eftir þessa önn verður kerfinu breytt og hæsta einkunnin verður 10 eins og á Íslandi. Þetta er því líklegast hæsta einkunn sem ég fæ á skólaferli mínum. Núna er ég á leiðinni heim til eins hópfélaga míns að spila póker og fagna próflokum og góðum einkunnum. Á laugardaginn verður svo próflokapartý hjá Kollu, Birnu og Camillu og þá fær fólk að sletta úr klaufunum eftir að hafa legið yfir námsefninu allan mánuðinn.

Kveðja úr kuldanum í Danmörku, aldrei þessu vant er mun kaldara hér en á klakanum!
Maggi.

Dramantík í krummaskurði

Já það var sko heldur betur dramantík um daginn í krummaskurðinu. Þannig var mál með vexti að einn af leigjendunum í Penthousinu hefur misskilið þessi tvö orð frá barnæsku. Það eru nokkur ár síðan þetta með krummaskuðið kom uppá yfirborðið en það var nýleg að dramatíkin gerði vart við sig. Skrítið hvað maður tekur ekki eftir svona hlutum. Maður sér þessi orð nú sjaldan á blaði og það er ekki hægt að heyra mun í framburði.

Það hefur samt farið í taugarnar á mér misskilningur sem ég hef tekið eftir í nokkurn tíma. Það er þegar fólk víxlar orðunum 'fyrst' og 'víst' í samhenginu "Fyrst ég er að þessu þá get ég alveg eins gert hitt." Margir segja alltaf "Víst ég er að þessu þá get ég alveg eins gert hitt.". Ég hef minnst á þetta við nokkra og iðulega trúir fólk ekki að einhver segi þetta. En reynið að taka eftir þessu. Ef einhver sem þetta les segir 'víst' í staðinn fyrir 'fyrst', kommentaðu þá endilega! :p

Það er allt á fullu í prófalestri á þessum bænum. Ég er að læra fyrir stærðfræðipróf sem er á mánudaginn, og Ósk er að skrifa tvær ritgerðir sem hún á að skila núna á föstudaginn. Fyrsta prófið okkar, í forritun, sem var fyrir tæpri viku síðan gekk bara vel og við vorum sátt. Fáum einkunnirnar úr því síðar í mánuðinum.
Maggi.

Gleðilegt ár!

Ég hef ekki verið mikið fyrir að strengja áramótaheit gegnum tíðina. Finnst það kjánalegt að mörgu leyti. Jújú, fínt að bæta sjálfan sig í hinu og þessu en þarf maður afsökun eins og áramót til þess?

Já, kannski þarf maður það. Maður notar allskonar hluti sem afsakanir til að hjálpa manni að bæta sig og af hverju ekki að nota áramótin? Ég ætla nú samt að byrja rólega í að strengja einhver heit. Ég ætla að bæta mig í hinu og þessu sem ég hef verið að hugsa um, en eina sem ég ætla að strengja heit um er að halda betur utanum fjármálin mín. Ég hef ekki verið nógu duglegur í því, og er pínu forvitinn hvert peningarnir mínir eru að fara.

Hátíðarnar hafa verið æði. Mikill matur, góður félagsskapur, afslöppun og svo meiri matur. En Adam var ekki lengi í Paradís. Nú er það bara prófalestur og próftaka út mánuðinn. Við höldum til DK 4. janúar og fyrsta prófið er daginn eftir. Fjögurra tíma skriflegt próf í forritun. Jább, skriflegt, s.s. með blað og blýant. Skrifa forrit án þessa að nota tölvu, það er bara eins og menn gerðu á miðöldum. En þetta er gert til að fólk svindli ekki og maður hlýtur að skilja það.

En eins og ég segi, nú er það bara próflestur þannig að ég hef engan tíma til að skrifa blogg! :) Vonandi eruði södd og sátt eftir hátíðarnar.
Maggi.

Gleðileg jól!

Vonandi verða jólin þín kærleiksrík og góð, full matar og drykkjar í góðum félagsskap.
Maggi.

Andvökunótt

Nú eru verkefnin okkar í skólanum loksins að klárast. Við komum heim á klakann á mánudaginn, en þangað til er brjálað að gera að klára skýrsluna og allt sem þarf að gera áður en við skilum. Ég klippti saman vídjó í dag af prófununum á leiknum okkar sem fóru fram fyrir rúmri viku síðan. Við ætlum að sýna það í prófinu og líka á mánudaginn þegar nemendur fá að sýna hverjum öðrum verkefnin sem þeir gerðu. Hér fyrir neðan er vídjóið! Vonandi hafiði gaman af því. Endilega kommentið ef þið sjáið eitthvað sem má betrumbæta.

Maggi.

Stolnar blóðnasir

Og ég fæ blóðnasir
en ég stend alltaf upp.

Þetta eru tvær línur úr laginu Hoppípolla með SigurRós. Ég var fyrst að átta mig á því í dag að þetta er ekkert annað en ritstuldur. Ekki hélt ég að strákarnir í SigurRós yrðu uppvísir að þessu. Það voru einmitt strákarnir í eðalbandinu Chumbawamba sem mæltu þessi orð í laginu Tupthumping frá árinu 1997:

I get knocked down,
but I get up again.

Og strákarnir í Chumbawamba halda áfram:

He sings the songs that remind him
of the good times,
he sings the songs that remind him
of the better times...

Strákarnir í SigurRós gera sér lítið fyrir og stela þessu líka:

Brosandi,
hendumst í hringi,
höldumst í hendur...

Kannski ekki orðrétt en hugtökin eru bersýnilega þau sömu. Ég held við ættum að fara varlega þegar við áfellumst Hannes Hólmstein um ritstuld þegar svona vinnubrögð viðgangast beint fyrir framan nefið á okkur.
Maggi.

E.s: Takk allir fyrir gott partý á laugardaginn!

Ósk á afmæli í dag! :)

Til hamingju með daginn ástin mín! :*

Maggi.

Bomberman Evolved

Núna er tölvuleikurinn okkar fullgerður, eða í það minnsta eins fullgerður og hann mun verða, því nú standa yfir prófanir á honum fyrir lokaverkefnið okkar. Við erum með stóra kennslustofu að láni og fólk kíkir í heimsókn til okkar, prófar leikinn og svarar nokkrum spurningum sem munu hjálpa okkur við skýrslugerðina. Tilgangurinn er auðvitað aðallega til að kynnast svona prófunum en við látum sem þetta sé til að við getum þróað leikinn áfram.

Ég setti saman smá vídjó um uppsetninguna á leiknum og má það finna neðst í færslunni. Við tökum líka upp vídjó um prófanirnar og kannski endar það líka á þessari síðu, hver veit.
Maggi.

Fyrsta árið

Á föstudaginn var ár liðið frá því að ég og Ósk byrjuðum saman. Það hefur ansi mikið vatn runnið til sjávar síðan þá og ætli stærstu breytingarnar séu ekki að núna búum við saman í Kaupmannahöfn og lærum bæði Medialogy í útibúi Álaborgarháskóla (eins og flestir ættu að vita). Til hamingju með daginn ástin mín. :)

Þegar ég bloggaði síðast vorum við á leiðinni í jólaföndur í skólanum. Það var ansi gaman og föndrið okkar heppnaðist svo vel að við vorum með flottasta skrautið og unnum keppnina! Við vissum reyndar ekki að það væri keppni en það breytti því ekki að við unnum tvo miða á jólahlaðborð sem var haldið í skólanum núna á föstudaginn! Þannig að við ákváðum að eyða afmælinu okkar í að njóta vinningsins og mættum á skólabarinn og gæddum okkur á dönskum jólamat. Hann stóð undir væntingum og var bara ekkert sérstaklega góður. En í heildina litið var föstudagurinn frábær og verður lengi í minnum hafður.

Umferðarljósa-partýið daginn eftir jólaföndrið var haldið á skemmtistað sem höfðaði ekki mikið til okkar og því fórum við snemma heim. Of mikill reykur og fáránleg tónlist spilaði þar stærstan part. En fyrrihluti kvöldsins var vel heppnaður og vorum við langt frá því að vera ósátt með kvöldið.

Nú eru bara tvær vikur þangað til við komum heim! Það er nú ekki mikið búið að plana jólin eins og er, en það verður gaman að koma heim og hitta fjölskyldu og vini. Ólíkt undanförnum árum þá mun ég þurfa að læra mikið fyrir lokaprófin í janúar því þetta nám er heldur erfiðara en það sem ég var í. Þannig að það verður nóg að gera þessar rúmu tvær vikur sem við verðum heima. Sjáumst fljótlega!
Maggi.

E.s: Gleðilega aðventu! :D

Juleklip

Ætli það séu ekki 10 ár síðan ég hef föndrað í skólanum, en það er einmitt á dagskrá í dag í skólanum mínum! Reyndar er það bara notað sem ágætis afsökun til að drekka bjór eftir erfiða viku, en maður verður nú að sýna lit og búa til í það minnsta einn músastiga. Þetta er nú samt bara létt upphitun fyrir djammið sem er á morgun. Þá verður haldið fyrsta skipulagða skóladjammið á önninni. Það er partý á skemmtistað niðri í bæ og þemað (því Danir eru mikið fyrir það að hafa þema) er umferðarljós! Jább, frekar skrítið þema en þetta er víst frekar algengt hér hjá Baununum. Það virkar þannig að þeir sem eru á föstu mæta í rauðum fötum, þeir sem eru á lausu í grænum, og þeir sem eru einhverstaðar mitt á milli mæta í gulu. Þetta er eflaust ágæt leið til að pússa saman einhleypingana hér í skólanum því afsökunin "Nei ég er á föstu..." virkar ekki alveg já fólki sem er grænt frá toppi til táar. Ég og Ósk mætum auðvitað rauðklædd og ég skarta rauða hárinu sem aðra daga. :)
Maggi.

Systaz

Takk fyrir komuna síðustu helgi systur mínar! Þetta var mjög gaman þótt það væri stutt. Ég og Ósk sitjum uppí skóla að forrita, ótrúlega dugleg. Brjálað að gera í skólanum þessa dagana og er ekkert að fara að minnka fyrr en 18. desember þegar við fljúgum heim. Það verður gaman! :)
Maggi.

8

Lífið gengur sinn vanagang hér í Kaupmannahöfn. Við förum í skólann, horfum á sjónvarpið, eldum, borðum, sofum, verslum, förum út á lífið, fáum gesti í heimsókn, heimsækjum aðra og svo framvegis. Okkur líður vel og allt gengur vel. Ætli ég geti ekki sagt að ef ég blogga ekki þá sé hægt að áætla að allt gangi vel og að við séum södd og sátt. :)

Skólinn gengur mjög vel þessa dagana. Lokaverkefnið er komið á betra skrið nú þegar fyrirlestrarnir eru að mestu búnir. Hópurinn minn er kominn nokkuð langt, við erum nærri því búnir að gera tölvuleikinn með allri forritun og grafík, tracking (sem ég er í) gengur mjög vel og kennarinn okkar átti ekki til orð í dag þegar hann sá hvernig okkur gekk. Það styttist í að hægt verði að spila leikinn og þá taka við prófanir til að gera hann sem bestan. Svo þurfum við auðvitað að skrifa skýrslu um allt sem við höfum gert og það merkilegasta sem við höfum lært á önninni. Við höfum núna um það bil sex vikur áður en við þurfum að skila inn verkefninu. Þá eru næstum því komin jól! Ótrúlegt en satt. Tíminn flýgur áfram á undraverðum hraða.

Mamma og Ægir gistu hjá okkur fyrir rúmri viku síðan. Við elduðum handa þeim og horfðum með þeim á bíómynd. Það var mjög gaman og ég vona að það hafi farið vel um fyrstu næturgesti okkar. Svo hittum við (ég og Ósk) ömmu Fjólu og Gilla frænda á sunnudagskvöldinu sömu helgi og fórum með þeim á dýrindis steikhús. Afi komst því miður ekki því hann fékk fyrir hjartað og þurfti að eyða mestallri ferðinni uppá spítala. Eftir matinn fórum við að heimsækja hann og hann var brattur að venju.

Gulli, Atli, Ásgeir og Valdi komu að heimsækja Stinna síðustu helgi og við buðum þeim í smá partý á laugardagskvöldið. Það var mjög gaman, og þemað var átta! (jább, talan 8). Það var vegna þess að um verslunarmannahelgina gerði Biggi þá uppgötvun að núna í nóvember yrði hann 8.888 daga gamall, og Ósk yrði 8.000 daga gömul á svipuðum tíma. Það þýðir líka að ég verð fljótlega 8.888 daga gamall því Biggi er bara tveimur vikum eldri en ég. Við hengdum upp áttur og spiluðum Flash-teiknimynd með fljúgandi áttum (sjá neðst í færslunni). Þetta var ansi vel heppnað og allir skemmtu sér vel. Á sunnudaginn fórum svo ég Biggi og Jói út að borða með strákunum og Stinna, og valdi Stinni staðinn Kalaset. Hann er líka svona svaka fínn, bæði veitingastaður og skemmtistaður. Maturinn er ódýr, en flottur og virkilega bragðgóður. Þetta var í fyrsta sinn sem ég hef borðað artí-fartí borgara eins og Valdi kallaði hann.

Jói kvartaði yfir því að færslurnar mínar væru of langar, þannig að ég er hættur. Í lokin ætla ég að koma með nokkrar óskráðar reglur sem allir ættu að kannast við.

Óskráðar reglur:

1.

2.

3.

4.

5.


Maggi.

The Perfect Setup

Mér finnst eins og það séu svona þrír dagar síðan ég bloggaði síðast en þeir eru víst nær því að vera tuttugu og þrír. Það er nóg að gera hjá okkur og tíminn líður ótrúlega hratt! Þegar ég bloggaði síðast var kringum 20 stiga hiti alla daga en nú er hitinn kominn niður í 10-15 gráður. Lífið er komið í töluvert fastari skorður en þá, við erum búin að koma okkur vel fyrir og bara einstaka hlutir sem enn vantar í íbúðina. Við höfum bara ekki komið í verk að kaupa okkur gardýnur og skrifborð. Það er það helsta sem vantar inni hjá okkur og svo vantar eitthvað smotterí inní stofu líka. Skólinn gengur bara vel, nú tekur fyrirlestrunum að fækka og áherslan flyst meira yfir á lokaverkefnið fyrir önnina. Ég hef verið að vinna með color-tracking (hvað er það á íslensku?) og það gengur alveg ágætlega. Fljótlega þurfum við að gera viðameiri tilraunir til að sjá hversu vel okkur mun takast að framkvæma leikinn okkar. Aðrir hafa unnið hörðum höndum við að forrita leikinn og enn aðrir hafa unnið með þrívíddar-grafíkina og skýrsluskrif.

Frítíminn okkar þessa dagana fer að mestu leyti í að horfa á bíómyndir og þætti í aðstöðunni okkar á efstu hæðinni. Skjávarpinn er kominn upp og við náum 110 tommu stórri mynd á tjaldi sem við hengdum upp á einum veggnum. Það virkar meira að segja enn stærra í svona litlu rými. Svo tengdum við græjurnar mínar og hengdum hátalarna uppá vegg, tengdum DVD spilarann minn og keyptum okkur svokallað TV-box til að geta náð sjónvarpsútsendingum og sent í skjávarpann. Við gerum hinsvegar mest af því að tengja tölvurnar okkar beint við skjávarpann og spila það sem við höfum downlodað. Við erum nefnilega komin með 8 MB þráðlausa nettengingu og höfum verið dugleg við að nýta hana. Þannig að þurfið engar áhyggjur að hafa af því að okkur leiðist. :) Námið okkar er líka þannig upp sett að eftir hvern fyrirlestur hittast allir í hópunum sínum og vinna verkefni tengt því sem var kennt í tímanum. Þannig að maður er til dæmis alltaf búinn að reikna stærðfræðina í skólanum og þarf því ekki að gera það heima. Þetta er mjög þægilegt og hjálpar manni mikið með námið. Auðvitað þarf maður líka að vera duglegur heima og lesa í bókunum fyrir tímana. Annars mun seinni helmingur annarinnar verða mun tímafrekari þegar vinnan við lokaverkefnið er komin á fullt skrið.

Síðustu helgi héldum við afmælispartý fyrir Arndísi og innflutningspartý í leiðinni. Það var mjög skemmtilegt og flestir vinir okkar hér í Köben sáu sér fært að koma. Fengum meira að segja góða gesti frá Íslandi og Kolding. Nú um helgina verður stór hluti af fjölskyldunni minni í Kaupmannahöfn. Mamma og Ægir munu gista hjá okkur á föstudagskvöldið, og amma, afi og Gilli verða líka í bænum og við borðum með þeim öllum á sunnudagskvöldinu. Við ætlum að fara á uppáhalds veitingastaðinn minn í Kaupmannahöfn, Spiseloppen í Kristjaníu. Björk kynnti mig fyrir honum þegar Torgeirz og Jobu Kretz voru í heimsókn fyrir rúmum tveimur árum og síðan þá hef ég farið einu sinni eða tvisvar. Maturinn þarna er ekki mjög dýr og alveg svakalega góður.

Ég hef ekki verið nógu duglegur að taka myndir, en ég hef samt tekið eitthvað smá. Ef ég fyllist miklum eldmóð og dugnaði þá set ég kannski eitthvað af þeim á netið ef einhver hefur áhuga. Annars er aldrei sniðugt að lofa of mikið uppí ermina á sér. :)
Maggi.

Crazy to do

Það er heldur betur búið að vera brjálað að gera undanfarið. Síðasta föstudag fengum við íbúðina okkar nýju afhenta og á þriðjudaginn hófust flutningar. Reyndar vorum við ekki að flytja dótið sem við eigum heldur að flytja endalaust af dóti úr búðinni og heim í nýju íbúðina! Við leigðum flutningabíl í einn dag og nýttum daginn mjög vel. Bíllinn var algjör skrjóður, enda ekki við öðru að búast af bílaleigu sem heitir Rent-a-Wreck. Þeir leigja semsagt bíla sem eru við það að hrynja en koma manni amk (vonandi) á leiðarenda. Það besta er auðvitað að það kostar mjög lítið að leigja hjá þeim.

Ég og Ósk fórum í skólann um morguninn og náðum einum tíma áður við þurftum að leggja af stað til að sækja bílinn. Það tók alltof langan tíma að sækja bílaleigubílinn því við fengum rangar upplýsingar hvað eftir annað. En það tókst að lokum og við gátum byrja að útrétta. Við byrjuðum á því að fara í genbrug verslun, sem er verslun sem selur notuð húsgögn á vægu verði. Þar biðu Arndís og Biggi eftir okku og við ætluðum að reyna að kaupa sem mest notað til að spara pening. Það gekk heldur betur eftir því við keyptum mjög mikið og fórum með tvo bílfarma af dóti heim. Þar á meðal voru þrjú rúm, þrír sófar, þrír hægindastólar, sófaborð, borðstofuborð og sex stólar, fataskápur, eldhúsborð og fleira. Þetta allt kostaði okkur kannski kringum 2500 danskar krónur eða um þrjátíu þúsund. Það er ekkert verð fyrir allt þetta dót! Allt var í mjög góðu ástandi, það sást ekki á rúmunum og sófarnir eru mjög þægilegir og þar af einn svefnsófi. Annar er leðursófi, mjög flottur og þægilegur en of stór til að komast á efstu hæðina hjá okkur því hún er undir súð. Það var mjög skrautleg tilraun gerð til að koma sófanum upp en allt kom fyrir ekki. Þriðji sófinn er grænn og mjög retro.

Eftir að hafa borið allt dótið sem við keyptum upp þröngan stiga uppá aðra og þriðju hæð langaði okkur mest að leggja okkur. En til þess að nýta bílinn fórum við í IKEA! Þar keyptum við heilan helling af dóti, eitthvað af húsgögnum (hillur, skáp og náttborð) en aðallega litlu hlutina sem hvert heimili þarf að eiga. Allt í eldhúsið, lampa, ljós og ljósaperur, sængurföt, rúmteppi og fleira. Eftir þrjá tíma í IKEA vorum við alveg búin á því en þurftum samt að gera einn hlut í viðbót. Keyra niðrí bæ og sækja fjóra kassa sem Sigrún vinkona mömmu geymdi fyrir mig síðan í janúar. Eftir það þurftum við að fara heim, skila af okkur dótinu og skila svo bílaleigubílnum.

Við villtumst í hvert skipti sem við þurftum að keyra eitthvert og það voru miklar vegalegndir milli allra staðanna. IKEA er lengst útúr bænum og bílaleigan er lengst í burtu líka. Þannig að þetta var erfiður dagur og við vorum ekki komin heim fyrr en eitt eftir miðnætti, búin að vera á fullu síðan átta um morguninn.

Ég og Ósk sváfum svo fyrstu nóttina á nýja staðnum í nótt og vorum hæst ánægð með nýja stóra rúmið okkar. Kannski af því að það voru bara einbreið rúm á hinum staðnum og ég þurfti að sofa á óþægilegri dýnu á gólfinu.

Annars er bara allt fínt að frétta. Skólinn gengur vel. Ég er að fara að flytja kynningu á fyrsta verkefninu mínu á eftir. Það gekk bara mjög vel og hópurinn minn ætlar að halda sér og klára þetta verkefni á önninni. Nú í byrjun var þetta hugmyndavinna til að koma sér af stað í lokaverkefnið. Verkefnið okkar snýst um að gera útgáfu af Bomberman þar sem maður stjórnar leiknum með því að ganga um leikborð og við notum motion-tracking til að tölvan viti hvar leikmennirnir eru. Hmm, kannski ekki hægt að útskýra hugmyndina í einni setningu. En ég á eflaust eftir að tala um verkefnið aftur hérna síðar. Bið að heilsa úr 18-22 stiga hita hér í Danmörku. ;)
Magnús, aka. Maggi.

Lífið er óútreiknanlegt

Í dag var Bryndís Eva, dóttir Hjörleifs og Bebbu, lögð til hinstu hvílu. Ég samhryggist innilega og sendi þeim hlýja strauma. Þau hafa staðið sig svo vel og vakið þjóðfélagið til umhugsunar um mjög mikilvæg málefni. Aðdáunarvert að geta látið gott af sér leiða þótt erfiðleikarnir séu miklir. Verum góð við hvert annað.
Maggi.

Edelsmindevej 13

Hvar byrjar maður? Ég gaf fjölskyldu og vinum loforð þegar ég fór frá Íslandi (enn einu sinni) að ég myndi vera duglegur að blogga þegar ég kæmi út. Ég hef því miður ekki staðið við það en ég ætla nú að láta vita af mér stundum svo fólk fái að heyra hvernig gangi.

Það er bara allt gott að frétta af okkur. Stærstu fréttirnar eru að við erum komin með íbúð! Það gerðist bara í dag og við erum alveg himinlifandi með þetta allt saman. Íbúðin er hérna í Brønshøj, sama hverfi og við búum núna í tímabundnu íbúðinni okkar, bara tíu mínútna labb í burtu. Við erum búin að vera mjög sátt með þessa staðsetningu því ég og Ósk erum jafnlengi að komast í skólann og að komast niður í miðbæ. Íbúðin er 101 fermeter, 3ja herbergja, en reyndar tæknilega séð 4ra herbergja því við megum líka vera á hæðinni fyrir ofan, í risinu. Þar er auka klósett, mini-eldhús með ísskáp og pláss fyrir svona chill-out lounge. Það verður aðal stofan okkar en niðri ætlum við að reyna að koma fyrir einverri borðstofu þar sem við getum borðað saman. Við erum nefnilega búin að vera ansi dugleg að elda saman og höfum sparað hellings pening með því. Ekki veitir af því nú þurfum við að borga deposit og kaupa okkur húsgögn í nýju íbúðina okkar.

Á föstudaginn fórum við á tónleika með eðal bandinu Hot Chip. Það var algjör snilld! Þeir eru svo mikil nörd og þeir reyna það líka. Fimm gaurar á sviðinu, allir með hljómborð eða mixera og nokkrar bongó trommur og einhver lítil hljóðfæri sem framkalla hávaða. Þvílíkt dansvæn tónlist og geggjuð stemmning á litla Vega. Mæli með því að þú hlustir á þá ef þú hefur ekki heyrt í þeim ennþá. Mikil snilld hér á ferð. Svo hefur verið umræða hjá okkur um að kíkja á Muse í Berlín í nóvember. Flugið og miðinn á tónlekana kostar ekki nema rúman tíuþúsundkall og því er erfitt að finna ástæðu fyrir að fara ekki! :)

Best að fara að læra smá fyrir svefninn. Í þessari viku eigum við að klára skýrslu um verkefni sem verður mögulega lokaverkefnið okkar á önninni. Hópurinn minn ætlar að gera útgáfu af Bomberman þar sem leikurinn fer fram í heilu herbergi, og leikmennirnir færa sig á milli reitanna sem eru teiknaðir á gólfið. Svo er tölvuleiknum sjálfum varpað uppá vegg og þar sjá leikmennirnir hvar þeir eru staddir í leiknum. Veit ekki hversu vel mér tókst að útskýra þetta en þetta er amk frekar spennandi og gæti orðið mjög skemmtilegt lokaverkefni.

Kveðja frá Danmörku,
Maggi.

350s

Ég verð að viðurkenna að ég hef ekki verið jafn duglegur og ég ætlaði að vera í að blogga. En fyrst tíminn sem ég er í fer rétt að byrja ætla ég að hafa þetta voða stutt og laggott. Það gengur allt mjög vel hjá okkur. Skólinn er byrjaður og er fínn, pínu öðruvísi en ég bjóst við. Fjallar soldið mikið um tölvuleiki og motion capture (t.d. eins og EyeToy leikirnir sem eru í PlayStation fyrir þá sem þekkja það). Svo er mikil stærðfræði og forritun. Við erum líka byrjuð í verkefni sem á að taka þrjár vikur og ef það fæðist góð hugmynd á þeim tíma þá megum við halda áfram með hana út önnina og gera stórt verkefni úr því. Ég er í hóp með fimm öðrum strákum, fjórum dönskum og einum kínverskum. Hópavinnan gengur bara ágætlega og við erum með fína hugmynd sem ég lýsi fyrir ykkur síðar.

Við erum enn ekki komin með varanlegt heimilisfang en erum búin að fara að skoða eina íbúð niðrí miðbæ. Við höfum ekki enn fengið að vita hvort við fáum hana en höldum í vonina.

Tíminn er byrjaður! Hann heitir Light, the eye and the visual system. Meira seinna.

Maggi.

iMagg

Til hamingju ég! Hvern hefði grunað? Ég er að rita þessi orð á nýju MacBook Pro fartölvuna mína. Mikið er hún nú falleg. Næstu dagar og vikur verða skemmtilegar, að setja hana upp nákvæmlega eins og ég vil hafa hana. Gamla vélin mín, Acer fitubollan, lét lífið nú í sumar þegar ég missti hana í gólfið. Hún stóð sig nú samt mjög vel og ég er mjög sáttur við hana. En það verður að segjast að nýji makkinn er fallegri, og greindari líka.

En næstu dagar og vikur verða ekki bara skemmtilegir útaf nýju tölvunni minni. Nei það verður sko nóg að gerast. Ný borg, ný íbúð (eða tvær), nýr skóli, sem þýðir nýjir kennarar og skólafélagar. Nýtt, nýtt, nýtt. En ég hef kærustuna með mér og slatta af vinunum til að deila öllu þessu nýja með. Það gerir þetta allt enn betra.

iMagg.

Leitið og þér munið finna...?

Íbúðaleit er nú í algleymingi... aftur. Það þýðir ekki að láta bilbug á sér finna heldur láta hendur standa fram úr örmum og láta ekki deigan síga. Við höfum fengið jákvæð svör síðustu þrjá daga en það er ekki sopið kálið þó í ausuna sé komið. Alltaf virðist sú staðreynd að við séum fjögur saman fara eitthvað vitlaust ofaní fólk. Það er erfitt að finna íbúð fyrir fjóra í Köben, hvað þá fjögur ungmenni. Fordómar gagnvart ungu fólki virðast blómstra í Danmörku rétt eins og á Íslandi og við höfum heldur betur fengið smjörþefinn af því.

Helgin var góð, þrátt fyrir mikla mannmergð á laugardeginum eins og við var að búast. Við fórum út á bát til að sjá flugeldasýninguna, ég þakka Elvu Söru gott boð. Það var mjög skemmtilegt og ég náði fínum myndum af sýningunni.

Kona

Stelpa dagsins: Ósk. :)

Þegar þetta er skrifað er vika í brottför til Danmerkur. Tilhlökkunin lætur bíða eftir sér þar til við fáum íbúð, sem gerist vonandi fljótlega... aftur.

Maggi.

Fallegur, sólríkur, f***ing helv***s dagur

Við misstum íbúðina.

M.

3x3farar

Þegar ég spurði í vinnunni hver í Rockstar: Supernova ætti að vera í næstu þríförum kom upp sú hugmynd að hafa Supernova þrífara. Sú hugmynd féll í svo góðan jarðveg að ég fékk alveg heilan helling af tillögum þannig að úr urðu 3x3 farar eða nífarar.



Maggi.

Krækjur

Ég var að taka til í krækjulistanum hér á síðunni enda mikil þörf á. Helmingurinn hættur að blogga og hinn helmingurinn búinn að skipta um síðu. Og þriðji helmingurinn ekki búinn að breyta neinu.

Ég vil bjóða nýjustu bloggarana á listanum velkomna en það eru faðir minn hann Jón Baldvin og systir mín hún Fjóla Þórdís. Þau eru byrjuð að blogga fyrir nokkru síðan og voru þau ekkert að láta vita af því. Svona eru góð samskiptin í minni fjölskyldu. :p

Það styttist í fiskidaginn! Hvað er betra en fiskur? Jú, einmitt... ókeypis fiskur.

Maggi.

Norðurbrú

Við erum búin að finna íbúð í Köben! Og gott betur en það, við ætlum að leigja hana frá og með 1. september! Vei! Íbúðin er á 11. hæð í blokk við Lundtoftegade á Nörrebro. Það er hverfi ágætlega nálægt miðbænum, Biggi reiknaði út að það væru um 3 kílómetrar niðrí bæ. Það er stutt strætó- eða hjólaferð. Hinsvegar er tæplega hálftíma lestar- eða strætóferð í skólann minn sem er í Ballerup. En það er allt í lagi, miklu betra að vera í miðbænum því við erum fjögur saman og verðum öll að gera mismunandi hluti. Biggi í skóla í Frederiksbjerg (sem er hverfið við hliðina á Nörrebro, skólinn hans er 2 km frá íbúðinni okkar) og Ósk og Arndís munu fara að vinna fyrst um sinn.


Við munum eiga heima á 11. hæð í einni af þessum blokkum
En já. Verslunarmannahelgin kom og fór. Við (ég, Ósk, Biggi og Jómbi) vorum minna á Sigló en áætlað var vegna aftakaveðurs og veikinda gestgjafa en vorum þess í stað í góðu yfirlæti í bílskúrnum hjá pabba og Möggu á Akureyri, fyrir utan Jómba sem gisti hjá vini sínum. Það var virkilega gaman hjá okkur að því undanskildu að djammið var ekki gott. Of mikið af fólki og bara einhver leiðindi. En við skemmtum okkur vel við að spila og fíflast saman alla helgina. Á mánudeginum kíktum við til Siglufjarðar, heimsóttum þar ömmu og afa og kíktum á ljósmyndasýninguna hans afa sem var mjög flott.

Næstu helgi er ferðinni aftur heitið norður í land því Fiskidagurinn mikli verður haldinn á Dalvík með pompi og prakt! Ég og systur mínar fjórar (já ég á fjórar systur, vissiru það ekki?) ætlum að mæta og skemmta okkur með pabba og Möggu og Dalvíkingunum. Það verður eflaust mjög gaman, og aldrei að vita nema Óskin mín kíki með mér.

Svo styttist í það að við förum út, ekki nema þrjár vikur uppá dag þegar þetta er skrifað. 30. ágúst semsagt. Þetta verður bara gaman og vonandi stendur íbúðin undir væntinum. Vinkona mömmu er búin að fara að skoða hana fyrir okkur og leist bara vel á þannig að við erum ágætlega bjartsýn á þetta. Bið að heilsa.

Maggi.

Rocstar þrífarar: Dilana

Jæja þá er komið að næstu þríförum. Ég kann bara vel við Dilönu þannig að vonandi verða aðdáendur hennar ekki sárir. :) Ætli það sé ekki kominn tími á Magna næst! Bíðið spennt.

Maggi.

20 árum síðar

Það dreif margt á daga mína í júlí þó ég hafi nú ekki verið iðinn við að rita það á þessa síðu. Ætli það sé ekki besta sönnunin fyrir því að ég hef haft í nógu að snúast, enginn tími til að blogga. Það ber helst að nefna AfmælisTaðinn sem haldinn var með pompi og prakt í tilefni þess að aðeins er eitt ár þar til ég verð kvart-aldargamall. Það var, pardon my french, ógeðslega gaman og þakka ég öllum fyrir komuna sem.. komu.

Helgina eftir Taðinn fórum ég og Ósk í grillveislu hjá XFM og fengum geggjaðan mat. Á laugardeginum fórum við svo saman í rafting ásamt fullt af vinum okkar því hún Camilla vinnur einmitt hjá Arctic Rafting. Það var geggjað gaman og eftir það var farið í heitan pott, grillað og spjallað. Svo var haldið aftur til höfuðborgarinnar í partý hjá Ísaki sem var mjög skemmtilegt.

Fyrir rúmri viku síðan hélt ónefnd vinkona mín, hún Elva Sara, uppá afmælið sitt. Það var um borð í bát, eða lítilli snekkju réttara sagt, og var það mjög vel heppnað teiti og allir skemmtu sér vel. Sumir skemmtu sér meira að segja svo vel að þeir höfðu ekki hugmynd um að þeir hefðu skemmt sér vel!

Í síðustu viku fór ég líka á tvenna SigurRósar tónleika. Þeir fyrri voru á Ólafsvík og voru alveg geggjaðir. Ég, Kristinn og Biggi fórum saman og sátum fimm metra frá sviðinu og ég tók yfir 200 myndir. Þeir seinni voru á Klambratúni og voru þeir skiljanlega öðruvísi en hinir enda ekki jafn mikil nálægð. En þeir voru góðir engu að síður.

Næstu helgi er lengsta helgi ársins að nafninu til, en það er hin sjö atkvæða Verslunarmannahelgi. Ég, Óskin mín og Biggi höfum í ár ákveðið að heiðra Siglfirðinga og nærsveitamenn með nærveru okkar, og aldrei að vita nema fleiri bætist í hópinn. Síldarhátíðin er málið í ár.

Þessa dagana kemst fátt annað að en pælingar í sambandi við húsnæði í Köben. Ég, Ósk, Biggi og Arndís ætlum að búa saman og vantar því að leigja 4ra herbergja íbúð, helst miðsvæðis. Ef þú eða einhver sem þú þekkir eigið eina slíka á glámbekk þá þætti mér mjög vænt um að þú létir mig vita.

Maggi.

E.s: Hvað ætlar þú að gera um Verslunarmannahelgina?

Zed - Stitch - Lucas

Það er einn gaur í Rockstar sem fer í taugarnar á mér og það er hann Lucas. Hann er frekur, hrokafullur gúmmítöffari sem getur varla talað hvað þá sungið. Mér finnst gaman að gera grín að honum og því fann ég til þessa tvo sem mér finnst líkir honum.



Maggi.